بريتان عالىمى جەر شارىنا ەڭ قاۋىپتى ۋاقىت تۋعانىن ايتتى

ستيۆەن حوكينگ

بريتان تەورەتيك-فيزيگى ستيۆەن حوكينگ «جەر پلانەتاسى ءۇشىن ەڭ قاۋىپتى ۋاقىت» تۋدى دەگەن جورامال بولجام جاسادى. بۇل تۋرالى ول The Guardian باسىلىمىنداعى باعاناسىندا جازادى. عالىم ەليتالار مەن قاراپايىم ادامدار اراسىنداعى الشاقتىقتىڭ ۇلعايىپ بارا جاتقانىنا نازار اۋدارادى. حوكينگتىڭ ايتۋىنا قاراعاندا, كاسىپورىنداردا جۇمىستى روبوتتارعا بەرۋ, ادام رەسۋرستارىن پايدالانىپ جوعارى كولەمدە تابىس تابۋ قاجەتتىگىنىڭ ازايۋى قوعامداعى ءار ءتۇرلى توپتاعى ادامداردىڭ اراسىندا قارىم-قاتىناستىڭ ناشارلاۋىنا الىپ كەلەدى. «عالامتور جانە پلاتفورمالار ەكونوميكالىق تەڭسىزدىكتىڭ ارتۋىن تەزدەتىپ جاتىر. ونىڭ ارقاسىندا از عانا ادام قىزمەتكە از عانا ادامدى جالداۋ ارقىلى شاش-ەتەكتەن تابىس تاۋىپ جاتىر. بۇعان قارسى تۇرا المايمىز, بۇل پروگرەسس. دەگەنمەن الەۋمەتتىك تۇرعىدان بۇل وتە قاۋىپتى», – دەپ جازادى عالىم. ونىڭ پىكىرىنشە, كەيبىر ادامداردىڭ قوعامداعى وزگەرىستەردى قابىلداي الماۋى نەگە اپارىپ سوعاتىنىن اقش-تا پرەزيدەنت سايلاۋى مەن ۇلىبريتانياداعى ەۋروپا وداعىنان شىعۋ جونىندە داۋىس بەرۋ قورىتىندىسى كورسەتتى. ستيۆەن حوكينگ اتالعان پروبلەمالاردى شەشۋ ءۇشىن بارلىق ەلدەر, قوعامنىڭ بارلىق توپتارى بىرلەسە كۇش سالۋى كەرەكتىگىن ايتادى. «بالكىم, بىرنەشە عاسىردان كەيىن ءبىز باسقا جۇلدىزداردىڭ اينالاسىنداعى عالامشارلاردا ءومىر سۇرەتىن شىعارمىز. بىراق قازىر بىزدە ءبىر عانا عالامشار بار. ونى قورعاۋ ءۇشىن ءبىز بىرلەسە جۇمىس ىستەۋىمىز كەرەك. ول ءۇشىن مەملەكەتتەر اراسىنداعى كەدەرگىلەردى كوبەيتۋ ورنىنا, قۇرتۋىمىز قاجەت» – دەيدى ول ستيۆەن حوكينگ.