قر پارلامەنت ءماجىلىسىنىڭ پلەنارلىق وتىرىسىندا دەپۋتاتتاردى قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى ا.ي. مىرزاحمەتوۆتىڭ ەرەكشە قورعالاتىن تابيعي اۋماقتاردى باسقارۋعا جۇرتشىلىقتى تارتۋ ماقساتىندا تابيعات قورعاۋ مەكەمەلەرى جانىنان ۇيلەستىرۋ كەڭەسىن قۇرۋ تۋرالى ۇسىنىسى قىزىقتىردى, دەپ حابارلايدى اۋىل شارۋاشىلىق مينيسترلىگى.
«ۇيلەستىرۋ كەڭەسى – ەرەكشە قورعالاتىن تابيعي اۋماقتار قىزمەتىنىڭ اشىقتىعىن قامتاماسىز ەتۋ ءۇشىن قۇرىلماق. ونىڭ قۇرامىنا ۇەۇ مەن جەرگىلىكتى اتقارۋشى ورگانداردىڭ, ارداگەرلەر كەڭەسى مەن بيزنەس قۇرىلىمدارىنىڭ جانە تابيعات سالاسىنداعى مەكەمەلەر وكىلدەرى كىرەدى, – دەپ اتاپ ءوتتى ا.مىرزاحمەتوۆ.
اتالعان كەڭەس وكىلەتتى ورگان بەكىتكەن تيپتىك ەرەجە نەگىزىندە قۇرىلادى. ياعني, ۇيلەستىرۋ كەڭەسى – كونسۋلتاتيۆتىك-كەڭەستىك جانە باقىلاۋ ورگانى بولماق. ونىڭ ۇسىنىمدارى تابيعات قورعاۋ مەكەمەلەرىنىڭ ءارالۋان شارالاردى جوسپارلاۋى بارىسىندا ەسكەرىلەتىن بولادى.
ايتا كەتەيىك, قر پارلامەنت ءماجىلىسىنىڭ پلەنارلىق وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر جانە جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.