مينيستر بايانداماسىنا ەلباسىنىڭ ەكونوميكالىق جاڭعىرۋعا بايلانىستى جولداۋى مەن «بولاشاققا باعدار: رۋحاني جاڭعىرۋ» اتتى ماقالاسى وزەك بولدى. وسى قۇجاتتاردا كورسەتىلگەن مىندەتتەر قانشالىقتى جۇزەگە اسىپ جاتقانىن مالىمدەدى. ول, ەڭ الدىمەن, ماقالادا كورسەتىلگەن «تۋعان جەر», «قازاقستاننىڭ كيەلى جەرلەرىنىڭ گەوگرافياسى», «قازاقستانداعى 100 جاڭا ەسىم», «100 جاڭا وقۋلىق», «جاھاندىق زاماناۋي قازاقستاندىق مادەنيەت» جوبالارىنىڭ تۇجىرىمدامالىق جانە مازمۇندىق نەگىزى قۇرىلعانىن اتاپ ءوتتى. سالا باسشىسىنىڭ سوزىنە قاراعاندا, ەلىمىزدە 8 مىڭنان استام مادەنيەت ۇيىمدارى بار. ولاردىڭ ىشىندە 34 ۇيىم رەسپۋبليكالىق مارتەبەگە يە. «مادەنيەت مەكەمەلەرىنىڭ باسەكەلەستىگىن ارتتىرۋ مەن كورسەتىلەتىن قىزمەتتەردىڭ ساپاسىن كوتەرۋ ماڭىزدى مىندەتتەردىڭ قاتارىندا. بۇل ورايدا, بارلىق رەسپۋبليكالىق مادەنيەت ۇيىمدارىنىڭ جۇمىس فورماتى وزگەرتىلدى. مىسالى, مۋزەيلەر مەن قورىق مۇراجايلار مەملەكەتتىك مەكەمە فورماتىنان مەملەكەتتىك قازىناشىلىق كاسىپورىنعا اۋىستىرىلدى. بۇل اقىلى قىزمەت كورسەتۋگە, كادەسىيلار, كىتاپ, البومدار ساتۋعا مۇمكىندىك بەرەدى. بارلىق ورتالىق مۋزەيلەر عىلىمي-زەرتتەۋ جۇمىستارىن جۇرگىزۋگە ليتسەنزيالار الادى», دەپ اتاپ كورسەتتى مينيستر. ا.مۇحامەدي ۇلىنىڭ ايتۋىنشا, 2016 جىلدان بۇگىنگى كۇنگە دەيىن 200-دەن اسا نورماتيۆتىك-قۇقىقتىق اكتىلەر جاسالعان جانە قابىلدانعان. ونىڭ ىشىندە تورتەۋى سالاداعى ماڭىزدى زاڭدار. ءبىرىنشى, «لوتەرەيا جانە لوتورەيالىق قىزمەت تۋرالى» زاڭعا تولىقتىرۋلار مەن وزگەرىستەر ەنگىزىلگەن. ءمينيستردىڭ ايتۋىنشا, وسىعان دەيىن بىزدە ونداي زاڭ بولعان ەمەس. «بۇل وتە كەرەكتى زاڭ. ءالى كۇنگە دەيىن مەملەكەتكە قانداي سالىقتار تولەنىپ جاتىر, پايداسىن كىمدەر كورۋدە دەگەن ساۋالدارعا ءبىز جاۋاپ بەرە المايتىنبىز. ەندى زاڭنىڭ ارقاسىندا ءبارى جۇيەگە قويىلدى. ءبارى اشىق بولادى», دەگەن مينيستر لوتورەيا ساتۋدان تۇسكەن تابىستىڭ ون بەس پايىزى سپورت سالاسىن دامىتۋعا جۇمسالاتىنىن مالىمدەدى. ەكىنشىدەن, ويىن يندۋسترياسى بويىنشا ەڭ مىقتى دەگەن كومپانيالاردان وكىلدەر شاقىرىلعان. مينيستر لوتورەيا سالاسى جاقسى داميتىن بولسا, بۋكمەكەرلىك مەكەمەلەردە جۇمىس ىستەيتىن جاستاردى دا وسى سالاعا الىپ كەلۋگە مۇددەلى ەكەندىكتەرىن جەتكىزدى. ەكىنشى, «دەنە شىنىقتىرۋ جانە سپورت تۋرالى» زاڭعا تۇزەتۋلەر ەنگىزىلگەن. بۇل تۇزەتۋدە سپورتتى قارجىلاندىرۋدىڭ جاڭا مودەلى جاسالعان. بۇرىن قارجىلاندىرۋ بويىنشا فۋتبول, حوككەي جانە ۆولەيبول سياقتى ويىن تۇرلەرىنە اكتسەنت جاسالىپ كەلگەن بولسا, بۇل جولى بۇقارالىق سپورت تۇرلەرىن قارجىلاندىرۋعا باسىمدىق بەرىلمەك. «باق وكىلدەرى بۇقارالىق سپورتتى دامىتۋعا قاتىستى كوپ ساۋال قويادى. جالپى, بۇقارالىق سپورت دەگەنىمىز نە؟ ول – جەكە سپورت ءتۇرى ەمەس. ءار وڭىردە سپورتتىڭ ءار ءتۇرى جاقسى دامىعان. مىسالى, وڭتۇستىك قازاقستاندا, جامبىل وبلىسىندا ۇلتتىق ويىن تۇرلەرىنەن جاقسى ناتيجەلەر بار. بىراق ولارعا وبلىستىق بيۋدجەتتەن قاراجات از بولىنەدى. ءبىز دە سپورتتىڭ كوماندالىق تۇرلەرى جاقسى دامىعان دەپ ايتىپ جاتامىز. سونداي-اق, بوكس پەن كۇرەستى ماقتانىپ ايتامىز. بىراق, ولارعا دا بيۋدجەت سالاسىنان بولىنەتىن قاراجات جەتكىلىكسىز. سول ءۇشىن ءبىز ەڭ ءبىرىنشى كەزەكتە قاي وڭىردە سپورتتىڭ قاي ءتۇرى جاقسى دامىعان بولسا, سوعان كوڭىل بولەمىز», دەدى مينيستر. ول سونداي-اق, فۋتبولعا قاتىستى شەتەلدەن لەگيونەر اكەلۋگە اتقارۋشى بيلىكتىڭ قارسى ەكەنىن جەتكىزدى. جانە بۇل ماسەلە جوعارىدا اتالعان «سپورت تۋرالى» زاڭدا رەتتەلگەن. ء«بىز بيۋدجەتتىڭ اقشاسىنا شەت ەلدەن لەگيونەرلەر اكەلۋگە قارسىمىز. مىسالى, «قايرات» كومانداسىنىڭ باسىندا قايرات بورانباەۆ دەگەن كاسىپكەر ازامات تۇر. ول ءوز قارجىسىنا شەت ەلدەن لەگيونەرلەر اكەلىپ ءجۇر. سول سەكىلدى, جەكە كاسىپكەرلەر ءوز قاراجاتىنا اكەلىپ جاتسا, اڭگىمە بولەك. ال بيۋدجەتتىڭ اقشاسى سپورت تۇرلەرىن دامىتۋعا جۇمسالۋ كەرەك», دەدى ول. ء ۇشىنشى, دەپۋتاتتاردىڭ باستاماسىمەن «مادەنيەت تۋرالى» زاڭ جاڭارتىلعان. وسىعان بايلانىستى مادەنيەت ۇيىمدارىنىڭ كوپتەگەن ماسەلەلەرى شەشىمىن تاپپاق. اتاپ ايتقاندا, مادەنيەت ۇيىمدارىن قۇرۋ, جويۋعا قاتىستى ماسەلەلەر, سالىققا قاتىستى, ايماقتاردا نەگىزسىز جابىلىپ قالعان ۇيىمداردى قالپىنا كەلتىرۋ ماسەلەلەرى وڭ شەشىم تاپپاق. زاڭعا ەنگىزىلگەن تۇزەتۋدىڭ ەڭ ءبىر ۇتىمدى تۇسى الەۋمەتتىك ماڭىزى بار ادەبيەتتەردى باسىپ شىعارۋعا قاتىستى بولعان. «بۇرىن كىتاپتار ەكى مىڭ دانامەن شىعاتىن. اۆتورلارعا 300-350 مىڭ كولەمىندە قالاماقى تولەنىپ كەلدى. ءاربىر اۆتور 3-5 جىل ەڭبەكتەنگەندە وسىنداي-اق قاراجاتتى قاناعات ەتتى. ەندى قالاماقىنى مينيسترلىك جانىنان قۇرىلعان ەكسپەرتتىك كوميسسيا بەلگىلەيدى, كىتاپتاردىڭ تيراجى 5 مىڭعا دەيىن وسەدى», دەپ اتاپ كورسەتتى مينيستر. تورتىنشىدەن, جيىن بارىسىندا «كينەماتوگرافيا تۋرالى» زاڭنىڭ جاسالعانى بەلگىلى بولدى. وعان ءوز ەلىمىزدىڭ كينو ءوندىرىسىنىڭ مايتالماندارىمەن قاتار, شەتەلدىك ساراپشىلار دا قاتىسقان. مينيستر زاڭدى جاساۋدا امەريكا, فرانتسيا, گەرمانيا, رەسەي, كانادا سياقتى ءىرى كينودەرجاۆالاردىڭ تاجىريبەلەرى نەگىزگە الىنعانىن باياندادى. جالپى, العاندا مادەنيەت سالاسىندا اتقارىلىپ جاتقان جۇمىستاردىڭ ەسەبى جيىن بارىسىندا تىڭدالدى. ونىڭ ىشىندە مادەنيەت, سپورت سالاسىنا قاتىستى جاڭالىقتار, سونداي-اق, ەكسپو-عا دايىندىق جايى قۇلاقتاندىرىلدى. ءمينيستردىڭ ايتۋىنشا, ەكسپو-داعى مادەني شارالاردى وتكىزۋگە مينيسترلىك دايىن. جيىن سوڭىندا مەملەكەت جانە قوعام قايراتكەرى مىرزاتاي جولداسبەكوۆ توراعالىق ەتەتىن مادەنيەت جانە سپورت ماسەلەلەرى بويىنشا قوعامدىق كەڭەس مۇشەلەرى مينيسترلىكتىڭ جۇمىسىن ءبىراۋىزدان «قاناعاتتانارلىق» دەپ باعالاپ, مينيسترلىك بايانداماسىنا قاتىستى قارار قابىلدادى.
ايگۇل سەيىلوۆا, «ەگەمەن قازاقستان»