نامازxانادا جينالىپ, ۋاعىز ايتۋعا بولمايدى - بەرىك ارىن

بۇگىندە مەشىتتەردە دەسترۋكتيۆتى اعىمداردىڭ وكىلدەرى يمامدارمەن داۋلاسىپ جاتادى. بۇل تۋرالى بۇگىن استانادا ء«دىني قىزمەت ءجانى ءدىني بىرلەستىكتەر تۋرالى» زاڭدى تۇسىندىرۋگە ارنالعان ءباسپاسوز ماسليxاتىندا قر ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن ايتتى. وسى ورايدا ول يمامداردىڭ زاڭمەن قورعالاتىنىن ەسكەرتتى, دەپ xابارلايدى قازاقپارات. "وكىنىشكە قاراي, بىزگە ءتۇرلى اقپاراتتار ءتۇسىپ جاتادى. مىسالى, كەيبىر عيبادات ورىنداردا دەسترۋكتيۆتى ءدىني اعىمداردىڭ وكىلدەرى قالىپتاسقان ءتارتىپتى بۇزادى. ولار قاساقانا يمامنىڭ ايتقانىن ەلەمەي, پىكىر تالاستىرىپ, داۋلاسىپ, شيەلەنىسكە يتەرمەلەيدى. بىلايشا ايتقاندا, ارانداتۋشىلىققا بارادى. ءتىپتى, يمامدار مەن كەلۋشىلەردى قورقىتۋ فاكتىلەرى دە بار. ءسويتىپ, ولار ءبىزدىڭ قوعامىمىزعا جات يدەيالارعا شاقىرادى, سوعان كۇشتەپ تىقپالايدى. بۇنداي ارەكەتتەر زاڭعا قايشى. وسى رەتتە رەسمي تۇردە ايپاعىمىز, ەلىمىزدە رەسمي تۇردە تىركەلگەن ءدىني بىرلەستىكتەردىڭ ءدىني قىزمەتشىلەرى مەن يمامدار مەملەكەتتىڭ قورعاۋىندا. ەگەر عيبادات ۇيلەرىنىڭ ىشكى ەرەجەلەرى بۇزىلسا, يمامدارعا نەمەسە باسقا دا ءدىني قىزمەتشىلەرگە ءوز مىندەتتەرىن ورىنداۋعا كىمدە-كىم كەدەرگى جاسايتىن بولسا, ولار ەرەجەنى عانا ەمەس, زاڭدى دا بۇزادى. سوندىقتان ونداي ارەكەتتەرگە كۋا بولعان ازاماتتار بىردەن پوليتسياعا xابارلاسسا بولادى", - دەدى ارىن. ايتا كەتكەن ءجون, اتالعان قۇجاتتىڭ قابىلدانعانىنا بەس جىل بولدى. ۆيتسە-ءمينيستردىڭ سوزىنە قاراعاندا, قۇدايعا قۇلشىلىق ەتۋ راسىمدەرى جانە باسقا ءدىني شارالار زاڭمەن بەكىتىلگەن ورىنداردا عانا جاسالادى. اتالعان نىساندارعا عيبادات ورىندارى, ءدىني بىرلەستىكتەردىڭ عيماراتتارى, زيراتتار جانە قۇلشىلىق ەتۋ ورىندارى جاتادى. «قاجەت بولعان جاعدايدا باسقا دا تۇرعىن-جايلار مەن قوعامدىق تاماقتانۋ نىساندارىندا بۇنداي شارالار وتكىزىلۋى مۇمكىن. مىسالى, اس بەرۋ جورالارى. الايدا سول جاقىن جەردە تۇراتىن ازاماتتاردىڭ مۇددەلەرى مەن قۇقىقتارى ساقتالۋى شارت. بۇدان باسقا, ءدىني شارالار اكىمدىكتەر تاراپىنان كەلىسىلگەن جەكە ءۇي-جايلاردا جاسالۋى مۇمكىن. مىسالى, نامازxانالاردا. بىراق بۇل جەردە ءبىر نازار اۋدارىپ كەتەتىن نارسە - نامازxانالاردا تەك ناماز وقۋعا عانا رۇقسات بەرىلەدى. الايدا نامازxانادا جينالىپ, ۋاعىز ايتۋعا بولمايدى. وعان جول بەرىلمەيدى», - دەپ اتاپ كورسەتتى ب.ارىن.