سەرگەي سالاماتسكي: «ۋسپەن اۋدانىنىڭ تۇلەكتەرىنە ۇبت-عا قاتىسۋ ماڭىزدى ەمەس»

بيىل ۇبت 20 ماۋسىم مەن 1 شىلدە ارالىعىندا وتەدى. وڭىردە 10 تەستىلەۋ پۋنكتى جۇمىس ىستەيتىن بولادى. اتا-انالار تەستىلەۋ بارىسىن تىكەلەي ونلاين رەجيمىندە كورە الادى. مەكتەپ بىتىرۋشىلەردى تاماقتاندىرۋعا جانە تۇراتىن ورنىنا قالالىق, اۋداندىق بيۋدجەتتەردەن 6,9 ملن تەڭگە ءبولىنىپتى. وبلىستىق ءبىلىم بەرۋ باسقارماسىنىڭ باسشىسى باقىت بەكسەيىتوۆانىڭ ايتۋىنشا, وتكەن جىلى ءوڭىر بويىنشا ۇبت-عا مەكتەپ بىتىرەتىن 3601 تۇلەكتىڭ 2564-ءى قاتىسىپتى. ورتاشا بالل 88,2-ءنى قۇراعان. وكىنىشكە وراي, اقتوعاي, پاۆلودار, شارباقتى, جەلەزين, ۋسپەن اۋداندارىنىڭ تۇلەكتەرى ەڭ تومەن ناتيجە كورسەتكەن بولاتىن.  ال, بيىل شە؟.. بيىل 11-سىنىپتى بىتىرەتىن وڭىردەگى 3738 وقۋشىنىڭ 2676-سى نەمەسە 71,5 پايىزى تەستىلەۋگە قاتىسۋعا نيەت ءبىلدىرىپتى. نەگىزى, ۇبت-نى تەك قانا ەلىمىزدىڭ جوعارى وقۋ ورىندارىنا تۇسكىسى كەلەتىن تۇلەكتەر عانا تاپسىرۋعا مىندەتتى دەلىندى. وسى مىندەتتى العا تارتىپ ۇبت-عا قاتىسپايتىندار قاتارى كوبەيە باستاعانداي.سوندىقتان, اكىمدىك وتىرىسىندا اۋدان-قالا اكىمدەرىنە مەكتەپ تۇلەكتەرىن ۇبت-عا مەيلىنشە كوپتەپ قاتىستىرۋ كەرەكتىگى ەسكەرتىلدى. ويتكەنى, مىسالى, ونسىز دا مەكتەپتەرىندە بالا سانى از ۋسپەن اۋدانىندا بىلتىر مەكتەپ بىتىرگەن تۇلەكتەردىڭ 52 پايىزى عانا ۇبت-عا قاتىسىپتى.  بۇعان نە سەبەپ؟.. سويتسەك, اۋدان اكىمى سەرگەي سالاماتسكيشە ايتساق: «ۋسپەن اۋدانى رەسەيمەن شەكارالاس ورنالاسقان. مۇنى ءبىر دەپ قويىڭىز. ەكىنشىدەن, مەكتەپ بىتىرۋشىلەردىڭ كوبى سول ەلدىڭ جوعارى وقۋ ورىندارىنا وقۋعا تۇسەدى. سوندىقتان, ولار ءۇشىن ۇبت-عا قاتىسۋ ماڭىزدى ەمەس» كورىنەدى...  فاريدا بىقاي, «ەگەمەن قازاقستان».  پاۆلودار وبلىسى