«استانا ارلاندارى» بۇكىلالەمدىك بوكس سەرياسىنىڭ فينالىنا شىقتى

بريتاندىق «British Lionhearts» كومانداسىنا قارسى وتكەن جارتىلاي فينالدىڭ العاشقى كەزدەسۋىندە «ارلاندارىمىز» 4:1 ەسەبىمەن جەڭىسكە جەتكەن بولسا, سىرت الاڭداعى قارىمتا كەزدەسۋدە دە 3:2 ەسەبىمەن باسىم ءتۇستى.

لوندوندا وتكەن بوكس كەشىنىڭ شىمىلدىعىن 52 كيلوداعى بىلعارى قولعاپ شەبەرلەرى اشتى. «ارلاندار» ساپىنان العاش شارشى الاڭعا ولجاس ساتتىباەۆ شىعىپ, قارسىلاسى دين فاررەلدى 2:1  ەسەبىمەن ۇتتى. وسىلايشا, «ارلاندار» كەزدەسۋدى جەڭىسپەن باستادى. ەكىنشى كەزدەسۋدە زاكىر سافيۋللين (60 كگ) قارسىلاسى چاد ميلنسدى ەكى راۋندتا ەكى رەت نوكداۋنتقا جىبەرگەن سوڭ, چاد جەكپە-جەكتى جالعاستىرۋدان باستارتتى. 69 كيلو سالماقتا رينگكە شىققان اسلانبەك شىمبەرگەنوۆ «British Lionhearts» كومانداسىنىڭ ۇندىستاندىق لەگيونەرى كۋمار مانودجدان تورەشىلەردىڭ ءبىراۋىز شەشىمىمەن باسىم ءتۇستى.

ال, 81 كيلوداعى ارمان رىسبەك WSB جوباسىنداعى التى جەكپە-جەگىنەن كەيىن ءبىرىنشى رەت جەڭىلىسكە ۇشىرادى. ول توماس ۋيتاككەر-حارتۋدان 1:2 (45:50, 49:46, 45:50) ەسەبىمەن جەڭىلسە, اسا اۋىر سالماقتاعى دەبيۋتانت نۇرسۇلتان امانجولوۆ ءوزىڭ العاشقى جەكپە-جەگىندە ۇتىلىپ قالدى. امانجولوۆ ءۇشىنشى راۋندتا نوكداۋنتقا ءتۇسىپ قالعان سوڭ «ارلاندار» باپكەرى الاڭعا ورامال لاقتىرىپ, كەزدەسۋدەن باس تارتتى.

«استانا ارلاندارى» مەن «British Lionhearts» كوماندالارى اراسىنداعى جارتىلاي فينالدىق كەزدەسۋ 7:3 ەسەبىمەن قازاقستاندىق كوماندانىڭ جەڭىسىمەن اياقتالدى. ارلانداردىڭ فينالداعى قارسىلاسى 10-شى ماۋسىم كۇنى كۋبالىق «Cuba Domadores» پەن كولۋمبيالىق «Colombia Heroicos» جەكپە-جەگىنىڭ جەڭىمپازى بولماق. قوس كلۋب اراسىنداعى جارتىلاي فينالدىڭ العاشقى كەزدەسۋىندە كولۋمبيالىقتار 3:2 ەسەبىمەن باسىم تۇسكەن بولاتىن.

ەسكە سالا كەتسەك, بىلتىرعى ماۋسىمنىڭ جارتىلاي فينالىندا «ارلاندار» ءدال وسى «British Lionhearts» كلۋبىنان ۇتىلىپ, فينالعا شىعا الماي قالعان ەدى.

جەتىنشى ماۋسىمدا «ارلاندار» ازيا ايماعى توبىندا وزبەكستان, رەسەي, قىتاي بوكسشىلارىن جەڭىپ, توپتان ءبىرىنشى ورىنمەن شىققان ەدى. شيرەك فينالدا رەسەيلىك بوكسشىلاردى 7:3 ەسەبىمەن ۇتتى.

ايتا كەتەيىك, «استانا ارلاندارى» WSB جوباسىندا قاتارىنان جەتى ماۋسىم بويى قاتىسىپ كەلە جاتىر. بۇعان دەيىن, ەكى رەت چەمپيون اتانسا, ءبىر رەت كۇمىس جانە ءۇش رەت قولا مەدال يەلەنگەن. بۇكىلالەمدىك بوكس سەرياسىنىڭ فينالدىق كەزدەسۋى قاي ەلدە وتەتىنى جاقىن كۇندەرى بەلگىلى بولادى. دەگەنمەن, فينالدىق كەزدەسۋدى وتكىزۋى مۇمكىن نەگىزگى ۇمىتكەر ەل – قازاقستان. بالكىم, ەحرو-2017 اياسىندا استانادا WSB جوباسىنىڭ فينالىن كورىپ قالۋىمىز مۇمكىن.

فينالدار تاريحى

ءى كەزەڭ (2010-2011 جىل)

1-ورىن: «Paris United» (فرانتسيا)

2-ورىن: «Astana Arlans» (قازاقستان)

3-ورىن: «Baku Fires» (ازەربايجان)

3-ورىن: «Los Angeles Matadors» (اقش)

ءىى كەزەڭ (2011-2012 جىل)

1-ورىن: «Milano Thunder» (يتاليا)

2-ورىن: «Dynamo Moscow» (رەسەي)

3-ورىن: «Astana Arlans» (قازاقستان)

3-ورىن: «Baku Fires» (ازەربايجان)

ءىىى كەزەڭ (2012-2013 جىل)

1-ورىن: «Astana Arlans» (قازاقستان)

2-ورىن: «Ukraine Otamans» (ۋكراينا)

3-ورىن: «Milano Thunder» (يتاليا)

3-ورىن: «Mexico Guerreros» (مەكسيكا)

IV كەزەڭ (2013-2014 جىل)

1-ورىن: «Cuba Domadores» (كۋبا)

2-ورىن: «Baku Fires» (ازەربايجان)

3-ورىن: «Astana Arlans» (قازاقستان)

3-ورىن: «Russia Boxing Team» (رەسەي)

V كەزەڭ (2015 جىل)

1-ورىن: «Astana Arlans» (قازاقستان)

2-ورىن: «Cuba Domadores» (كۋبا)

3-ورىن: «Russia Boxing Team» (رەسەي)

3-ورىن: «Mexico Guerreros» (مەكسيكا)

VI كەزەڭ (2016 جىل)

1-ورىن: «Cuba Domadores» (كۋبا)

2-ورىن: «British Lionhearts» (بريتانيا)

3-ورىن: «Astana Arlans» (قازاقستان)

3-ورىن: «Uzbek Tigers» (وزبەكستان)

ءالي بيتورە

«ەگەمەن قازاقستان»