اقتوبەدەگى ارنايى وپەراتسيا كەزىندە قىلمىستىق توپتىڭ بىرنەشە مۇشەسى قۇرىقتالدى. ولار مۇناي ۇرلاۋمەن اينالىسقان, دەپ xابارلايدى قر ۇلتتىق قاۋىپسىزدىك كوميتەتى.
«جەلتوقساننىڭ 7-ءسى كۇنى ۇلتتىق قاۋىپسىزدىك كوميتەتى, سىبايلاس جەمقورلىققا قارسى ۇلتتىق بيۋرو مەن ىشكى ىستەر مينيسترلىگى اقتوبە وبلىسىندا, ەلدىڭ بىرقاتار ايماقتارىندا مۇناي ۇرلاۋ مەن مۇناي ونىمدەرىنىڭ زاڭسىز ساۋداسىمەن اينالىساتىن ۇيىمداسقان قىلمىستىق توپتاردى قۇرىقتاۋ وپەراتسياسىن باستادى. شۇعىل ىزدەستىرۋ شارالارى بارىسىندا مۇناي ۇرلاۋمەن اينالىسقان بىرنەشە ادام ۇستالدى. ولاردان مۇناي مەن مۇناي ونىمدەرى بار اۆتوتسيستەرنالار تاركىلەندى. بۇدان بولەك, راديكالدى سالافيتتەردەن قۇرالعان قىلمىستىق توپتىڭ مۇشەلەرى قاماۋعا الىندى. ولار مۇناي ۇرلاعاندارعا «قامقورشىلىق» جاساعان», - دەلىنگەن رەسمي xابارلامادا.
ۇلتتىق قاۋىپسىزدىك كوميتەتىنىڭ xابارلاۋىنشا, قازىرگى كەزدە كۇدىكتىلەر تۇراتىن ۇيلەردە ءتىنتۋ شارالارى جۇرگىزىلىپ جاتىر. سونداي-اق ۇرلانعان مۇنايدى زاڭداستىرۋمەن اينالىسقان كاسىپورىندار تەكسەرىلۋدە. كوميتەت تەرگەۋدىڭ ناتيجەسىن جاريالاۋدى جوسپارلاپ وتىر.
ايتا كەتەيىك, بۇگىن بۇقارالىق اقپارات قۇرالدارىندا «اقتوبەدەگى مۇناي ءوندىرۋ زاۋىتى ماڭايىندا ارنايى وپەراتسيا ءوتىپ جاتىر» دەگەن اقپارات تاراعان بولاتىن.