سپورت سارايىندا مەملەكەتتىك قىزمەتشىلەر اراسىندا سپورتتىڭ ميني-فۋتبول, ۆولەيبول, دويبى, ۇستەل تەننيسى, گىر كوتەرۋ, جەڭىل اتلەتيكا تۇرلەرىنەن سپارتاكيادا ءوتتى.
ونى ايماق باسشىسى قۇمار اقساقالوۆ كىرىسپە سوزبەن اشىپ, ءوڭىردىڭ الەۋمەتتىك-ەكونوميكالىق دامۋىنا ءوز ۇلەستەرىن قوسىپ جۇرگەن مەملەكەتتىك قىزمەتشىلەردى كاسىبي مەرەكەمەن قۇتتىقتاپ, تابىس تىلەدى. قىزمەتپەن قاتار سالاماتتى ءومىر سالتىن جۇرتشىلىق اراسىندا كەڭىنەن ناسيحاتتاۋعا شاقىردى. سونىڭ ءبىر ۇلگىسىنە تۇڭعىش رەت ۇيىمداستىرىلىپ وتىرعان سپارتاكيادانى مىسالعا كەلتىردى.
ءبىر توپ مەملەكەتتىك قىزمەتشىگە «ۇزدىك مەملەكەتتىك قىزمەتكەر» توسبەلگىسى مەن قۇرمەت گراموتالارى تابىس ەتىلدى.
سپارتاكياداعا قۇرامىندا ءبىر مىڭعا تارتا مەملەكەتتىك قىزمەتشى بار 40 كوماندا قاتىسىپ, ءوز كۇشتەرىن سىناستى.
قۇمار ىرگەباي ۇلى وبلىستىق اكىمدىكتىڭ كومانداسى قۇرامىندا ۆولەيبول جانە تەننيس وينادى.
ءومىر ەسقالي, «ەگەمەن قازاقستان»