بۇگىن پارلامەنت ماجىلىسىندە «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرال» زاڭ جوباسى بويىنشا جۇمىس توبى وتىرىسىنىڭ الدىندا تىلشىلەرگە سۇحبات بەرگەن قر باس پروكۋرورىنىڭ ءبىرىنشى ورىنباسارى يوگان مەركەلدىڭ ايتۋىنشا, راقىمشىلىقپەن باس بوستاندىعىنان ايىرۋ ورىندارىنان 1800 ادام بوسايدى.
«قازىر تەرگەۋ اياسىندا قامالعانداردى قوسا ەسەپتەگەندە 36 مىڭى وتىرعىزىلدى. رەسمي تۇردە ءبىز 62-ءىنشى (سوتتالعانداردىڭ سانى بويىنشا) ورىندامىز, ال رەسمي ەمەس ەسەپتەيتىن بولساق, الەمدە 64-ورىندا تۇرمىز»,-دەدى مەركەل.
ونىڭ سوزىنە قاراعاندا, باس بوستاندىعىنان ايىرۋ ورىندارىنداعى 36 مىڭ ادامنىڭ ىشىندە راقىمشىلىققا 1800-ءى ىلىگۋى مۇمكىن.
"بۇلار الەۋمەتتىك تۇرعىدا قاۋىپ تۋدىرمايتىندار. الداعى جىلى بارشا قازاقستان حالقى ەكسپو-نى وتكىزەدى, الماتىدا دا شارالار ۇيىمداستىرىلادى جانە ءبىز وسىنىڭ بارلىعىن ەسكەرۋىمىز كەرەك. ال ەگەر اسا اۋىر قىلمىس جاساعانداردى بوساتساق, بىزگە ەشكىم دە كەلمەيدى, ياعني بۇل قاۋىپسىزدىككە اسەر ەتەدى", - دەدى ي. مەركەل.
جالپى, راقىمشىلىققا تەرگەۋ ءجۇرىپ جاتقاندار, سوت قاراۋىنداعىلار, سونداي- اق, پروباتسياداعىلاردى قوسا ەسەپتەگەندە 30 مىڭعا تارتا ادام ىلىگۋى ىقتيمال. بۇل رەتتە ايىپپۇل شاراسىنا, شارتتى جازاعا كەسىلگەندەر, قوعامدىق جۇمىستارعا جانە باسقا دا اۋىر ەمەس جازاعا تارتىلعاندار قامتىلاتىن بولادى.
بەلگىلى بولعانداي, لاڭكەستىك جانە باسقا اۋىر قىلمىس جاساعاندار راقىمشىلىققا ىلىكپەيدى. نەگىزى راقىمشىلىق جاساۋ اسا اۋىر ەمەس قىلمىستارعا, جاسوسپىرىمدەرگە, جۇكتى ايەلدەرگە جانە قوعامدىق قاۋىپتىلىگى جوق قىلمىستارعا كوزدەلگەن.
بۇدان بۇرىن حابارلانعانداي, وسى اپتادا پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» قر زاڭىنىڭ جوباسى جۇمىسقا الىندى.
ەسكە سالا كەتەيىك, مەملەكەت باسشىسى نۇرسۇلتان نازارباەۆ كونستيتۋتسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى. بۇل راقىمشىلىق شاراسى زاڭ بۇزعان ازاماتتارعا قاتىستى ىزگىلىك اكتىسى, مەملەكەت تاراپىنان مەيىرىمدىلىك پەن سەنىم ءبىلدىرۋدىڭ كورىنىسى بولىپ سانالادى.
«وسى جىلى قازاقستان تاۋەلسىزدىگىنىڭ 25 جىلدىق مەرەيتويىن اتاپ وتۋدە. رەسپۋبليكا كونستيتۋتسياسى ادام جانە ادامنىڭ ءومىرى, قۇقىقتارى مەن بوستاندىقتارىن ەڭ قىمبات قازىنا دەپ جاريالايدى. گۋمانيزم قاعيداتىنىڭ ءبىر كورىنىسى وعان سايكەس راقىمشىلىق جاساۋ اكتىن قولداناتىن زاڭدى قابىلداۋ بولىپ تابىلادى. زاڭ جوباسىنا سايكەس, ازاماتتاردىڭ الەۋمەتتىك ءالسىز توپتارى, سونىڭ ىشىندە كامەلەتكە تولماعاندار, جۇكتى ايەلدەر, كامەلەتكە تولماعان نەمەسە مۇگەدەك بالالارى بار ايەلدەر, مۇگەدەكتەر, قارت ادامدار, سونداي-اق اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى»,-دەدى جالپى وتىرىستا زاڭناما جانە سوت-قۇقىقتىق رەفورما كوميتەتىنىڭ توراعاسى نۇرلان ءابدىروۆ.