بالكىم, سولاردىڭ ءبىرازى قوعامنىڭ ىلگەرى دامۋىن قالايتىن ىزگى نيەتتى ادامزات بالاسىنىڭ ورتاق يگىلىگىنە اينالار. تالايلاردى تاڭداندىرعان تاماشا يدەيالار كۇندەلىكتى تىرشىلىگىمىزدەن كورىنىس تابار. ايتەۋىر, كوبىنە كوكتەگىنى كوكسەيتىن كوڭىلىمىزدە ۇكىلەگەن ءۇمىت كوپ. ولاي بولسا, ايىمىز وڭىنان تۋىپ, ادالدىقتان اينىماس اق جۇرەكتىڭ ارمان-اڭسارىنداي ماقسات-مۇراتتارىمىز ءبىزدى العا جەتەلەي بەرگەي. ەندى ەجەلگى ەسىل جۇرتتا جايناعان جاس ەلوردامىزعا الىس-جاقىننان اعىلاتىن اعايىنعا بەيبىتشىلىكتىڭ بەسىگىن تەربەتكەن بەرەكەلى ەل ەكەنىمىزدى كورسەتكەنىمىز ابزال. بابادان ميراس باي ءداستۇرىمىز بويىنشا ەسىگىمىزدەن ەنگەن قادىرلى قوناقتارىمىزدى قۇشاق جايا قارسى الۋىمىز قاجەت. قاباقتارىنا قاياۋ تۇسىرمەي قايتارۋىمىز كەرەك. ولار ەرتەڭ وتاندارىنا ورالعاندا قوناقجاي حالقىمىزدىڭ ىستىق ىقىلاسىن ەمىرەنە ەسكە الىپ جاتسا, ءبىر عانيبەت ەمەس پە؟! وركەنيەت شىڭىنا ورمەلەگەن تاۋەلسىز قازاقستان تۋرالى جاعىمدى پىكىرلەردىڭ جايىلۋىنا مۇنداي شارتاراپتىق شارالاردىڭ دا سەپتىگى تيەتىنى بەلگىلى. اقوردالى استانا – مەيماندوس مەگاپوليس. شۋاقتى شاھارىمىزعا كەلىپ-كەتۋشىلەر قيماستىقپەن ارتتارىنا قارايلاي-قارايلاي اتتانادى. ەڭ باستىسى, ءبارى ونىڭ دامۋ ديناميكاسىنا تاڭداي قاعىپ, ارۋداي سىلانعان اجارىنا سۇيسىنەدى. ادامدارىنىڭ پاك پەيىلىنە ريزاشىلىقتارىن ءبىلدىرىپ جاتادى. القالى جيىندارعا ارنايى شاقىرىلعان سارابدال ساياسات سەركەلەرىنىڭ دە, نوبەل سىيلىعىن العان عۇلاما عالىمداردىڭ دا, دۇنيەجۇزىلىك ءدۇبىرلى دودالاردا توپ جارعان ساڭلاق سپورتشىلاردىڭ دا, ورەلى ونەرىمەن كورەرمەن كوڭىلىن جاۋلاعان ايگىلى ارتىستەردىڭ دە اعىنان جارىلا استانا جايىندا جاعىمدى پىكىر ايتقاندارىن ەكى كۇننىڭ بىرىندە كوز كورىپ, قۇلاق ەستىپ ءجۇر. بەس قۇرلىققا بەلگىلى بەدەلى بار ەلباسىمىز نۇرسۇلتان نازارباەۆتىڭ ەرەن ەڭبەگى ارقاسىندا ايبىنى اسقاقتاعان استانا اسا ماڭىزدى حالىقارالىق ماسەلەلەر تالقىلاناتىن تاعدىرشەشتى باسقوسۋلاردىڭ الاڭىنا اينالدى. ەقىۇ-نىڭ ءسامميتى, الەمدىك جانە ءداستۇرلى دىندەر كوشباسشىلارىنىڭ سەزدەرى, ەكونوميكالىق فورۋمدار, ارازداسقاندارعا اراعايىندىق جاساۋ باعىتىنداعى كەلىسسوزدەر ۇيىمداستىرۋ پروتسەستەرىن ەسكە تۇسىرسەك, ەلوردامىزدىڭ اينالاسىنا تاتۋلىق اۋراسىن تاراتاتىن ەرەكشە ءرولىن ەرىكسىز مويىندايسىز. الداعى ءۇش ايدا ەلدىگىمىز سىنالار تاعى ءبىر ەمتيحان تاپسىرماقپىز. مەرەيلى مەملەكەتىمىز وعان مەيلىنشە ازىرلەنگەنى الەمگە ايان. سوندىقتان, ىرگەلى ىستە ىركىلىس بولماسىنا سەنىم مول. ەندەشە, نە تۇرىس؟! ەكسپو مەيماندارىن ادەمى اسەرگە بولەيتىن ءارتۇرلى باعدارلامالارىمىزدى باستامايمىز با؟ وسى ورايدا مادەنيەت جانە سپورت مينيسترلىگى تاراپىنان ۇتىمدى شارالار ۇيىمداستىرىلماق ەكەن. ەلىمىزدەگى ەڭ تانىمال ونەر وردالارى, جەكەلەگەن ساحنا جۇلدىزدارى توقسان كۇندىك تورقالى تويدىڭ كوركىن كىرگىزبەك. ماقتان تۇتار ماڭدايالدى تەاترلارىمىز سپەكتاكلدەرىن كورسەتىپ, وپەرالارىن قويىپ, بالەتتەرىن بيلەيدى. ءداستۇرلى اندەرىمىز دارىپتەلىپ, شالقىما كۇيلەرىمىز شارىقتايدى. مۋزەيلەرىمىز بەن كونتسەرت زالدارىمىز ەسىكتەرىن كەلۋشىلەرگە ايقارا اشىپ تاستايدى. داۋىسى كوكتە دامىلدايتىن ديماشىمىز تالعامى جوعارى شەتەلدىكتەردى تاعى دا تامساندىرىپ, قۇلاق قۇرىشتارىن قاندىراتىن بولادى. وڭىرلەردەن كەلەتىن ونەرپازدار دا القالاعان الەۋمەتتىڭ الدىندا ايانىپ قالماسى انىق. قالاداعى «قازانات» يپپودرومىندا ۇلتتىق سپورت ويىندارىنىڭ كورىگى قىزادى. ۇلى دالانىڭ ۇلاندارى ات جالىندا اتويلاپ, ءدۇيىم جۇرتتىڭ دەلەبەسىن قوزدىرماق. «قىز قۋ», «تەڭگە ءىلۋ», «جامبى اتۋ», «اۋدارىسپاق» دەيسىز بە, قان قىزدىرار قاپتاعان قىزىقتىڭ ءبارى وسىندا. سونداي-اق, سالبۋرىنشىل ساياتشىلارىمىز قىردىڭ قىزىل تۇلكىسىنە قۇس سالىپ, يت جۇگىرتىپ اڭ اۋلاۋدىڭ ۇزدىك ۇلگىلەرىن ۇسىنباق. ال كوشپەندىلەر وركەنيەتتىڭ كورمەسىندەي ەلورداداعى ەتنواۋىلدىڭ تاماشالارىن ايتىپ تاۋىسا المايسىڭ. ون ەكى قانات اق وردانى اينالا تىگىلگەن كيىز ۇيلەردىڭ ءىشى كىرسەڭ شىققىسىز. قولونەرشىلەر اۋىلى الىستان مەنمۇندالايدى. شىن شەبەرلەردىڭ قولىنان شىققان زەرگەرلىك بۇيىمدار وتكەن تاريحتى قايتا تىرىلتۋىمەن قىمبات. اسىرەسە, ايەلدەردىڭ اشەكەي بۇيىمدارى كوزدىڭ جاۋىن الادى. توقىلعان كىلەم, باسىلعان كيىزدىڭ ءتۇرلى-ءتۇستى ويۋلارى دا امالسىز نازار اۋدارتادى. قىرمىزىداي قۇلپىرعان قىزىل قامزولدى قىزدار بەتىڭىزگە قاراپ انتەك جىميا, قازاقشا, ورىسشا, اعىلشىنشا ءتىل قاتىپ, قالاعان جاعىڭىزعا ءجون سىلتەيدى. ەكسپو پاۆيلونداعىلار بىزگە «ەۆريكالارعا» لايىق ەرەك جوبا-جوسپارلارىن ۇسىنسا, ءبىز ولارعا ءوز ەلىمىزدىڭ ونەگەلى تاريحىن تانىتىپ, سان عاسىرلىق سالت-ءداستۇرىمىزدى جانە باسقا دا ۇلىقتاۋعا تاتيتىن ۇلتتىق قۇندىلىقتارىمىزدى كورسەتىپ قالساق, قۇبا-قۇپ. كورسىن, اردا قازاقتىڭ ارىدەن جەلى تارتقان التىن ارقاۋىنىڭ ءالى ۇزىلمەگەنىن!
تالعات باتىرحان, «ەگەمەن قازاقستان»