قازاقستان حالقىنىڭ 88 پايىزى وتاندىق تەلەارنالاردى كورەدى. بۇل تۋرالى بۇگىن پارلامەنت ماجىلىسىندەگى ۇكىمەت ساعاتىندا قر اقپارات جانە كوممۋنيكاتسيالار ءمينيسترى داۋرەن اباەۆ ايتتى.
«ەسەپتەۋلەر ناتيجەسىنە سايكەس, تەلەاۋديتوريانىڭ 88 پايىزى قازاقستاندىق ارنالاردى تاڭدايدى. سونىمەن بىرگە ولاردىڭ 53 پايىزى ارنالارىمىزدى كۇندەلىكتى كورۋدە. ءبىزدىڭ ماقسات بۇل كورسەتكىشتى ارتتىرۋعا نەگىزدەلگەن, سەبەبى قازىرگى زامانعى الەمدە تەلە-راديو حابار تاراتۋ قوعامداعى وڭتايلى وزگەرىستەردىڭ كاتاليزاتورلارىنىڭ ءبىرى بولىپ تابىلادى»,-دەدى مينيستر.
ءمينيستردىڭ ايتۋىنشا, مينيسترلىكتىڭ تاپسىرىسى بويىنشا اۋقىمدى الەۋمەتتىك زەرتتەۋ جۇرگىزىلىپ, قازاقستاندىقتاردىڭ مەديا-تاڭداۋىن انىقتاۋعا باعىتتالعان شارالار اتقارىلدى. الىنعان قولدانبالى مالىمەتتەردىڭ نەگىزىندە باق-تى مودەرنيزاتسيالاۋ مەن ۇلتتىق اقپاراتتىق كەڭىستىكتى جۇيەلەۋدىڭ نەگىزگى جوبالارى قالىپتاستىرىلدى. ونىڭ ىشىندە «حاباردىڭ» ۇستانىمى وزگەردى. «24 kz» «حابار 24» تەلەارناسى بولىپ رەبرەندينگ جۇرگىزىلدى, «Kazakh TV» تەلەارناسى «ءبىلىم جانە مادەنيەت» تەلەارناسىمەن بىرىكتىرىلدى. سونىمەن قاتار «Kazsport» تەلەارناسى زاماناۋي HD فورماتقا كوشىرىلدى, مۇنىمەن قوسا «قازاق راديوسى», «شالقار» جانە «Classic» راديولارىنىڭ قامتۋ اۋماعى كەڭەيتىلدى.
سونىمەن قاتار داۋرەن اباەۆ قازاقستان اۋماعىنىڭ 73%-ى ينتەرنەت جەلىسىنە قوسىلعانىن, بىراق ول الىستاعى اۋىلدارعا جەتە قويماعانىن ايتتى. سوندىقتان الدىمىزداعى 2 جىلدا "ينتەرنەت اۋىلعا" باعدارلاماسى قولعا الىنىپ, 1200 پەرسپەكتيۆالى ەلدى مەكەنگە ينتەرنەت جەلىسى جەتكىزىلەتىن بولادى.