بۇگىن استانا قالاسىندا «اۋىل» حدپپ-نىڭ ۇيىمداستىرۋىمەن اۋىل تاقىبىرىنا ارنالعان جاس اقىن-جازۋشىلار اراسىنداعى «اۋىلىم – التىن تۇعىرىم» كونكۋرسىنىڭ جەڭىمپازدارى ماراپاتتالدى.
«اۋىل» پارتياسى تاراپىنان قازاقستان تاۋەلسىزدىگىنىڭ 25 جىلدىق مەرەيتويىنا وراي ارنايى ۇيىمداستىرىلعان «اۋىلىم – التىن تۇعىرىم» كونكۋرسىنا شىعارمالار 1 جىل بويى قابىلدانعان. شارانى «اۋىل» پارتياسى «قازكونتەنت» اق-نىڭ «ادەبيەت» پورتالىمەن بىرلەسىپ ۇيىمداستىردى. ادەبي-ونلاين كونكۋرسىنا بارلىعى 219 شىعارما كەلىپ تۇسكەن. ونىڭ ىشىندە 18 شىعارما دراماتۋرگيا جانرى بويىنشا, 79 تۋىندى – پروزا جانرى بويىنشا جانە 122 ەڭبەك پوەزيا جانرى بويىنشا تىركەلگەن.
كونكۋرسقا كەلىپ تۇسكەن شىعارمالارعا ارنايى قۇرىلعان قازىلار القاسى باعا بەردى. قازىلار القاسىنىڭ قۇرامىندا پارلامەنت سەناتىنىڭ دەپۋتاتى, جۋرناليست, بەلگىلى جازۋشى جابال ەرعاليەۆ, قازاقستانىڭ ەڭبەك سىڭىرگەن قايراتكەرى, جازۋشى, دراماتۋرگ راحىمجان وتارباەۆ, حالىقارالىق «الاش» سىيلىعىنىڭ لاۋرەاتى, جازۋشى دراماتۋرگ روزا مۇقانوۆا, جازۋشى-عالىم جولتاي ءالماش, اقىن, جازۋشى, كومپوزيتور ەرقوجا القوجا ۇلى جانە جاس اقىن-جازۋشىلار – باۋىرجان قاراعىز ۇلى, ەربول بەيىلحان, تالعات ەشەن ۇلى سىندى ازاماتتار بولدى.
«اۋىل» حدپپ-نىڭ توراعاسى ءا.بەكتاەۆ جيىن بارىسىندا: «سايىستىڭ جاريالى تۇردە, زاماناۋي ۇلگى – الەۋمەتتىك جەلىدە ونلاين تۇردە ءوتۋى – شىعارماشىل جاستارىمىزعا شابىت ءبىتىردى. ەلىمىزدىڭ ءار تۇكپىرىنەن بارلىعى 220-دان استام جاس اقىن-جازۋشىلار باق سىنادى. رەسپۋبليكالىق دەڭگەيدە وتكىزىپ جاتقان كونكۋرس ءتىپتى حالىقارالىق دەڭگەيگە دەيىن كوتەرىلدى. كەلىپ تۇسكەن شىعارمالار اراسىندا قىتاي, مونعوليا, وزبەكستانداعى قانداستارىمىزدىڭ تۋىندىلارى بار», – دەدى.
ايتا كەتۋ كەرەك, ءبىرىنشى ورىن يەگەرىنە 500 مىڭ تەڭگە, 2 ورىنعا 300 مىڭ تەڭگە, 3 ورىنعا 200 مىڭ تەڭگە كولەمىندە سىياقى تاعايىندالعان. سونىمەن قاتار ساپالى شىعارمالاردىڭ وتە كوپ بولۋىنا بايلانىستى قازىلار القاسى ءار جانر بويىنشا قوسىمشا ارنايى جۇلدە تاعايىنداۋعا شەشىم قابىلدادى.
بارلىق جەڭىمپازدار اراسىنان ەڭ ۇزدىك شىققان شىعارما يەسىنە تاعايىندالعان «التىن تۇعىردى» «اۋىل» پارتياسىنىڭ توراعاسى ءالي بەكتاەۆ تابىستادى.
پارتيا توراعاسىنىڭ ايتۋىنشا, وسى سايىسقا كەلىپ تۇسكەن شىعارمالاردىڭ بارلىعى جيناقتالىپ, پروزا, پوەزيا جانە دراماتۋرگيا جانرلارى بويىنشا بولەك كىتاپ بولىپ, باستىرىلىپ شىعارىلادى.
پوەزيا نوميناتسياسى بويىنشا ۇلاربەك دالەي ۇلى, داۋرەن بەرىكقاجى, ادال قالي ۇلى جۇلدەلى بولدى. ىلياس مۇقاي ۇلىنا تۇمانباي مولداعاليەۆ اتىنداعى سىيلىق, ايجان تاباراكقىزىنا فاريزا وڭعارسىنوۆا اتىنداعى سىيلىق, التىنقادىس كۇنتۋعان ۇلىنا ەسەنقۇل جاقىپبەكوۆ اتىنداعى سىيلىق بەرىلدى.
پروزا نوميناتسياسىندا ومىرجان ابدىحالىق ۇلى, ماقسات رامازان ۇلى, ەسبولات ايدابوسىن ۇلى ۇزدىك دەپ تانىلدى. كۇلتەگىن اسپان ۇلىنا سايىن مۇراتبەكوۆ اتىنداعى, قانات ابىلقايىرعا تاكەن الىمقۇلوۆ اتىنداعى, مۇرات الماسبەك ۇلىنا ساكەن ءجۇنىسوۆ اتىنداعى ارنايى جۇلدەلەر بەرىلدى.
دراماتۋرگيا نوميناتسياسىندا ماناربەك قىدىرباي, الماس مىرزاحمەت, اسكەرحان اقتاي جۇلدەلى بولدى. اسقار توقپانوۆ اتىنداعى ارنايى جۇلدە مىنايحان سالتاناتقا, قالتاي مۇحامەدجانوۆ اتىنداعى سىيلىق ايسۇلۋ جولتايقىزىنا, وزبەكالى جانىبەكوۆ اتىنداعى سىيلىق مارجان ەرشۋگە بۇيىردى.
جولدىباي بازار, "ەگەمەن قازاقستان".