وسك توراعاسىنىڭ اتاپ وتكەنىندەي, 2017 جىلعى 28 ساۋىردەن 28 مامىرعا دەيىنگى كەزەڭدە رەسپۋبليكا بويىنشا پارلامەنت سەناتىنىڭ دەپۋتاتتىعىنا بارلىعى 89 كانديدات ۇسىنىلدى. بۇعان دەيىنگى – 2014 جىلعى سەناتقا كەزەكتى سايلاۋدا 88 كانديدات, ال 2011 جىلى 96 كانديدات ۇسىنىلعان بولاتىن. «وسىلايشا, پارلامەنتتىڭ جوعارعى پالاتاسىنىڭ دەپۋتاتتارىن سايلاۋ جونىندەگى سوڭعى ءۇش سايلاۋ ناۋقانىندا ۇسىنۋ قورىتىندىلارى بويىنشا ءبىر سەناتور مانداتىنا ورتاشا العاندا 5 ۇمىتكەردەن كەلەدى, – دەدى ب.يماشەۆ. – وسى جىلى كانديداتتاردىڭ كوبى استانا قالاسىنان ۇسىنىلدى, ول 9 ادامدى, ەڭ ازى شىعىس قازاقستان وبلىسىندا – 4 ادامدى قۇرادى». سەناتقا قازىرگى سايلاۋ بارىسىندا ءوزىن ءوزى ۇسىنۋ قۇقىعىن پايدالانعان كانديداتتار سانىنىڭ ءوسۋى بايقالادى – 82 كانديدات بولىپ وتىر. سونداي-اق, وتكەن سايلاۋ ناۋقاندارىمەن سالىستىرعاندا ۇسىنۋدا ايەلدەردىڭ بەلسەندىلىگى 2,6 ەسە وسكەن. ۇسىنىلعان كانديداتتاردىڭ ىشىندە 13 ايەل, ونىڭ ىشىندە استانا جانە الماتى قالالارىنان 7 ايەل بار. كانديداتتاردىڭ ورتاشا جاسى 51,9 جاستى قۇرايدى. ەڭ جاس كانديدات 30 جاستا, ۇمىتكەرلەردىڭ ىشىندەگى ەڭ ۇلكەنى 68 جاستا. «ماماندىقتارى بويىنشا 26-سى ينجەنەر, 21-ءى ەكونوميست, 10-ى وقىتۋشى, تاعى 10-ى زاڭگەر, 9-ى اگرارلىق سالانىڭ وكىلدەرى, 5-ءۋى دارىگەر, 2-ءۋى ساياساتتانۋشى جانە 6-ۋى باسقا ماماندىق يەلەرى, – دەدى وسك باسشىسى. – ءوز كانديداتۋرالارىن قىزمەتتەگى 4 سەناتور ۇسىندى. ۇسىنىلعانداردىڭ ىشىندە 5-ءۋى ءماسليحاتتار دەپۋتاتتارى, 35-ءى كوممەرتسيالىق قۇرىلىمداردىڭ قىزمەتكەرلەرى, 13-ءى مەملەكەتتىك ۇيىمدار, كاسىپورىندار مەن مەكەمەلەردىڭ قىزمەتكەرلەرى, 23-ءى مەملەكەتتىك قىزمەتشىلەر جانە 7-ءۋى قوعامدىق ۇيىمداردىڭ وكىلدەرى. قازىرگى ۋاقىتتا سەنات دەپۋتاتتىعىنا كانديداتتاردى تىركەۋ ءراسىمى جالعاسۋدا, ول وسى جىلدىڭ 7 ماۋسىمىنا دەيىن جالعاسادى». سايلاۋ تۋرالى زاڭناماعا سايكەس سايلاۋ كوميسسيالارى مەملەكەتتىك ورگاندارمەن بىرلەسە وتىرىپ, ۇسىنىلعان قۇجاتتاردىڭ دۇرىستىعىن تەكسەرۋ بويىنشا جۇمىس جۇرگىزۋدە. 28 مامىرداعى جاعداي بويىنشا وبلىستىق, استانا جانە الماتى قالالىق سايلاۋ كوميسسيالارى سەنات دەپۋتاتتىعىنا 62 كانديداتتى تىركەدى. قازىرگى ۋاقىتتا ورتالىق سايلاۋ كوميسسياسىنا كانديداتتاردان ەكى شاعىم كەلىپ ءتۇستى جانە ولارعا سايلاۋ زاڭناماسىنىڭ ەرەجەلەرىن تۇسىندىرە وتىرىپ, جاۋاپ بەرىلدى. ال سايلاۋ ناۋقانى سايلاۋ زاڭناماسىنىڭ تالاپتارىنا سايكەس وتۋدە جانە ورتالىق سايلاۋ كوميسسياسىنىڭ تۇراقتى باقىلاۋىندا.
ءاليسۇلتان قۇلانباي, «ەگەمەن قازاقستان»