«بولاشاق» پرەزيدەنتتىك ستيپەندياسى – ەلىمىزدىڭ الەمدىك ءبىلىم بەرۋ جۇيەسىنە جەدەل ءارى ءساتتى ينتەگراتسيالانۋىن قامتاماسىز ەتۋگە مۇمكىندىك بەرگەن قازاقستاننىڭ ۇلتتىق جوباسى. بۇگىن مەملەكەتتىك حاتشى گۇلشارا ابدىقالىقوۆانىڭ تورايىمدىلىق ەتۋىمەن شەت ەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
جيىندا ءسوز العان مەملەكەتتىك حاتشى : "تاۋەلسىزدىكتىڭ 25 جىلدىق مەرەيتويىن اتاپ وتۋگە ساناۋلى كۇندەر قالدى. ايتۋلى مەرەكە شەڭبەرىندە مەملەكەت باسشىسىنىڭ جارلىعىمەن «25 جۇلدىزدى كۇن» بەلگىلەندى. وسىعان سايكەس, 7 جەلتوقسان ەلىمىزدىڭ جارقىن بولاشاعى مەن جاستاردىڭ كەمەل كەلەشەگىنە ارنالعان. سوندىقتان, وتىرىسىمىزدىڭ وسى كۇننىڭ اياسىندا وتكىزىلۋىنىڭ وزىندىك ءمانى بار. ويتكەنى, «بولاشاق» باعدارلاماسى ەل دامۋىنا ەلەۋلى ۇلەس قوسىپ كەلەدى. تاۋەلسىزدىك جىلدارىندا «بولاشاق» باعدارلاماسى ەلىىمىزدىڭ جوعارى ساناتتى ماماندارىن دايارلايتىن الەمدىك جۇيەگە كىردى. وسى كەزەڭدەگى تاريحي تابىستارىمىزعا شولۋ جاساساق, وسىدان 23 جىل بۇرىن ەلباسى نۇرسۇلتان نازارباەۆتىڭ تىكەلەي باستاماسىمەن جۇزەگە اسىرىلعان «بولاشاق» باعدارلاماسى بويىنشا بۇگىنگە دەيىن 9 مىڭ 339 قازاقستاندىق ازامات شەتەلدىڭ جەتەكشى جوعارى وقۋ ورىندارىندا ءوز بىلىمدەرىن ارتتىردى. بيىلعى جىلى شەت ەلدە كادرلار دايارلاۋ جونىندەگى رەسپۋبليكالىق كوميسسيا بىرنەشە وزگەرىستەر ەنگىزدى. بۇل «بولاشاق» باعدارلاماسىن ءارى قاراي ءتيىمدى جۇرگىزۋگە مۇمكىندىك بەرەدى",– دەدى گۇلشارا ناۋشاقىزى.
سونىمەن قاتار, مەملەكەتتىك حاتشى «بولاشاق» باعدارلاماسىنىڭ باسەكەگە قابىلەتتى تۇلەكتەرى قازاقستاننىڭ ودان ءارى دامۋى مەن گۇلدەنۋىنە ايرىقشا ۇلەس قوساتىنىنا جانە «قازاقستان-2050» ستراتەگياسىنىڭ باستى ماقساتى – ەلىمىزدىڭ الەمنىڭ ەڭ دامىعان 30 مەملەكەتتىڭ قاتارىنا ەنۋىنە قول جەتكىزۋگە بەلسەنە اتسالىساتىنىنا سەنىم ءبىلدىردى.
كوميسسيا وتىرىسى شەڭبەرىندە ءبىلىم جانە عىلىم ءمينيسترى ەرلان ساعاديەۆتىڭ شەت ەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرماسىنىڭ ورىندالۋى تۋرالى ەسەبى تىڭدالىپ, «بولاشاق» باعدارلاماسىن ىسكە اسىرۋعا قاتىستى بىرقاتار ماسەلەلەر قارالدى.
جيىن بارىسىندا كوميسسيا شەشىمىمەن ورتالىق جانە جەرگىلىكتى مەملەكەتتىك ورگانداردىڭ وتىنىمدەرى بويىنشا ازىرلەنگەن 2017 جىلعا باسىم ماماندىقتار تىزبەسى بەكىتىلىپ, كەلەسى جىلعا ارنالعان ستيپەنيالاردىڭ شەكتى سانى انىقتالدى.
سونىمەن, بۇل كۇنى كوميسسيانىڭ شەشىمىمەن الداعى ۋاقىتتا ماگيستراتۋرادا جانە دوكتورانتۋرادا وقيتىن, سونداي-اق, الەمنىڭ جەتەكشى عىلىمي جانە وندىرىستىك ورتالىقتارىندا تاعىلىمدامادان وتۋگە جىبەرىلەتىن 544 ۇمىتكەر ستيپەنديا يەگەرى اتاندى. ال 23 جىلدا 9 مىڭ 339 ازامات «بولاشاق» باعدارلاماسى بويىنشا ءبىلىم الدى.
وتىرىس قورىتىندىسى بويىنشا گۇلشارا ابدىقالىقوۆا «بولاشاق» حالىقارالىق ستيپەندياسىن ودان ءارى ىسكە اسىرۋ بويىنشا بىرقاتار تاپسىرمالار بەردى.
ءلايلا ەدىلقىزى, «ەگەمەن قازاقستان».