العاشقىدا 70 شاقتى شاكىرت تاربيەلەگەن مەكتەپ-مەدرەسە بۇگىندە 2 مىڭعا جۋىق وقۋشىعا ءبىلىم بەرەتىن مەكتەپ-گيمنازياعا اينالىپ وتىر. ءبىر عاسىردان استام ۋاقىت جاس ۇرپاقتى ءبىلىم نارىمەن سۋسىنداتقان قاراشاڭىراق سوڭعى قوڭىراۋ مەرەكەسىندە تۋعان بالالارىنداي تۇلەكتەرىن باۋىرىنا جينادى. ولاردىڭ اراسىندا پەداگوگيكا سالاسىنىڭ بەلگىلى ارداگەرلەرى دامەش ومىربەكقىزى وسى مەكتەپتى 55 جىل بۇرىن بىتىرسە, اياش جۇماعۇلوۆ, وسپان سۇلەيمەنوۆ ەسىمدى ارداگەرلەر وقۋ ورداسىن جارتى عاسىر بۇرىن اياقتاعان ەكەن. ەڭ عاجابى, سوڭعى قوڭىراۋ سىڭعىرىن ەستۋگە مەكتەپتىڭ 80 جىل بۇرىنعى تۇلەگى ۇكىجان سادۋاقاسقىزىنىڭ قاتىسۋى بولدى. 1937-1941 جىلدارى اتالعان مەكتەپتە ءبىلىم العان 95 جاستاعى قاريا – اسىلدىڭ سىنىعى, سادۋاقاس قاجى عىلمانيدىڭ قىزى. جاز جايناتىپ, كۇن كۇلدىرىپ, ءبىز لاگەرگە بارامىز, اسىل جىبەك – گۇل ۇستىندە, اۋناپ, ويناق سالامىز, دەپ اندەتكەن اجەي قۇلدىراڭداعان وقۋشى كۇنىندەگى جاتتاعان جىر جولدارىن ءالى دە جاتقا ايتاتىن جادى سەرگەك جان بولىپ شىقتى. سارىارقا توسىندەگى العاشقى مەكتەپتە وقىعان وقۋشى قىزداردىڭ شاشى توبىعىنان دا اسىپ, شۇباتىلىپ جاتاتىنىن, وسى ۇزىن شاشقا اق بانتيك تاققاندارىن, سيسا كويلەكتەرىن تۇندە جۋىپ, كۇندىز كيىپ الاتىنىن ايتقان اجەي مەكتەپتە ۇزدىك وقىعانىن جەتكىزدى. – جاقسى وقيتىن بالالاردى مۇعالىمدەر دە جاقسى كورەتىن, – دەيدى كەيۋانا. حح عاسىردىڭ باسىندا ارقا توسىندەگى وقىعان ازاماتتاردىڭ ءوز كۇشتەرىمەن تۇرعىزعان قىزدار مەدرەسەسىنىڭ عيماراتى استانادا بۇگىنگە دەيىن ساقتالعان. بۇل عيماراتتى سالۋعا سول زاماننىڭ دەگدار ازاماتتارىنىڭ ءبىرى, اكەسى سادۋاقاس قاجى عىلماني دا ۇلەس قوسقانىن اڭگىمەلەگەن اجەي ءوزىنىڭ ناعيما ءلاتيپوۆا ەسىمدى قىزبەن ءبىر پارتادا وتىرعانىن, ول ۋاقىتتا قارا پارتانىڭ وقۋلىق قوياتىن, اشىلىپ, جابىلاتىن قاقپاعى بولعانىن, سونداي-اق, سيا تولى ءداۋىتتىڭ بالا بىتكەننىڭ ءۇستى-باسىنا توگىلىپ, بارشاسىنىڭ سيا-سيا بولىپ جۇرەتىنىن جەتكىزدى. سەكسەن جىلدان كەيىن ءوزى وقىعان ءبىلىم ورداسىنداعى سوڭعى قوڭىراۋ سىڭعىرىن ەسىتكەن قاريا وسكەلەڭ ۇرپاققا باتاسىن بەرىپ, جاڭا ومىرگە قادام باسقان تۇلەكتەرگە اقجول تىلەدى.
دۋمان اناش, «ەگەمەن قازاقستان»