«استانا بالەت» تەاترى ورنالاسقان جاڭا عيماراتتا العاشقى سپەكتاكلدەر 2016 جىلعى 10-11 جەلتوقساندا وتەدى. تەاتردىڭ جالپى كولەمى 15,4 مىڭ شارشى مەتر. كورەرمەن زالىندا 783 ورىن بار (609 ورىندىق پارتەر, 104 ورىندىق بالكوننىڭ 2 يارۋسى, 70 ورىندىق بالكوننىڭ 3 يارۋسى). ساحنانىڭ اۋدانى 536 شارشى مەتر. ساحنا ءتورت كوتەرىپ-ءتۇسىرۋ پلانشەتى مەن ءتورت ارتىستىك كوتەرگىشپەن جابدىقتالعان.
«استانا بالەت» تەاترىنىڭ ساحناسىندا ستسەنوگرافياسى كۇردەلى سپەكتاكلدەر قويۋعا بولادى. «استانا بالەت» تەاترى ساحناسىنىڭ مۇمكىندىكتەرى رەجيسسەرلەر مەن ستسەنوگرافتاردىڭ بىرەگەي يدەيالارىن جۇزەگە اسىرۋىنا جول اشادى. جارىق بەرۋ كەشەنىندە ءداستۇرلى تەاتر قوندىرعىلارى جانە جۇيەلەرىمەن قاتار, وسى سالاداعى سوڭعى يننوۆاتسيالىق جاڭالىقتار قولدانىلعان. 600-800 جارىق جابدىقتارى ورناتىلىپ, سونىڭ ارقاسىندا كوركەم جارىقتى جوعارى ساپادا جاساۋ مۇمكىندىگى بار. سونىمەن قاتار, ارنايى تەحنيكا بەينەپروەكتسيانىڭ بار مۇمكىندىكتەرىن قولدانۋعا مۇمكىندىك بەرەدى.
ساحنانىڭ تەحنيكالىق مۇمكىندىكتەرى تەاتردىڭ كوركەمدىك-قويۋشىلىق ارتىقشىلىقتارىن ارتتىرىپ, ءتۇرلى جانر مەن ستيلدەگى سپەكتاكلدەردىڭ قويىلىمىن جۇزەگە اسىرۋعا مۇرشا بەرەدى. «استانا بالەت» تەاترى «قازاق ۇلتتىق حورەوگرافيا اكادەمياسىنىڭ» جانىندا ورنالاسقان.