- مينيسترلىك ءوسىدان بىر جىل بۇرىن قۇرىلدى. ەلباسى باستاماسىمەن بىرقاتار مىندەتتەر قويىلعانى بەلگىلى. ءوز كەزەگىندە مينيسترلىك اۋقىمدى شارالاردى جۇزەگە اسىردى. اتاپ ايتار بولساق, «OTAU TV» پاكەتى ارقىلى "حابار", "قازاقستان", KazSport تەلەارنالارى HD فورماتىندا جۇمىس ىستەي باستادى. انالوگتى حابار تارتۋدان بىرتىندەپ تسيفرلىق حابار تاراتۋ جۇيەسىنە اۋىستىرۋ جۇمىستارى جۇرگىزىلىپ جاتىر. قازىر حالىقتى تسيفرلىق ەفيرمەن قامتۋ 77 پايىزعا جەتتى, -دەدى مينيستر داۋرەن اباەۆ.
ءمينيستردىڭ سوزىنشە, الماتى, جامبىل, ماڭعىستاۋ, وڭتۇستىك قازاقستان وبلىستارىندا تسيفرلىق ەفيرمەن قامتۋ جۇمىستارى تولىق اياقتالعان. ەل اۋماعىنىڭ قالعان بولىگىن تسيفرلىق ەفيرمەن قامتۋ جۇمىستارى 2018 جىل سوڭىنا دەيىن اياقتالاتىن بولادى.
«انالوگتىق حابار تاراتۋدان بىرتىندەپ تسيفرلىق حابار تاراتۋعا كوشۋ جۇمىسى بەلسەندى جۇرگىزىلۋدە. شالعاي اۋداندار تۇرعىندارىنىڭ ساپاسى تومەن 3-4 ارناعا عانا قولى جەتىمدى بولعان كەزدەر بۇگىنگى كۇنى ارتتا قالدى», - دەدى ول.
مينيستر ءوز سوزىندە وتاندىق سپۋتنيكتىڭ تەلەۆيزيا ابونەنتتەرىنىڭ سانى 1 ملن. 300 مىڭعا جاقىنداعانىن اتاپ ءوتتى.
«بەس جىل بۇرىنعى كورسەتكىشپەن سالىستىرساق, قازىر كورەرمەندەرىمىز وتاندىق سپۋتنيكتىك تەلەۆيزياعا باسىمدىق بەرىپ وتىرعاندىعىن سەنىممەن ايتۋعا بولادى. سونداي-اق حالىقارالىق تاجىريبە مەن وقىرمانداردىڭ قالاۋىن ەسكەرە وتىرىپ, «ەگەمەن قازاقستان» جانە «كازاحستانسكايا پراۆدا» گازەتتەرىنە رەديزاين جۇرگىزىلدى. قازىر بۇل گازەتتەر تولىق ءتۇرلى-ءتۇستى فورماتتا شىعۋدا. سونىمەن قاتار ولاردىڭ سايتتارى دا ۇلكەن جاڭعىرتۋدان ءوتىپ, ىقپالدى اقپارات رەسۋرسىنا اينالدى», - دەدى داۋرەن اباەۆ.
ايا ءومىرتاي,
"ەگەمەن قازاقستان"