دەسەك تە, تاريحي نىسانعا باراتىن جولدىڭ جوقتىعى وسى ۋاقىتقا دەيىن جانعا باتىپ كەلگەن ەدى. وسى ماسەلەگە وراي مەكەمە باسشىسى ت.مولداقىنوۆ جوعارى بيىك مىنبەرلەردەن تالاي مارتە ماسەلە ەتىپ كوتەرىپ كەلگەن بولاتىن. كوتەرىلگەن ماسەلە وتكەن جىلى وڭ شەشىمىن تاۋىپ, جامبىل وبلىسىنىڭ اكىمى ك.كوكىرەكباەۆتىڭ تىكەلەي ارالاسۋىمەن بۇگىندە قالاشىققا اپاراتىن جول قۇرىلىسى قىزۋ جۇرگىزىلۋدە. وسىلايشا بىلتىرعى قاراشا ايىندا اقىرتاسقا اپاراتىن جولدىڭ قۇرىلىسى باستالىپ تا كەتتى. بۇگىندە مەردىگەر قۇرىلىسشىلار 7,1 شاقىرىمدى قۇرايتىن جول جابىنىن (اسفالت) توسەۋ جۇمىستارىن جۇرگىزۋدە. – ساناۋلى كۇندەردە باستالعالى وتىرعان حالىقارالىق «ەكسپو-2017» كورمەسىنە كەلەتىن تۋريستەردىڭ, تاريحى تەرەڭدە جاتقان كيەلى وڭىرىمىزگە دە اتباسىن بۇراتىنى ءسوزسىز. وسىعان وراي, قۇرىلىس قارقىنىن جەدەلدەتىپ, جول جوندەۋ جۇمىستارىن ۇستىمىزدەگى جىلدىڭ 5 ماۋسىمىنا دەيىنگى ارالىقتا, مەرزىمىنەن بۇرىن اياقتايمىز دەپ جوسپارلاپ وتىرمىز, – دەيدى جول سالۋشى ماماندار. قازىرگى تاڭدا جول بويىندا تەمىر-بەتون قۇبىرلارىن ورناتۋ جۇمىستارى اياقتالىپ, اسفالت توسەۋ جۇمىستارى باستالۋدا. جۇمىسشى كۇشى مەن تەحنيكا جەتكىلىكتى. قاراجات تا ۋاقتىلى اۋدارىلۋدا. جولدىڭ ساپاسىن باقىلاۋشى كومپانيالار جولدى ءوز نازارلارىندا ۇستاپ وتىر. ەسكە سالا كەتەيىك, بۇعان دەيىن قالاشىقتىڭ نەگىزگى بولىگىندە ەجەلگى قالاشىق اۋماعىن ارالايتىن ىشكى اربات جيەكتەرى قايتا جوندەلىپ, رەتكە كەلتىرىلگەن بولاتىن. كەشەندە اتقارىلىپ جاتقان قايتا جاڭعىرتۋ, اباتتاندىرۋ جۇمىستارىنىڭ بارلىعى دەرلىك «ەكسپو-2017» حالىقارالىق كورمەسىنە ازىرلىك اياسىندا جاندانا تۇسۋدە. تۋريستىك باعىت تىزبەسىنە ەنگەن تاريحي نىسان وسىلايشا مەيمانداردى جاڭا بەت-بەينەسىمەن قارسى الماق.
الماس مۇحتاروۆ