فورۋمنىڭ اشىلۋ سالتاناتىندا قىزىلوردا وبلىسى اكىمى قىرىمبەك كوشەرباەۆ جانە «دامۋ» قورىنىڭ باسقارما توراعاسى اباي سارقۇلوۆ ءسوز سويلەدى, دەپ حابارلايدى "دامۋ" قورىنىڭ ءباسپاسوز قىزمەتى.
ءىس-شارا بارىسىندا وبلىس اكىمى قىرىمبەك كوشەرباەۆ مەملەكەتتىك باعدارلامالار مەن «دامۋ» قورىنىڭ جوبالارىنا قاتىسىپ, ءوز جوبالارىن ءساتتى جۇزەگە اسىرا بىلگەن ەرەكشە مۇمكىندىكتەگى كاسىپكەرلەرگە العىس حاتتار تابىستادى. سونداي-اق, «دامۋ-كومەك» جوباسى بويىنشا دەمەۋشىلىك كومەك تە تابىستالدى. ءىس-شارا قوناقتارى-تابىستى كاسىپكەرلەر, فورۋم قاتىسۋشىلارىن نازاردان تىس قالدىرماي, ولارعا قىزمەت كورسەتۋ مەن تاۋار ساتىپ الۋعا تەگىن سەرتيفيكاتتار سىيلادى.
فورۋم اياسىندا مۇگەدەكتىگى بار كاسىپكەرلەردىڭ قولىنان شىققان ءتۇرلى تاۋار مەن ونىمدەر جانە قىزمەت تۇرلەرىنە كورمە ۇيىمداستىرىلدى. 20-دان اسا كومپانيا كورمەدە كادە سىيلاردان قۇرىلىس زاتتارىنا دەيىنگى الۋان ءتۇرلى ونىمدەر ۇسىندى. ولاردىڭ ىشىندە — ايماقتا باسەكەلەسى جوق, بولات ارقان مەن ىلمەكتەر شىعاراتىن جالعىز كاسىپكەر ەرنىس تۇلەنديەۆ تە بولدى. ول نەسيە راسىمدەۋ بارىسىندا كەپىلمۇلكى جەتىسپەۋشىلىگى ماسەلەسىن قوردىڭ كەپىلدەندىرۋىمەن وڭ شەشۋى ارقىلى, كاسىپورىننىڭ ءوندىرىس كولەمى ەداۋىر ارتتىرا الدى.
«فورۋمنىڭ باستى ماقساتى – مۇمكىندىگى شەكتەۋلى كاسىپكەرلەر اراسىندا تابىستى كاسىپكەرلىكتى دارىپتەۋ جانە ونىڭ دامۋىنا كولايلى جاعداي جاساۋ. بۇگىنگى ءىس-شاراعا قاتىسۋشىلار - تاعدىردىڭ تاۋقىمەتىنە مويىماي, قوعامدا ءوز ورنىن تابا بىلگەن جانە ءوزىن جۇمىسپەن قامتۋمەن شەكتەلمەي, وزگەنى دە تۇراقتى قىزمەتكە الىپ, كاسىپتەرىن دوڭگەلەنتىپ وتىرعان ازاماتتار. مۇمكىندىگى شەكتەۋلى ازاماتتاردى جۇمىسقا ورنالاستىرۋ قاشاندا وزەكتى ماسەلە ەكەنى راس, ال مۇنىڭ بالاماسى كاسىپكەرلىك بولىپ تابىلادى. سوندىقتاندا بىزدەر مەملەكەتتىك ورگاندار, قارجى ۇيىمدارى مەن تابىستى كاسىپكەرلەردىڭ باسىن بىرىكتىرە وتىرىپ, مۇمكىندىگى شەكتەۋلى كاسىپكەرلەرگە اتاۋلى كومەك كورسەتۋگە بەلسەندىرۋ مەن تالپىندىرۋدى ۇيىمداستىرا ءبىلۋىمىز قاجەت. بۇگىنگى فورۋم مۇگەدەكتىگى بار ازاماتتار مەن تابىستى كاسىپكەرلەر اراسىندا تاجىريبە الماستىرۋ ماقساتىنداعى ماڭىزدى, ءارى ءتيىمدى ديالوگتىك الاڭ رەتىندە قالىستاستى دەپ ۇمىتتەنەمىن», - دەدى «دامۋ» قورىنىڭ باسقارما توراعاسى اباي سارقۇلوۆ.
فورۋم بارىسىندا بي نومىرىمەن «قىزىلوردا ەرىكتىرىلەرى» قورىنىڭ مۇشەلەرى «ەرەكشە بي» جوباسىمەن قاتىسۋشىلاردى تامساندىردى. بيشىلەر قۇرامىنىڭ تەڭ جارتىسى ءوزىنىڭ پارتياسىن مۇگەدەكتىك اربادا وتىرىپ ورىندادى.
فورۋمنىڭ ەكىنشى بولىمىندە اقپاراتتىق-تۇسىندىرمە سەمينارى, دوڭگەلەك ۇستەل مەن مۇمكىندىگى شەكتەۋلى تابىستى كاسىپكەر باحىت جۇماشەۆتان شەبەرلىك-ساعاتى ءوتتى.