ءماجىلىس توراعاسى نۇرلان نىعماتۋلين رەسەي فەدەراتسياسى فەدەرالدىق جينالىسى فەدەراتسيا كەڭەسى توراعاسىنىڭ ورىنباسارى, قازاقستان پارلامەنتى سەناتى دەپۋتاتتارىن سايلاۋ بارىسىن بايقاۋعا قاتىسقان تمد پاا بايقاۋشىلار توبىنىڭ ۇيلەستىرۋشىسى يلياس ۋماحانوۆپەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
تمد پاا وكىلدەرىنە ءوز العىسىن جەتكىزە كەلىپ, ن.نىعماتۋلين ءبىزدىڭ ەلىمىزدىڭ حالىقارالىق ستاندارتتارعا سايكەس اشىق, جاريالى, ءادىل سايلاۋ وتكىزۋگە ايرىقشا ءمان بەرەتىنىنە توقتالدى. ءوز كەزەگىندە ي.ۋماحانوۆ: «ەلدىڭ جوعارى زاڭ ورگانىنىڭ سايلاۋ ناۋقانى ماڭىزدى ساياسي وقيعا. ونىڭ ۇستىنە قازاقستان پرەزيدەنتى نۇرسۇلتان نازارباەۆ ۇسىنعان ساياسي رەفورمادان كەيىن پارلامەنتتىڭ وكىلەتى ارتۋىنا بايلانىستى بۇل ساياسي ناۋقاننىڭ وزەكتىلىگى بۇرىنعىدان ارتا ءتۇستى», دەدى. تاراپتار سونداي-اق, قازاقستان مەن رەسەي قارىم-قاتىناسىنا قاتىستى ماڭىزدى ماسەلەلەر بويىنشا پىكىر الماستى. پارلامەنتارالىق ىنتىماقتاستىقتى نىعايتۋعا دا باسا نازار اۋدارىلدى.