جاڭا عيماراتتىڭ اشىلۋ سالتاناتىنا كولىكتەگى ىشكى ىستەر دەپارتامەنتىنىڭ باسشىلارى مەن جەكە قۇرامى, سونداي-اق ىشكى ىستەر ورگاندارىنىڭ ارداگەرلەرى قاتىستى. عيمارات الدىنداعى ساپتىق الاڭدا ۇلتتىق ۇلان وركەسترىنىڭ سۇيەمەلدەۋىمەن سالتاناتتى شەرۋ وتكىزىلدى. بۇدان سوڭ جاڭا عيماراتتىڭ نىشاندىق كىلتى ءجىىب-ءنىڭ باسشىلىعىنا تاپسىرىلدى. – مەملەكەت باسشىسى مەن ۇكىمەتتىڭ قولداۋى ناتيجەسىندە ىشكى ىستەر ورگاندارىنىڭ ماتەريالدىق-تەحنيكالىق جاعدايى جىلدان جىلعا جاقسارىپ كەلەدى. بۇگىن, مىنە, كولىك پوليتسياسى استانا اۋەجايىندا ءجىىب-ءنىڭ بارلىق قاجەتتىلىكتەرگە جاۋاپ بەرە الاتىن جاڭا قىزمەتتىك باسپاناسىنا قول جەتكىزىپ وتىر,– دەپ مالىمدەدى ىشكى ىستەر ءمينيسترى سالتاناتتى شارادا. ق.قاسىموۆ ءوز سوزىندە حالىقارالىق ەكسپو-2017 كورمەسىن وتكىزۋ قارساڭىندا ەلوردانىڭ اۋەجايى مەن ۆوكزالدارىنا شەتەلدىك قوناقتار جانە ەلىمىزدىڭ تۇرعىندارى كوپتەپ كەلەتىنىن اتاپ ءوتتى. سوندىقتان استاناعا جولى تۇسكەن قوناقتار وزدەرىن جايلى ءارى قاۋىپسىز سەزىنۋلەرى ء ۇشىن كولىك پوليتسياسىنا جۇكتەلەر جاۋاپكەرشىلىك جۇگى اۋىر. اتاپ وتەر جايت, استانا قالاسىنىڭ اۋەجايى تاۋلىگىنە 10 مىڭنان استام جولاۋشى قابىلدايدى, ال مەرەكە كۇندەرى بۇل كورسەتكىش ەكى ەسەگە كوبەيەدى. اۋەجايعا كۇنىنە 160 جولاۋشى ۇشاعى ۇشىپ-قونادى. سوعان بايلانىستى ەلىمىزدىڭ كولىك پوليتسياسى قۇقىق بۇزۋشىلىقتىڭ الدىن الۋعا جانە ازاماتتاردىڭ قاۋىپسىزدىگىن قامتاماسىز ەتۋگە ايرىقشا كوڭىل بولەدى. مينيستر جاڭا عيماراتتى ارالاپ, ىشكى جابدىقتارىمەن, سونداي-اق, كولىك پوليتسياسىنىڭ قىزمەت اتقاراتىن ورىندارىمەن تانىسىپ شىقتى. سودان سوڭ كولىكتەگى ىشكى ىستەر دەپارتامەنتى مەن بولىمشەلەرىنىڭ جەكە قۇرامى الداعى ۋاقىتتا دا ازاماتتاردىڭ قۇقىعى مەن مۇددەلەرىن لايىقتى قورعاپ, ولاردىڭ كولىكتەگى قاۋىپسىزدىگىن جوعارى دەڭگەيدە قامتاماسىز ەتەتىنىنە سەنىم ءبىلدىردى. جەلىلىك ىشكى ىستەر ءبولىمىنىڭ جاڭا عيماراتى ەكسپو-2017 كورمەسىنە دايىندىق جانە ونى وتكىزۋ كەزىندەگى قاۋىپسىزدىك پەن قۇقىقتىق ءتارتىپتى قامتاماسىز ەتۋ ءىس-شارالارى جوسپارى اياسىندا سالىندى.
نۇرلىبەك دوسىباي, «ەگەمەن قازاقستان»