استانادا, باتىس قازاقستان وبلىسىندا, اقمولا جانە اتىراۋ وبلىستارىندا داۋىلعا بايلانىستى ەسكەرتۋ جاريالاندى, - دەپ حابارلايدى استانا قالالىق توتەنشە جاعدايلار دەپارتامەنتى.
"استانادا 8 جەلتوقساندا كۇندىز, 9 جەلتوقساندا تاۋلىك بويى وڭتۇستىك-باتىس جەلىنىڭ سەكۋندىنا 15-20 مەترگە جەتۋى كۇتىلەدى. كەي ۋاقىتتا بۇرقاسىن كۇتىلەدى. اقمولا وبلىسىندا 8-9 جەلتوقساندا وڭتۇستىك-باتىس جەلىنىڭ سەكۋندىنا 15-20 مەترگە, كەيبىر جەرلەردە 25 مەترگە دەيىن جەتۋى مۇمكىن. 8 جەلتوقساندا تۇنگى ۋاقىتتا باتىس قازاقستان وبلىسىندا اۋا تەمپەراتۋراسى كۇرت تومەندەپ, 20-25 گرادۋسقا دەيىن اياز كۇتىلەدى. ال اتىراۋ وبلىسىندا 12-20 گرادۋسقا دەيىن اياز بولۋى مۇمكىن", - دەلىنگەن استانا قالالىق تجد سايتىندا.
ەسكە سالا كەتەيىك, 7 جەلتوقساندا ساعات 10.30-دان بەرى اۋا رايىنىڭ قولايسىزدىعىنا بايلانىستى بارلىق كولىك تۇرىنە "استانا-كوكشەتاۋ" تاسجولىنداعى قوزعالىس جابىلعان بولاتىن.
سونداي-اق, بۇگىن سينوپتيكتەر الداعى كۇندەرى قار جاۋىپ, تۇمان تۇسەدى جانە كوكتايعاق بولاتىنىن حابارلاعان بولاتىن.