«مادەني مۇرا جانە قازىرگى رۋحاني جاڭعىرۋ» اتتى شىعارماشىلىق كەزدەسۋ ءوتتى 

وسى كەزدەسۋ شەڭبەرىندە قر پرەزيدەنتى ن.ءا.نازارباەۆتىڭ باعدارلامالىق ماقالاسىنىڭ نەگىزگى يدەولوگيالىق باعىتتارىن تالقىلاپ, رۋحاني جاڭعىرۋ جانە قازاقستان حالىقتارىنىڭ الداعى ۋاقىتتاعى مادەنيەتىنىڭ دامۋى تۋرالى كەلەلى ويلار ايتىلدى.  اكادەميك, فيلوسوفيا عىلىمدارىنىڭ دوكتورى, پروفەسسور ا.ن.نىسانباەۆ «مادەني مۇرا» باعدارلاماسى اياسىندا شىققان الەمدىك  فيلوسوفيا ەڭبەكتەرىنىڭ ماڭىزدىلىعىنا توقتالىپ, سونىمەن قوسا قازاق فيلوسوفياسىن دا الدىڭعى قاتارلى زەرتتەۋ ەڭبەكتەرىنە ەنگىزىپ, وز دارەجەسىندە زەرتتەۋ كەرەكتىگىن ايتتى. فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورىنىڭ مىندەتىن اتقارۋشى, فيلوسوفيا عىلىمدارىنىڭ دوكتورى, پروفەسسور س.ە.نۇرمۇراتوۆ; ءال-فارابي اتىنداعى قازۇۋ فيلوسوفيا جانە ساياساتتانۋ فاكۋلتەتىنىڭ پروفەسسورى, فيلوسوفيا عىلىمدارىنىڭ دوكتورى ت.ح.عابيتوۆ, فيلولوگيا عىلىمدارىنىڭ كانديداتى, دوتسەنت ت. الىبەك ءسوز سويلەپ, ەلباسى ماقالاسىنداعى عىلىم, بىلىمگە قاتىستى تارماقتاردى جان-جاقتى سارالاپ, سوڭعى ءسوز اسىقپاي, ميزانداپ شەشىم شىعارۋدى ۇسىندى. قازىرگى كەزدە قازاق عىلىمى, فيلوسوفياسى قارقىندى زەرتتەۋلەردى قاجەت ەتەدى. توقتاپ قالماسا دا, تولىق, تۇبەگەيلى زەرتتەۋلەر جۇرگىزىلمەگەندىكتەن, الەمگە اۋدارىلار قازاق كىتاپتارىن دا ۇزاق تالقىدان وتكىزۋگە تۋرا كەلەدى. ال الەمگە سىنار قازاق رۋحانياتىندا شىن مانىندە لايىقتى شىعارمالار كوپ-اق. ول مەيلى حالىق اۋىز ادەبيەتى ۇلگىلەرىنەن بولسىن, اۆتورلار شىعارماشىلىعىنان بولسىن, سولاي ايتۋعا ابدەن بولادى.  «مادەني مۇرا» باعدارلاماسى اياسىندا شىعارىلعان ءجۇز تومدىقتاردىڭ بارى ۋنيۆەرسيتەت كىتاپحانالارىنا تۇسكەن. بۇل مەملەكەت تاراپىنان جاسالعان ۇلكەن كومەك, عالىمداردىڭ ەڭبەگى. الەم فيلوسوفياسىنىڭ ءجۇز تومدىعىن اۋدارعان عالىمداردىڭ ەڭبەكتەرىن دە جوققا شىعارۋعا بولمايدى. بىراق سول اۋدارىلعان ءجۇز تومدىقتىڭ ءبارى ءوز دەڭگەيىندە كاسىبي تۇردە اۋدارىلماعانى انىق. ەلباسىنىڭ باعدارلامالىق ماقالاسىنداعى تاپسىرمالارى ناۋقانعا اينالىپ كەتپەي, ناقتى ۇزدىك شىعارمالار ۇسىنىلىپ, تىڭعىلىقتى جۇمىستار ىستەلۋى ءتيىس. ەشقانداي كوزبوياۋشىلىق ارەكەتتىڭ ورىن الماۋى قازىرگى كۇنى باستى نازاردا. بۇل «جاڭا 100 ەسىمگە» دە, التى تىلگە اۋدارىلاتىن قازاق شىعارمالارى مەن قازاقشا اۋدارىلاتىن شەتەل كىتاپتارىنا دا قاتىستى ماسەلە. عالىمدار ۇسىنىستارىن مينيسترلىككە جولداپ, ءارتۇرلى باس قوسۋلار مەن جيىنداردا ءوز ويلارىن ورتاعا سالىپ, ەلباسى ماقالاسىنداعى تاپسىرمالارعا  اتسالىساتىندارىن ءبىلدىردى. 

باعاشار تۇرسىنباي ۇلى  «ەگەمەن قازاقستان»,  الماتى