كەيبىر وقۋ, تىلدەردى ۇيرەتۋ كۋرستارىنىڭ, مەديتسينالىق, قايىرىمدىلىق جانە باسقا دا قۇرىلىمداردىڭ قىزمەتى اياسىندا ءدىندى ۇگىتتەۋگە تالپىنۋ فاكتىلەرى تىركەلگەن. مۇنداي جاعدايلاردا ءدىن ىستەرى باسقارمالارى جانە قۇقىق قورعاۋ ورگاندارى ولاردى جاۋاپكەرشىلىككە تارتا الادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن مالىمدەدى.
ول «ءدىني قىزمەت جانە بىرلەستىكتەر تۋرالى» زاڭنىڭ تولىققاندى ورىندالۋىن قامتاماسىز ەتۋ ەلىمىزدەگى ءدىني احۋالدىڭ تۇراقتىلىعىن ساقتاۋدىڭ كەپىلى بولاتىنىن, دەسترۋكتيۆتى ءدىني اعىعمداردىڭ جات يدەيالارىنىڭ تارالۋىنا توسقاۋىل قويۋعا مۇمكىندىك بەرەتىنىن اتاپ ءوتتى.
«بۇگىنگى تاڭدا بۇل زاڭ ءدىن سالاسىنداعى قاتىناستار مەن ءدىني قىزمەتتىڭ قۇقىقتىق نەگىزىن قالىپتاستىرادى. وعان سايكەس مەملەكەتىمىزدە ءدىني قىزمەتپەن اينالىسۋعا تەك رەسمي تىركەلگەن ءدىني بىرلەستىكتەرگە عانا رۇقسات بەرىلگەن. زاڭسىز ءدىني ناسيحات ارەكەتتەرى قۇقىققا قايشى كەلەدى جانە ونداي ناسيحاتتاۋشىلار اكىمشىلىك جاۋاپكەرشىلىككە تارتىلادى», – دەدى ب.ارىن.
مىسال رەتىندە ول كەيبىر وقۋ, تىلدەردى ۇيرەتۋ كۋرستارىنىڭ, مەديتسينالىق, قايىرىمدىلىق جانە باسقا دا قۇرىلىمداردىڭ قىزمەتى اياسىندا ءدىندى ۇگىتتەۋگە تالپىنۋ فاكتىلەرى تىركەلگەنىن ايتتى. مۇنداي قۇقىققا قايشى كەلەتىن جاعدايدا ءدىن ىستەرى باسقارمالارى جانە قۇقىق قورعاۋ ورگاندارى ولاردى جاۋاپكەرشىلىككە تارتا الاتىنىن جەتكىزدى.
«قۇلشىلىق ەتۋ, ءدىني جورالار, راسىمدەر جانە ءدىني جيىندار سەكىلدى ءدىني ءىس-شارالار زاڭمەن بەلگىلەنگەن ورىنداردا ەش كەدەرگىسىز وتكىزىلەدى. بۇدان باسقا ءدىني ءىس-شارالار اكىمدىكتەرمەن كەلىسىلگەن جەكە عيماراتتاردا جۇرگىزىلە الادى. بارلىق مەشىتتەردە جانە وزگە دىندەردىڭ عيماراتتارىندا وزدەرىنىڭ ىشكى ەرەجەلەرى بار. ولار ءدىننىڭ جانە ءدىني قاعيدالاردىڭ ەرەكشەلىكتەرىن ەسكەرە وتىرىپ جاسالعان», – دەپ اتاپ ءوتتى ۆيتسە-مينيستر.
ايدار ورىسباەۆ, «ەگەمەن قازاقستان».