2016 جىلدىڭ 7 جەلتوقسانىندا اتىراۋ قالاسىندا ەلباسىنىڭ قاتىسۋىمەن الەمدەگى ەڭ ءىرى كەن ورىندارىنىڭ ءبىرى جانە قازاقستانداعى ءبىرىنشى تەڭىز كەن ورنى بولىپ تابىلاتىن قاشاعان رەسمي تانىستىرىلدى, دەپ حابارلايدى ەنەرگەتيكا مينيسترلىگى.
2016 جىلدىڭ 1 قاراشاسىندا قاشاعاندا ءوندىرۋ تاۋلىگىنە 75 مىڭنان استام باررەل مۇناي كوممەرتسيالىق دەڭگەيگە جەتتى. قازىرگى ۋاقىتتا ءوندىرۋدىڭ دەڭگەيىن ارتتىرۋ جانە ونى تاۋلىگىنە 180 مىڭ باررەل دەڭگەيىندە تۇراقتاندىرۋ ماقساتىندا جۇمىستار جۇرگىزىلۋدە.
اعىمداعى جىلدىڭ سوڭىنا دەيىن 1 ملن.توننا مۇناي جانە 680 ملن.م3 گازعا جۋىق, 2017 جىلى – 8,9 ملن. توننا مۇناي جانە 5,6 ملرد. م3 گاز ءوندىرۋ جوسپارلانۋدا. كەلەسى جىلدارى جىلىنا 13 ملن.توننا مۇناي جانە 9 ملرد. م3 گازعا دەيىن ءوندىرۋدى ارتتىرۋ جوسپارلانۋدا.
قاشاعاندى يگەرۋدىڭ ناتيجەسىندە الەمدىك ستاندارتتارعا ساي كەلەتىن وتاندىق تەڭىز سەرۆيستىك ينفراقۇرىلىمى سالىندى:
- «ەرساي» (قۇرىق پ.) جانە «كاسپيان وففشور مارين كونستراكشن» (اقتاۋ تەڭىز پورتى) اۋىر توننالى مەتالل قۇراستىرىلىمىن شىعارۋ بويىنشا زاۋىتتار سالىندى; باۋتين پورتىندا كەمە جوندەيتىن زاۋىتى سالىندى;
- تەڭىز وپەراتسيالارىن قولداۋ بازاسى (باۋتين پورتى), مۇناي توگىلۋىنە دەن قويۋ بازاسى جانە وزگە دە وبەكتىلەر قۇرىلدى.
شليۋمبەرجە, سيمەنس, ەنەردجي ۆۋد گرۋپپ, سايپەم سەكىلدى حالىقارالىق كومپانيالار ءوز بىلىمدەرى, تەحنولوگيالارى جانە تاجىريبەلەرىمەن كىرگەن 70-گە جۋىق بىرلەسكەن كومپانيالار/ ارىپتەستىكتەر قۇرىلدى.
قازىرگى كەزدە قاشاعان جوباسىندا قازاقستان يەلىگىندەگى ۇلەسى 50%-دان استام 274 كومپانيا جۇمىس جاسايدى.
180 اسا قازاقستاندىق كومپانيا وقۋدان ءوتىپ, حالىقارالىق ستاندارتتار بويىنشا سەرتيفيكاتتالدى.
الەۋمەتتىك جاۋاپكەرشىلىك اياسىندا كونسورتسيۋم ماڭعىستاۋ جانە اتىراۋ وبلىستارىنىڭ الەۋمەتتىك جانە ينفراقۇرىلىمدىق دامۋىنا 500 ملن. اقش دوللارىنان استام قاراجات ءبولدى.
وسى جىلدار ىشىندە تومەندەگىلەر سالىندى:
- 49 ءبىلىم مەكەمەسى (مەكتەپتەر, بالاباقشالار);
- 30 مەديتسينالىق مەكەمە (اۋرۋحانالار, ەمحانالار, اۋىلدىق دارىگەرلىك پۋنكتىلەر);
- 68 ينفراقۇرىلىم وبەكتىسى (قالالار مەن اۋىلداردى گازداندىرۋ, جولدار سالۋ);
- 8 مادەني وبەكتى (كلۋبتار, مادەنيەت ۇيلەرى);
- 12 سپورت وبەكتىسى (ستاديوندار, دەنە شىنىقتىرۋ-ساۋىقتىرۋ كەشەندەرى).