اتىراۋدا «بالا داۋىسى-2017» ۇلتتىق بالالار ءان بايقاۋىنىڭ ىرىكتەۋ كەزەڭى ءوتتى. 7 مەن 13 جاس ارالىعىنداعى ونەرلى ورەندەر قۇرمانعازى اتىنداعى مادەنيەت سارايىن اسەم انگە بولەدى. ءاليا نازارباەۆانىڭ «جاندانۋ الەمى» جەكەمەنشىك قورى مەن قازاقستان رەسپۋبليكاسىنىڭ تۇڭعىش پرەزيدەنتى ەلباسى قورى, قر مادەنيەت جانە سپورت مينيسترلىگىنىڭ قولداۋىمەن باستاۋ العان بۇل بايقاۋعا بالالاردىڭ قىزىعۋشىلىعى جوعارى. «ىرىكتەۋ كەزەڭىنە 107 بالا قاتىستى. ولاردىڭ اراسىندا الىس اۋىلداردان ارنايى كەلگەندەر دە بار», - دەيدى جوبا مەنەدجەرى ءاليا سىزدىقوۆا.
جۇلدىزدى تالىمگەر اتىراۋداعى ەڭ جارقىن داۋىستى تاڭداۋ ءبىراز قيىنعا سوققانىن ايتادى. جۇزدەن استام ونەرپازدىڭ اراسىنان ءبىر عانا جۇلدەگەر رەسپۋبليكالىق كەزەڭگە جولداما الادى. دىنمۇحاممەد نۇرقاباەۆ سول بيىكتەن كورىندى. اتىراۋ قالاسىنداعى «فانتازيا» ۆوكال ستۋدياسىندا ءدارىس الاتىن دىنمۇحاممەدتىڭ جاسى 12-دە. ءان ايتىپ قانا قويمايدى, فورتەپيانودا شەبەر وينايدى.
«وتكەن جىلى دا وسى بايقاۋعا قاتىسىپ, العاشقى ۇشتىكتەن كورىنىپ ەدىك. بيىل جەڭىسكە جەتەتىنىمىزگە سەنىمدى بولدىق. دىنمۇحاممەد مۋزىكا مەكتەبىنە بارادى. ونىڭ بار ارمان-ماقساتى ونەرمەن بايلانىستى» - دەيدى اناسى جاننا. ەندى دىنمۇحاممەد الماتى قالاسىندا وتەتىن بايقاۋدىڭ فينالىندا سەرىك يبراگيموۆپەن بىرگە ءان سالادى.
باقىتگۇل باباش,
«ەگەمەن قازاقستان»
اتىراۋ.