بۇل رەتتە رۋحاني جاڭعىرۋدى ماقسات تۇتقان ازاماتتار مەملەكەتتىڭ كورسەتىپ وتىرعان قامقورلىعىن جەتە سەزىنىپ, مۇمكىندىگىن بارىنشا پايدالانا الادى. اسىرەسە اۋىل تۇرعىندارىنا بۇل ماسەلە توڭىرەگىندە كوپ كوڭىل ءبولىنىپ وتىر.
بۇگىندە جۇمىسسىز جاستاردىڭ دا قوعامنان ءوز ورنىن تابۋىنا اتسالىسۋ ۇلكەن مىندەت بولىپ سانالادى. سونداي-اق, مۇمكىندىگى شەكتەۋلى ازاماتتارعا جانە كاسىبىن اشۋعا نيەتتى جاستارعا قولداۋ كورسەتۋ دە ازاماتتىق پارىز. ال ەل بولعان سوڭ, حالىق اراسىندا ءتۇرلى سالالارعا بايلانىستى تۇرلى سۇراقتاردىڭ تۋىنداۋى زاڭدىلىق. وسى ورايدا, جامبىل وبلىستىق پروكۋراتۋراسى مەن وبلىستىق جاستار ساياساتى ماسەلەلەرى باسقارماسىنىڭ ۇيىمداستىرۋىمەن وبلىستىڭ بارلىق اۋدان ورتالىقتارى مەن ەلدى-مەكەندەرىندە, بارلىق ساناتتاعى جاستار مەن تۇرعىندارعا ءتۇرلى سالا اياسىنداعى ماسەلەلەر بويىنشا قولداۋ كورسەتۋ ماقساتىندا 15-26 مامىر ارالىعىندا «رۋحاني جاڭعىرۋ!» اتتى اۆتوكەرۋەن جولعا شىعىپ, كەڭ اۋقىمدى تۇسىندىرۋ جۇمىستارىن جۇرگىزگەن بولاتىن. ونىڭ ىشىندە «ديپلوممەن اۋىلعا», «سەرپىن», «بيزنەستىڭ جول كارتاسى» سياقتى باعدارلامالار دا قوسىمشا ءتۇسىندىرىلىپ, كاسىپكەرلىك, اۋىلشارۋاشىلىق, ءدىن سالالارى بويىنشا قابىلداۋلار وتكىزىلگەن. اتالعان شارا اپتا باسىندا تاراز قالاسىندا جالعاسىن تاپتى.
تاراز قالاسىنداعى «دوستىق» الاڭىندا ۇيىمداستىرىلعان شاراعا وبلىس پروكۋرورى ەرنات سىبانقۇلوۆ, وبلىس اكىمىنىڭ ورىنباسارى ەرقانات مانجۋوۆ قاتىسىپ, ءسوز سويلەدى. ەلباسىنىڭ باعدارلامالىق ماقالاسىندا اتاپ كورسەتىلگەن قۇندى قاعيدالاردىڭ بارىنە توقتالىپ, ەل دامۋىنىڭ نەگىزگى كەپىلى رۋحاني جاڭعىرۋ ەكەنىن اڭگىمەلەدى. سونىمەن قاتار, شارا بارىسىندا تاراز قالاسىنىڭ اكىمى رۇستەم داۋلەت مۇگەدەك بالا اسىراۋشى مايرا ابدۋاليەۆا مەن مۇعالىم بولىپ ەڭبەك ەتەتىن انار اتاباەۆاعا پاتەر كىلتىن تابىس ەتتى.
سونداي-اق, اۋليەاتالىق كاسىپكەرلەر, سەرىكتەستىك باسشىلارى دا ەلباسى ماقالاسىندا ايتىلعان قاعيدالارعا قولداۋ ءبىلدىرىپ, بىرقاتار ازاماتتارعا سىي-سياپات تابىستادى. شارا بارىسىندا كەلگەن كوپشىلىككە اقپاراتتىق-ادىستەمەلىك ماتەريالدار ۇلەستىرىلىپ, ماستەر-كلاسستار, جەكە قابىلداۋلار مەن كەزدەسۋلەر ۇيىمداستىرىلدى.
حاميت ەسامان,
«ەگەمەن قازاقستان»
جامبىل وبلىسى