قىزىلوردا وبلىسىنىڭ جاڭاقورعان اۋدانىنان كەلىپ تۇسكەن 10 جاسار اقديدار ناقىپوۆا پەشكە ابايسىزدا قۇلاپ, دەنەسىنىڭ قىرىق پايىزى كۇيىپ قالعان. دۇرىس كۇتىم كورمەگەندىكتەن تاماق استى مەن قولتىعى تۇگەل جابىسىپ قالعان. امەريكالىق دارىگەرلەردىڭ قاراۋىندا بولعان اقديدارعا وپەراتسيا ءساتتى جاسالىپ, ەندى موينى مەن وڭ قولىن ەركىن كوتەرە الاتىن بولدى.
– اياق تەرىسىنەن الىنعان تەرىنى جىرتىلىپ كەتكەن ارالىقتاردى جاسىرۋعا اۋىستىردىق. ەكى جارىم ساعاتقا سوزىلعان اۋىر وپەراتسيا ارتتا قالدى. قازىر ءبۇلدىرشىننىڭ جاعدايى جاقسارىپ كەلەدى, – دەيدى ءى ساناتتى ورتوپەد-تراۆماتولوگ مەلس ورىنباي ۇلى.
ادامنىڭ دەنە, بەت-الپەتىندەگى كەمىستىگى ءومىر بويعى پسيحولوگيالىق كۇيزەلىسكە ۇشىراتاتىنى راس. بىرەۋلەر تۋا ءبىتتى, ەندى ءبىرى بايقاۋسىزدا تۇسكەن جاراقات اسەرىنەن زارداپ شەگىپ جاتادى. اسىرەسە, سابيلەردىڭ ايناعا قاراۋدان جۇرەكسىنە, قايمىعا ءومىر سۇرگەنى كىمدى دە بولسىن بەي-جاي قالدىرماس. 1994 جىلدان بەرى الەمنىڭ 20 ەلىندە 5 مىڭنان استام وپەراتسيا جاساعان Surgicorps International ۇيىمىنىڭ نەگىزىن قالاۋشى, پلاستيك-حيرۋرگ دجەك دەموس قازاقستاندا ءالى دە بىرنەشە كۇن قالىپ, پاتسيەنتتەردىڭ جاعدايىن باقىلاماق.
– قازاقستاندىق حيرۋرگتارمەن بىرگە بەس كۇن ىشىندە 73 وپەراتسيا جاسادىق. جەرگىلىكتى ارىپتەستەردىڭ كاسىبي بىلىكتىلىگىنە ءتانتى بولدىم. وپەراتسيا «قويانجىرىق», «قاسقىر اۋىز» تۋا ءبىتتى اۋرۋلارى مەن اياق-قول تەرىسىنىڭ كۇيىگىنە, تەرى كەمشىلىگى بار پاتسيەنتتەرگە جاسالدى. ەرتەڭ كوماندانىڭ كەي دارىگەرلەرى العا قويىلعان مىندەتتەردىڭ اياقتالۋىنا وراي, اقش-قا قايتپاق. مەن تەرى اۋىستىرعان اقديدار سەكىلدى پاتسيەنتتەردىڭ تاڭۋ پروتسەدۋراسىنا قالماقپىن. ول وتە كۇردەلى پروتسەسس. ءبىزدىڭ ماقساتىمىز – ساپالى مەديتسينالىق كومەككە ءزارۋ ادامداردىڭ قاي ەلدەن ەكەنىنە قاراماستان تەگىن جاردەم بەرۋ, – دەيدى دجەك دەموس.
جوبا اياسىندا انا مەن بالا ۇلتتىق عىلىمي ورتالىعى مەن Surgicorps International (اقش) پلاستيكالىق حيرۋرگتارى ەلىمىزدىڭ ءار وڭىرىنەن كەلگەن 300-دەن اسا دەنە كەمىستىگى بار بالانى, ونىڭ ىشىندە بالالار ءۇيىنىڭ 14 تاربيەلەنۋشىسىن قابىلداپ, كومەك كورسەتتى.
قازاقستان تاراپىنان قولداۋ كورسەتىپ, وپەراتسيا شىعىندارىن وتەگەن «اسىل بالا» قاۋىمداستىعىنىڭ قۇرىلتايشىسى گۇلنار تىلەكتەسقىزىنىڭ سوزىنە قاراعاندا, بۇل الەۋمەتتىك ماڭىزى زور جوبا الداعى ۋاقىتتا دا جالعاسىن تاپپاق.
جوبا كەزىندە نازارباەۆ ۋنيۆەرسيتەتى مەديتسينا فاكۋلتەتىنىڭ ستۋدەنتتەرى ەرىكتى رەتىندە قاتىستى. ولار جەرگىلىكتى مەديتسينا وكىلدەرى مەن Surgicorps كوماندا مۇشەلەرى اراسىندا اۋدارماشى بولا ءجۇرىپ, تاجىريبە جينادى.
ايساۋلە سەزبەك