بيىلعى جىلدىڭ ءبىرىنشى توقسانىندا ەلىمىزدە قۇرىلىس سالۋعا جانە تۇرعىن ءۇي ساتىپ الۋعا بەرىلگەن زاەمداردىڭ كولەمى 65 ميلليارد تەڭگە بولدى. سونىڭ 49 ملرد. تەڭگەسى قتقجب-عا تيەسىلى. سونىمەن قاتار, بانك باسقا ەدب اراسىندا كرەديت قورجىنىنىڭ ەڭ جوعارى ساپاسىنا يە. NLP دەڭگەيى (اعىلشىن تىلىندە non-performing loan, سوزبە-ءسوز - «جۇمىس ىستەمەيتىن قارىز») 0,49%-دى قۇرايدى, دەپ حابارلايدى بانكتىڭ ءباسپاسوز قىزمەتى.
بانكتىڭ باسقارما ءتورايىمى ءلاززات يبراگيموۆا دەپوزيت قورجىنىنىڭ ارتقانى جايىندا ءسوز ەتتى. قازىرگى كەزدە ول 455 ملرد. تەڭگەگە تەڭ. ءوسىم حالىقتىڭ بانككە دەگەن سەنىمىنىڭ ارتۋىنا, سونىڭ ىشىندە تۇرعىن ءۇي قۇرىلىس جيناق شارتىن جاساۋ ءۇشىن جانە ونىڭ شارتتىق سوماسىن ۇلعايتۋعا ۇستالىناتىن كوميسسيالىق الىمداردىڭ الىنىپ تاستالىنۋىنا, ۇلتتىق ۆاليۋتانى تۇزەتۋگە وراي 20,1 ميلليارد تەڭگە وتەماقى تولەۋگە, سونداي-اق تۇرعىن ءۇي قۇرىلىس جيناق سالىمدارىنا جىل سايىنعى مەملەكەت سىيلىقاقىسىنىڭ تۇسۋىنە بايلانىستى. سونداي-اق, 2016 جىلعى 2014-2013 جىلدارعا ارنالعان بانكتىڭ ۇزاق مەرزىمدى ستراتەگياسىن ورىنداۋ ەسەبى بەكىتىلىپ, قاراستىرىلدى. وعان سايكەس, ەسەپتىك كەزەڭ ىشىندە كليەنتتەرگە قىزمەت كورسەتۋ ۋاقىتى ەلەۋلى تۇردە قىسقاردى. وسىلايشا, شارت جاساۋ ۋاقىتى 5 ەسەگە – 30 مينۋتتان 7 مينۋتقا دەيىن ازايدى. كرەديتتىك ءوتىنىم 4,5 ەسە تەز قارالا باستادى. قازىر بۇعان نەبارى 1,5 كۇن جەتكىلىكتى, سالىستىرا كەتسەك, 2013 جىلى وسى وپەراتسياعا 7 كۇن ۋاقىت كەتەتىن ەدى. وڭتايلاندىرۋ ءىت سالاسىندا جاڭا باعدارلامالىق ونىمدەردى ەنگىزۋدىڭ ارقاسىندا مۇمكىن بولىپ وتىر.
سايكەسىنشە, قىزمەت كورسەتۋ ۋاقىتىنىڭ قىسقارۋى كليەنتتەردىڭ كورسەتىلگەن قىزمەت ساپاسىنا قاناعاتتانۋى دەڭگەيىن ارتتىردى. 1-ءشى توقساننىڭ قورىتىندىسى بويىنشا, بۇل كورسەتكىش 99,17% بولدى.
سونداي-اق, ديرەكتورلار كەڭەسىنىڭ وتىرىسىندا 2016 جىلعا ارنالعان جىلدىق ەسەپ قاراستىرىلىپ, بەكىتىلدى. وعان سايكەس, بانك ەسەپتىك كەزەڭ ىشىندەگى قىزمەتتىڭ بارلىق نەگىزگى جوسپارلى كورسەتكىشتەرىنە جەتكەن. 2016 جىلدىڭ قورىتىندىسى بويىنشا, قتقجب قازاقستاندىق يپوتەكانىڭ ۇشتەن ەكىسىن بەرگەن (بەرىلگەن يپوتەكالىق زاەمداردىڭ كولەمى بويىنشا ۇلەسى – 67%). تۇرعىن ۇيلەردى 25 مىڭ ادام ساتىپ الدى.
بۇدان بولەك, 2017 جىلعى 1 ساۋىردەگى جاعداي بويىنشا, 2014-2018 جىلدارعا ارنالعان قتقجب دامۋ جوسپارىنىڭ ورىندالۋى تۋرالى, بيۋدجەتتىڭ جانە تابىستىلىق كورسەتكىشتەرىن, سونداي-اق بىرقاتار ىشكى قۇجاتتار مەن ەسەپتەردى ورىنداۋ تۋرالى ەسەپ قاراستىرىلىپ, بەكىتىلدى.