وبلىس ورتالىعىنداعى «نۇراقتوبە» شاعىن اۋدانىندا 540 پاتەرلىك ءۇش توعىز قاباتتى تۇرعىن ءۇي پايدالانۋعا بەرىلدى. تاۋەلسىزدىكتىڭ 25 جىلدىعى قارساڭىندا كەزەگى كەلگەن العاشقى 25 اقتوبەلىك وتباسىعا پاتەر كىلتتەرى سالتاناتتى جاعدايدا تاپسىرىلدى. پاتەر كىلتتەرىن تاپسىرۋ سالتاناتىندا ءسوز العان وبلىس اكىمى بەردىبەك ساپارباەۆ جاڭا ۇيگە قونىستانۋشىلاردى قۋانىشتى ساتتەرىمەن قۇتتىقتادى. ەلىمىز ەگەمەندىك العاننان بەرى مەملەكەت باسشىسى نۇرسۇلتان نازارباەۆتىڭ حالىقتىڭ ءال – اۋقاتىن ارتتىرۋعا, تۇرمىسىن جاقسارتۋعا باسا نازار اۋدارىپ كەلە جاتقانىن اتاپ ءوتتى.
- وسى «نۇراقتوبە» شاعىن اۋدانى كۇنى كەشە عانا بوي كوتەرگەن-ءدى. قازىر قانشاما جاڭا ۇيلەر سالىندى. مەكتەپتەر, بالاباقشالار, جولدار سالىنىپ, جارىققتاندىرۋ جۇمىستارى جۇرگىزىلدى. بۇگىن مىنە, 540 پاتەرلىك ءۇش تۇرعىن ۇيگە قونىستانۋ باستالدى. ۇكىمەتپەن كەلىسىپ, وسى جەردەن «نۇرلى جەر» مەملەكەتتىك باعدارلاماسى بويىنشا تۇرعىن ۇيلەر سالۋ كوزدەلۋدە. تۇرعىن ۇيلەردى تەز دە ساپالى سالىپ بەرگەن «اقتوبە ساۋلەت» كومپانياسىنا, وسى تۇرعىن ۇيدەن پاتەر الۋعا جاعداي جاساعان «تۇرعىن ءۇي قۇرىلىسى جيناق بانكى» اق اقتوبە فيليالىنا ريزاشىلىعىمدى بىلدىرەمىن. جالپى تۇرعىن ۇيگە بايلانىستى بارلىق باعدارلامالار بويىنشا بيىل 5 مىڭ اقتوبەلىك وتباسى باسپانالى بولادى,-دەدى ءوڭىر باسشىسى.
سالتاناتتى ساتتە قاراقالپاقستاننان تۋعان جەرىنە ورىلعان قانداسىمىز جارىلقاسىن تاڭباەۆ سوز الىپ, وسىنداي تۇرعىن ءۇي سالىپ بەرگەن ەلباسىنا العىس سەزىمىن جەتكىزدى, ەلدەگى تىنىشتىق پەن تاتۋلىقتى نۇرسۇلتان ءابىش ۇلىنىڭ سارابدال ساياساتىمەن ساباقتاستىردى.
- مەن قاراقالپاقستاننان كوشىپ كەلگەن بويدا كەزەككە تۇردىم. 2013 جىلى وسى شاعىن اۋدانداعى العاشقى تۇرعىن ۇيدەن پاتەرگە قول جەتكىزدىم. قازىر بۇل شاعىن اۋدان قاناتىن كەڭگە جايىپ, ءوسىپ كەلەدى. تۋعان جەرىمە كەلگەنىمە قۋانىشتىمىن. حالقىنىڭ قامىن ويلاپ, تۇرمىسىن تۇزەۋگە ۇيتقى بولىپ وتىرعان ەلباسىعا مىڭ راحمەت, دۇنيە تۇرعانشا تۇرسىن,-دەگەن جارىلقاسىن اقساقال باتاسىن بەرىپ, جاڭا قونىستانۋشىلارعا قۇتتى بولسىنىن جەتكىزدى.
سودان كەيىن سۋ جاڭا پاتەر يەلەرى وبلىس اكىمى بەرداىبەك ساپارباەۆتىڭ, وبلىستىق ءماسليحات حاتشىسى ءسانيا قالدىعۇلوۆانىڭ جانە قالا اكىمى يلياس يسپانوۆتىڭ قولىنان كىلتتەرىن الىپ, قۋانىشتارىن ءبولىستى.
تۇرعىن ءۇيدىڭ كىرەبەرىسىنە كەرىلگەن كوك لەنتانى وسى اۋداننىڭ اقساقالى جارىلقاسىن تاڭباەۆ پەن ارداقتى انا ەسقاليەۆا قيدى. جاڭا قونىستانۋشىلار پاتەرلەرىنە كىرىپ, كورىپ, جارىق تا كەڭ بولمەلەرگە كوڭىلدەرى تولدى.
ساتىبالدى ءساۋىرباي, «ەگەمەن قازاقستان».
سۋرەتتەردى تۇسىرگەن ماكسيم توكار.
اقتوبە.