وتاندىق كاسىپكەرلەردىڭ ءتول مەرەكەسى — يندۋستريالاندىرۋ كۇنىنە وراي ۇيىمداستىرىلىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن ءوتىپ جاتقان جالپىۇلتتىق تەلەكوپىر بارىسىندا «ساپا كوشباسشىسى», «ۇزدىك يندۋستريالىق جوبا» جانە «ۇزدىك يننوۆاتسيالىق جوبا» اتالىمدارىنىڭ جەڭىمپازدارى انىقتالدى.
سونىمەن قاتار, ءداستۇرلى تەلەكوپىر كەزىندە ەل وڭىرلەرىنەن يندۋستريالاندىرۋ كارتاسى جوبالارىنىڭ تۇساۋى كەسىلدى. نۇرسۇلتان نازارباەۆ «نۇرلى جول» باعدارلاماسى اياسىندا بىرقاتار يندۋستريالىق جانە ينفراقۇرىلىمدىق جوبالار ءوندىرىسىن ىسكە قوستى.
اتىراۋداعى ءىرى مۇناي وڭدەۋ زاۋىتى, اقمولا وبلىسىنان «اۆگۋست-نان» كاسىپورنى مەن جامبىل وبلىسىنان «قازفوسفات» جشس باسشىلىعى بايلانىس ورناتتى.
ەلباسى ۇلتتىق رۋحى بەرىك, ساياسي جۇيەسى تۇراقتى, ەكونوميكالىق الەۋەتى مىقتى, باسەكەگە قابىلەتتى, حالىقارالىق بەدەلى زور قۋاتتى مەملەكەت قۇرا بىلگەنىمىزدى اتاپ ءوتتى. قازاقستان بۇگىندە ىنتىماق ۇياسىنا, دوستىق پەن كەلىسىم پاناسىن سايالاعىسى كەلەتىن جاندار ءۇشىن جەرۇيىق مەكەنىنە اينالىپ وتىر.
«بۇل جوبالار تاۋەلسىزدىكتىڭ 25 جىلدىق مەرەيتويىندا كوڭىلىمىزدى كوتەرە تۇسۋدە. ءبىز بۇگىن ءونىم ساپاسى جونىنەن ەڭ ۇزدىك كاسىپكەرلەردى ماراپاتتاماقپىز. جۇزدەن جۇيرىك وزاتىنى انىق. تاريحتا العاش رەت وڭدەۋشى ونەركاسىپ تاۋ-كەن سالاسىنان ءوسىم جاعىنان جوعارى كورىنۋدە. شەتەلدىك ينۆەستيتسيانىڭ جالپى كولەمىندە وڭدەۋشى كاسىپورىندار ۇلەسى 2 ەكى ەسەگە ءوستى. بۇگىندە جاسالعان يگىلىكتى ىستەردى كەلەر ۇرپاق ءالى العىسپەن ەسكە الاتىن بولادى», – دەپ ءسوزىن جالعاستىرعان پرەزيدەنت قازاقستاندىقتار وزىمىزدە جاسالعان ەلەكتروموبيلدەردى قولدانسا, ەكولوگيالىق احۋال جاقسارا تۇسەر ەدى دەگەندى كەلتىردى.
ەلباسى الەمدىك بيزنەستىڭ قازاقستانعا سەنىمى نىعايعانىن اتاپ ءوتتى. «بۇكىلالەمدىك بانك رەيتينگىنىڭ بيزنەستى جۇرگىزۋدىڭ جەڭىلدىگى تۇرعىسىندا 190 ەلدىڭ اراسىندا 35-ورىنعا كوتەرىلدىك», – دەگەن نۇرسۇلتان نازارباەۆ ەكسپورت ماسەلەسىنىڭ ەش ۋاقىتتا وزەكتىلىگىن جويمايتىنىن تاعى ءبىر مارتە ەسكە سالىپ, داعدارىسقا قاراماستان دامۋ جولىنان اينىماعان بارشا بيزنەس-قاۋىمداستىققا العىسىن ءبىلدىردى.
قازاقستان پرەزيدەنتى جاس كاسىپكەرلەردى تالماي ەڭبەك ەتىپ, بيىك بەلەستەردى باعىندىرۋعا ىنتالاندىرىپ, اسقاق يدەيالار ارقىلى ەل تىنىس-تىرشىلىگىن گۇلدەندىرۋگە شاقىردى.
سالتانات قورىتىندىسىندا نۇرسۇلتان نازارباەۆ «التىن ساپا» ارناۋلى ءۇش سىيلىعى مەن «پارىز» بايقاۋىنىڭ باس جۇلدەسىن تاپسىردى.
«ۇزدىك يندۋستريالىق جوبا» اتالىمىندا مۇناي-گاز كەشەنى قۇرال-جابدىعىن جانە قوسالقى بولشەكتەرىن شىعارۋ مەن ولارعا قىزمەت كورسەتۋدە باي تاجىريبەسى بار, قازىرگى زامانعى تەحنولوگيالاردى يگەرگەن «اتىراۋمۇنايماش» جشس قۇرىلتايشىسى ساعات تۇگەلباەۆ ەلباسى قولىنان قۇندى سىيلىقتى ەنشىلەدى.
«ۇزدىك يننوۆاتسيالىق جوبا» اتالىمىندا وڭتۇستىك قازاقستان وبلىسىنداعى «حيمفارم» اق توپ جارىپ, جۇلدەنى كاسىپورىن ديرەكتورى رۋستام بايعارين الدى. «حيمفارم» اق وندىرىستىك قۋاتى جىلىنا 1,5 ميلليارد تابلەتكا, كاپسۋلا جانە تۇيىرشىك شىعارۋعا مۇمكىندىك بەرەدى. كومپانيا ءونىمى قىرعىزستان, تاجىكستان, موڭعوليا, تۇركىمەنستان جانە رەسەي نارىقتارىنا جىبەرىلۋدە.
«ساپا كوشباسشىسى» اتالىمىندا «قازاقستان ەلەكتروليز زاۋىتى» اق ۇزدىك كورىندى. بۇل سىيلىق ERG مەنەدجەرلەر كەڭەسىنىڭ توراعاسى الەكساندر ماشكەۆيچكە تاپسىرىلدى. وسى ورايدا باستاپقى اليۋميني ءوندiرۋ جونىندەگى ەلەكتروليز زاۋىتىن 2007 جىلى ەلباسىنىڭ ءوزى ىسكە قوسقانىن ايتا كەتكەن ءجون. بۇگىندە كاسىپورىندا 2,5 مىڭنان استام ادام ەڭبەك ەتەدى. زاۋىتتىڭ جوبالىق قۋاتى جىلىنا 250 مىڭ تونناعا جەتىپ وتىر.
«پارىز» باس جۇلدەسى «اقسايگازسەرۆيس» اق پرەزيدەنتى تىلەك شەكتەباەۆكە بەرىلدى. كومپانيا جىل سايىن الەۋمەتتىك باعدارلامالاردى جۇزەگە اسىرۋعا 25 ملن تەڭگەگە دەيىن قارجى ءبولىپ, ءبىلىم بەرۋ, مادەنيەت مەكەمەلەرىنە تۇراقتى قولداۋ كورسەتىپ, مۇقتاج جاندارعا قول ۇشىن سوزىپ كەلەدى.