2017 جىلدىڭ 29 ماۋسىمىندا قازاقستان رەسپۋبليكاسى ورتالىق سايلاۋ كوميسسياسى وتىرىس بارىسىندا 2017 جىلدىڭ 28 ماۋسىمىندا بولعان قر پارلامەنتى سەناتىنىڭ دەپۋتاتتارىن سايلاۋ قورىتىندىلارى بەلگىلى بولدى.
سايلاۋ قازاقستان رەسپۋبليكاسى پرەزيدەنتىنىڭ 2017 جىلعى 28 ساۋىردەگى جارلىعىنا, قر كونستيتۋتسياسىنا جانە "قازاقستان رەسپۋبليكاسىنداعى سايلاۋ تۋرالى" كونستيتۋتسيالىق زاڭىنا سايكەس جۇرگىزىلدى. ءار وبلىستان, استانا مەن الماتى قالالارىنان ءبىر دەپۋتاتتان بارلىعى 16 دەپۋتات سايلاندى.
"قازاقستان رەسپۋبليكاسى ورتالىق سايلاۋ كوميسسياسى وبلىستىق, استانا مەن الماتى قالالىق سايلاۋ كوميسسيالارىنىڭ سايلاۋ بويىنشا داۋىستاردى ساناۋدىڭ قورىتىندى حاتتامالارى نەگىزىندە قازاقستان رەسپۋبليكاسىنىڭ 14 وبلىسىندا, استانا مەن الماتى قالالارىندا قر پارلامەنتى سەناتىنىڭ دەپۋتاتتارىن سايلاۋ ءوتتى", - دەپ حابارلادى وسك.
سايلاۋ ناۋقانى بارىسىندا بارلىعى 89 ۇمىتكەر ۇسىنىلسا, سونىڭ 38-ءى سايلاۋ بيۋللەتەنىنە ەنگىزىلدى. سايلاۋعا 3242 تاڭداۋشى قاتىستى. قر پارلامەنتى سەناتىنىڭ دەپۋتاتتارىن سايلاۋ بارىسىندا 518 حالىقارالىق جانە وتاندىق بايقاۋشى, 244 قازاقستاندىق جانە شەتەلدىك باق وكىلى قاتىستى. سايلانعان دەپۋتاتتاردىڭ 7-ءىن ءماسليحاتتار ۇسىنسا, 9-ى ءوزىن ءوزى ۇسىنۋشىلار.
قر پارلامەنتى سەناتىنىڭ دەپۋتاتتىعىنا ۇمىتكەرلەردىڭ ورتاشا جاسى 56,7 جاس. سونىمەن, قازاقستان رەسپۋبليكاسى سەناتىنىڭ دەپۋتاتتارىن سايلاۋ قورىتىندىسى بويىنشا سايلانعانداردىڭ ءتىزىمى تومەندەگىشە: اقمولا وبلىسىنان ادىلبەكوۆ داۋرەن زەكەن ۇلى, اقتوبە وبلىسىنان جۇماعازيەۆ مۇحتار سابىر ۇلى, الماتى وبلىسىنان قىلىشباەۆ نۇرلان ناۋرىز ۇلى, اتىراۋ وبلىسىنان دۇيسەمباەۆ عۇمار يسليام ۇلى, باتىس قازاقستان وبلىسىنان تورەعاليەۆ ناريمان, جامبىل وبلىسىنان نۇراليەۆ ءابدالى توقبەرگەن ۇلى, قاراعاندى وبلىسىنان ابدىكەروۆ رىسقالي, قوستاناي وبلىسىنان نۇرعاليەۆ جەڭىس ميراس ۇلى, قىزىلوردا وبلىسىنان باقتيار ۇلى مۇرات, ماڭعىستاۋ وبلىسىنان شەلپەكوۆ باقتىباي اقبەردى ۇلى, وڭتۇستىك قازاقستان وبلىسىنان قۇرتاەۆ ءالىمجان سەيىتجان ۇلى, پاۆلودار وبلىسىنان نۇرسيپاتوۆ نۇرجان نۇرلانبەك ۇلى, سولتۇستىك قازاقستان وبلىسىنان سۇلتانوۆ ەرىك حامزا ۇلى, شىعىس قازاقستان وبلىسىنان مۋسين دۇيسەنعازى ماعاۋيا ۇلى, استانا قالاسىنان مامىتبەكوۆ ەدىل قۇلامقادىر ۇلى, الماتى قالاسىنان جۇكەتاەۆا دينار جۇسىپالىقىزى سايلاندى.
باۋىرجان مۇقانوۆ,
"ەگەمەن قازاقستان"