«بۇگىن ايتۋلى وقيعا بولىپ جاتىر. ءبىز ەڭ ءىرى كۇن ەلەكتر ستانتسياسىنىڭ قۇرىلىسىن باستاپ جاتىرمىز. بۇل ءبىزدىڭ ايماقتىڭ ەكسپو-عا سىيلىعى, - دەدى اشىلۋ سالتاناتى بارىسىندا قاراعاندى وبلىسىنىڭ اكىمى ەرلان قوشانوۆ. – ينۆەستورلارعا, سەرىكتەستەرىمىزگە جوبالارىن جۇزەگە اسىرۋدا قاراعاندى ايماعىن تاڭداعاندارى ءۇشىن العىسىمدى بىلدىرگىم كەلەدى. جاڭارتىلعان ەنەرگيا كوزدەرىن دامىتۋ – ول ەلباسىنىڭ تاپسىرماسى. بۇگىنگى تاڭدا وبلىسىمىزدا ءبىز سول تاپسىرمانى ورىنداۋ ءۇشىن العاشقى قادامدار جاساۋدامىز».
ايماق باسشىسى ۇلكەن دايىندىق جۇمىستارى جاسالعانىن اتاپ ايتتى. قازىرگى ۋاقىتتا زاڭدىق جانە قارجىلىق ماسەلەلەر شەشىلگەن, بارلىق رۇقسات پروتسەدۋرالارى ورىندالدى. كۇن ەلەكتر ستانتسياسىنىڭ قۇرىلىسىنا 160 گا كولەمىندە جەر ۋچاسكىسى بولىنگەن. جوبانىڭ تەحنيكالىق نەگىزدەمەسى قۇرىلىپ, ساراپتاما قورىتىندىسى الىندى. «KEGOC» اق-مەن بىرگە قۋات شىعارۋ نۇسقاسى قۇرىلدى جانە قۇپتالدى, قوسۋدىڭ تەحنيكالىق شارتتارى الىندى.
ء«بىزدىڭ ينۆەستورلار ءۇشىن بۇعان جەتۋدىڭ جولى كۇردەلى جانە ۇزاق بولدى, ولار بەس جىلدان ارتىق ۋاقىت جۇمسادى. بۇل ءىستىڭ لوگيكالىق سوڭى وسى جەردە ورتالىق ازياداعى ەڭ ۇلكەن كۇن ەلەكتر ستانتسياسى ىسكە قوسىلعاندا بولادى»,- دەدى ەرلان قوشانوۆ.
ينۆەستورلاردىڭ ايتۋىنشا قازىرگى ۋاقىتتا قۇرىلىستىڭ باستالۋىنا بارلىعى دايىن. جوبا باستاماشىلارى قازاقستاندا كۇن ەنەرگەتيكاسىن دامىتۋ ءۇشىن بارلىق جاعداي بار دەيدى. قاجەتتى اۋماقتى تاڭداۋدا جەرگىلىكتى بيلىكتىڭ قولداۋى ماڭىزدى ءرول اتقارعان ەكەن.
«بۇل جوبانى ءساتتى جۇزەگە اسىرۋعا بايلانىستى بارلىق نەگىزگى ماسەلەلەر شەشىلگەن. ءبىز بۇگىن كۇن ەلەكتر ستانتسياسىنىڭ قۇرىلىسىن باستادىق, ونى 2018 جىلى اياقتاۋدى جوسپارلاپ وتىرمىز. ءبىزدىڭ ەلەكتر ستانتسيامىز قازاقستاندىقتاردىڭ ءومىر ساپاسىن جوعارىلاتۋعا سەپتىگىن تيگىزەتىنىنە سەنىمدىمىز. بىرىنشىدەن, بۇل «جاسىل» تەحنولوگيالار جانە قورشاعان ورتانى لاستانۋدان ساقتايتىن ءادىس. ەكىنشىدەن, جاڭا جۇمىس ورىندارىنىڭ اشىلۋى», - دەدى جوبانىڭ باس ينۆەستورى يان زوننەنشاين.
ۇكىمەت قاۋلىسىمەن انىقتالعان تۇراقتى باعاعا ەلەكتر ەنەرگياسىن ساتىپ الۋ ەلەكتر ستانتسياسىنا كورسەتىلەتىن مەملەكەتتىك قولداۋ بولىپ ەسەپتەلەدى. ءوز كەزەگىندە ايماعىمىز تىكەلەي شەت ەلدىك ينۆەستيتسيا مەن قوسىمشا تازا ەلەكتر ەنەرگياسىنا قول جەتكىزەدى.
بەلگىلەنگەن جەر اۋماعىندا 370 مىڭ كۇن پانەلدەرى ورناتىلادى. ءبىر جىلدىق ەلەكتر ەنەرگياسىنىڭ ءوندىرىس كولەمى 145 ملن كۆت/س قۇرايدى. ستانتسيانىڭ قۋاتتىلىعى - 100 مۆت. سالىستىرار بولساق, ساران قالاسى 10 ەسە ازىراق قۋات جۇمسايدى.
«بۇل قۇرىلىستى ءبىز نەگىزى 2014 جىلى دايىنداي باستادىق. سول ۋاقىت ارالىعىندا قازاقستان «جاڭارتىلعان ەنەرگيا كوزدەرى تۋرالى» زاڭ قابىلدادى. ەۋروپالىق وداق تاراپىنان قولداۋ تاپتىق. جوبانى جۇزەگە اسىرۋدا قاراعاندى وبلىسى كەزدەيسوق تاڭدالعان جوق. بۇل ءىرى وندىرىستىك ايماق, مۇندا جاقسى ەڭبەك رەسۋرستارى مەن قاجەتتى نەگىزدار بار», - دەيدى باس عىلىمي كەڭەسشى, قازاقستان مەن قىرعىزستانداعى سلوۆاكيانىڭ بۇرىڭعى توتەنشە جانە ۋاكىلەتتى ەلشىسى دۋشان پودگورسكي.
ميراس اسان,
«ەگەمەن قازاقستان»
قاراعاندى وبلىسى