وتكەن جەكسەنبى كۇنى اقتوبە قالاسىندا وتكىزىلگەن وسىنداي ءان سايىسى «بۇلاق كورسەڭ, كوزىن اش» دەگەن حالىق دانالىعىنا قۇلاق قويا ءبىلۋدىڭ ءبىر بەلگىسىندەي اسەر قالدىردى. مۇندا قاۋىرسىن قانات بالدىرعاندار مەن كىشكەنتايلاردىڭ تاڭعى شىقتاي تازا دا تۇنىق بالعىن داۋىستارىن بەلگىلى ءانشى نۇرجان كەرمەنباەۆ باعالادى. ءوز اتاۋىنان كورىنىپ تۇرعانىنداي «بالا داۋىسى-2017» بايقاۋىنا 7-13 جاس ارالىعىنداعى بالالاردىڭ عانا قاتىسا الاتىنىن ايتقان ءجون. مۇندا العاشقى كەزەكتەگى باسىمدىق تازا ۆوكالعا ءارى وسى ۆوكالعا قويىلاتىن تالاپتاردىڭ الىپپەسىن بايقاۋعا قاتىسقان بالدىرعانداردىڭ قانشالىقتى ءتۇسىنىپ, ونى قانشالىقتى دەڭگەيدە يگەرە العانىنا بايلانىستى بەرىلمەك. قالاي دەگەندە دە «بالا داۋىسى» بايقاۋىنىڭ بالدىرعاندارعا بەرەرى كوپ ەكەنى انىق. ء ارى بۇعان دەيىنگى ۋاقىتتا ەلىمىزدە مۇنداي اۋقىمدى جوبالار قولعا الىنباي كەلگەنى دە شىندىق. ۇلان-بايتاق ەلىمىزدىڭ ءار ءوڭىرى مەن قيىرىنان كەلىپ, بولاشاعىنان ۇلكەن ءۇمىت كۇتتىرەتىن بالالاردى ىرىكتەۋدىڭ ءوزى ۇلكەن گۋمانيستىك ءرول اتقارادى. وسىنىڭ ءبارىن ەسكەرە كەلگەندە «بالا داۋىسىنىڭ» عۇمىرى ۇزاق بولاتىنىنا ەشكىم تالاس تۋعىزا الماسا كەرەك. بايقاۋدىڭ اقتوبەدە وتكەن ىرىكتەۋ كەزەڭىنە 125 ءبۇلدىرشىن قاتىستى. قازىلار القاسى ولاردىڭ اراسىنان اقتوبە قالاسىنداعى №3 مۋزىكا مەكتەبىنىڭ وقۋشىسى نازگۇل بايمەنوۆانى جەڭىمپاز دەپ تانىدى دەدى گازەت تىلشىسىنە بايقاۋدىڭ مەنەدجەرى تولعاناي حاسەن. ونىڭ ۆوكالعا بەيىمدىلىگى 5 جاسىنان-اق بەلگىلى بولعان. وسى قابىلەتىن ءدوپ تانىعان اتا-اناسى قىزىنىڭ ءتۋابىتتى ونەرىن مۋزىكا ماماندارىنا تانىستىرعان. ىرىكتەۋ كەزەڭىنىڭ ۇزدىگى تۋرالى وعان قازىلىق جاساپ, باعا بەرگەن بەلگىلى ءانشى نۇرجان كەرمەنباەۆ ءوز وي-پىكىرىن گازەت تىلشىسىنە بىلايشا جەتكىزدى: – اقتوبەدە وتكىزىلگەن ىرىكتەۋ بايقاۋى كەزىندە دۇرىس تا ءادىل تاڭداۋ جاساۋ جانە فينالعا باراتىن ءبىر عانا بالانى انىقتاۋ شىن مانىندە كۇردەلى بولدى. نازگۇلدىڭ ۆوكالدىق مانەردەگى داۋىسى ەرەكشە ءارى ايىرىقشا دەۋگە بولادى. سونداي-اق, دارىندى قىزدىڭ حورەوگرافياسى دا بايقاۋ تالابىنان شىعا ءبىلدى. مەن ونىڭ بايقاۋ ناتيجەسىندە جەڭىسكە جەتۋىنە تولىق مۇمكىندىگى بار دەپ ەسەپتەيمىن. – ءبىز بۇل ىرىكتەۋ كەزەڭىنە جەڭىسكە جەتەمىز دەگەن ۇلكەن سەنىممەن كەلىپ ەدىك. ويلاعانىمىز ورىندالدى. مەن بۇعان شەكسىز قۋانىشتىمىن. بايقاۋدى ۇيىمداستىرۋشىلارعا ايتار العىسىم شەكسىز. ەڭ باستىسى, ولار بالالاردىڭ بويىنداعى تالانت پەن ۆوكالعا بەيىمدىلىگىن انىقتاۋعا كاسىبي بىلىكتىلىك تۇرعىسىنان كەلە ءبىلدى. ءسىرا, دانا حالقىمىز «بۇلاق كورسەڭ – كوزىن اش» دەپ وسىندايدا ايتسا كەرەك, – دەيدى نازگۇلدىڭ اناسى گۇلزادا بايمەنوۆا.
تەمىر قۇسايىن,
«ەگەمەن قازاقستان»
اقتوبە
سۋرەتتە: اقتوبەدەگى ىرىكتەۋ كەزەڭىنەن كورىنىس