دوڭگەلەك ۇستەل جۇمىسىنا بەلگىلى وتاندىق ساراپشىلار مەن ساياساتتانۋشىلار قاتىستى. ولاردىڭ قاتارىندا: ايدار امىرەباەۆ – قولدانبالى ساياساتتانۋ جانە حالىقارالىق زەرتتەۋلەر ورتالىعىنىڭ جەتەكشىسى; ايدوس سارىم − ساياساتتانۋشى; رۇستەم قادىرجانوۆ – قر بعم عك فيلوسوفيا, ساياساتتانۋ جانە ءدىنتانۋ ينستيتۋتى ساياساتتانۋ ءبولىمىنىڭ ەتنوساياسي زەرتتەۋلەر سەكتورىنىڭ مەڭگەرۋشىسى; قانات نۇروۆ − «اسپانداۋ» قورىنىڭ پرەزيدەنتى; ءبورىحان نۇرمۇحامەدوۆ − ساياساتتانۋشى; داۋرەن ساكەن ۇلى − «رەيتينگ.KZ» زەرتتەۋ اگەنتتىگىنىڭ ديرەكتورى بولدى. دوڭگەلەك ۇستەلگە قاتىسۋشىلار مەملەكەت باسشىسىنىڭ «رۋحاني جاڭعىرۋ: بولاشاققا باعدار» باعدارلامالىق ماقالاسى اياسىندا قازاقستانداعى ۇلتتىق بىرەگەيلىكتى قالىپتاستىرۋ مەن جانداندىرۋ جانە جۇزەگە اسىرۋ ماسەلەلەرىن, سونىمەن قاتار, بۇل پروتسەسكە اسەر ەتەتىن فاكتورلاردىڭ الدىن الۋدى تالقىلادى. ساراپشىلاردىڭ ايتۋىنشا, ۋربانيزاتسيا مەن مادەني جاھاندانۋ پروتسەستەرىنە بايلانىستى وزگەرىپ وتىراتىن قوعام مەن قوعامدىق سانانىڭ داعدىلانۋى الەۋمەتتىك-ەكونوميكالىق جەتىستىكتىڭ ماڭىزدى كورسەتكىشى بولىپ تابىلادى. سونداي-اق, قاتىسۋشىلار ۇلتتىق مادەني كود پەن ۇلتتىق بىرەگەيلىكتى ساقتاۋ, ۇلتتىق سانانىڭ ءارتۇرلى پوليۋستەرىن كەلىستىرۋ دە وتە ماڭىزدى شارت ەكەنىن اتاپ ءوتتى. جالپى, پىكىرتالاسقا قاتىسقان ماماندار ءبىزدىڭ قوعامعا قاتىستى جاڭعىرتۋ جۇمىستارى قالاي جۇزەگە اساتىنىن ءالى دە تۇبەگەيلى زەرتتەۋ كەرەكتىگىن ايتتى. ولاردىڭ سوزىنشە, ۇلتتىق بىرەگەيلىككە قاتىستى جاڭعىرتۋ پروتسەسى بارىسىندا تۋىندايتىن ىشكى جانە سىرتقى سىن-تەگەۋرىندەرگە كوپ كوڭىل ءبولۋ كەرەك. اتاپ وتەيىك, اەسي پىكىرتالاس الاڭى ەلباسىنىڭ ستراتەگيالىق يدەيالارىن ناسيحاتتاۋ مەن ولاردى جۇزەگە اسىرۋداعى تاجىريبەلەردى قالىپتاستىرۋ ماقساتىندا جۇمىس ىستەپ كەلەدى.
تالعات ءسۇيىنباي, «ەگەمەن قازاقستان»
الماتى