ناقتىلاي ايتساق, 19-25 ماۋسىم ارالىعىندا قالاشىققا 168 675 ادام ات ءىزىن سالعان. ياعني, كورمەنى كۇنىنە ورتاشا ەسەپپەن 24 069 ادام ارالاعان. باستاپقى 9 كۇندە 205 561 ادام نەمەسە كۇنىنە 22 840 كەلۋشى تىركەلسە, بۇل كورسەتكىش 27 ماۋسىمداعى جاعداي بويىنشا 425 377 كورەرمەنگە كوبەيدى. سونىمەن قاتار, «استانا ەكسپو-2017» ۇك» اق ءباسپاسوز قىزمەتىنىڭ مالىمەتىنشە, 10-27 ماۋسىمدا كورمەگە كەلىپ-كەتۋ كورسەتكىشى 2 774 527-ءنى قۇراعان.
حالىقارالىق شاراعا قاتىستى تاعى جاڭالىق, قوناقتار سانى جوعارى پاۆيلونداردىڭ ۇزدىك وندىعىنىڭ ءتىزىمى جاسالدى. ولاردىڭ اراسىندا رەسەي, وزبەكستان, ءۇندىستان, ازەربايجان, افريكا ەلدەرى, مىسىر, قىتاي, تۇركيا, ساۋد ارابيا كورولدىگى, مالايزيا بار. مۇنىمەن قوسا, ادامدار كوپتەپ تاماشالايتىن نىسانداردىڭ ىشىندە «نۇر الەم», كوممەرتسيالىق پاۆيلوندارى, «شەلل» بالالار زەرتحاناسى, «ديۋ سولەي» تسيركى, «س 3.5», «س 2.4» تاقىرىپتىق پاۆيلوندارى, امفيتەاتر, شىعارماشىلىق ەنەرگيا ايماعى, كورپوراتيۆتىك پاۆيلون, بالالار ساياباعى قامتىلعان. كورمە باستالعالى بەرى قاۋىپسىزدىك ماسەلەسى بويىنشا 178 وقيعا تىركەلگەن. ولاردىڭ باسىم بولىگى – ەرەسەكتەردىڭ بالالاردان كوز جازىپ قالۋى. ايتا كەتەرلىگى, كۇن ءوتۋ, السىرەۋ, سونداي-اق سوزىلمالى اۋرۋلارى بار جاندار تاراپىنان مەديتسينالىق كومەككە جۇگىنگەندەر سانى 146-عا جەتتى. «استانا ەكسپو-2017» ۇلتتىق كومپانياسى ارزان بيلەتتەردى ساتىلىمعا شىعارعانىن حابارلادى. ول بيلەتتەرمەن كەشكى ساعات 18:30-دان باستاپ كىرۋگە بولادى ەكەن. جۇمىس كۇندەرى «كەشكى» بيلەتتىڭ باعاسى 2 مىڭ تەڭگە بولسا, دەمالىس كۇندەرى 3 مىڭ تەڭگەدەن ساتىلادى. ال الەۋمەتتىك جاعىنان از قامتىلعان ازاماتتار ءۇشىن ودان ەكى ەسە ارزان بولادى. دەمەك, ولار كەشكى بيلەتتەردى 1-1,5 مىڭ تەڭگەگە الا الادى. ەكسپو كورمەسىنە ابونەمەنت تە ساتىپ الۋعا بولادى. 50000 تەڭگەنىڭ ابونەمەنتىمەن كورمە اياقتالعانشا كىرىپ-شىعۋعا مۇمكىندىك بار. الەۋمەتتىك جاعىنان از قامتىلعان ازاماتتار ءۇشىن ونداي ابونەمەنتتىڭ باعاسى ەكى ەسە ارزانعا تۇسەدى, ياعني 25000 تەڭگە بولادى. ايتا كەتەرلىگى, ابونەمەنتتەر ناقتى ادامنىڭ اتىنا جازىلادى. سول سەبەپتى, تەكسەرۋشىلەر ونداعى مالىمەتتەردى جەكە كۋالىكپەن سالىستىرىپ كىرگىزەدى. اسحات رايقۇل, «ەگەمەن قازاقستان»