قوستاناي وبلىسىنىڭ اكىمى ارحيمەد مۇحامبەتوۆ قازاقستان رەسپۋبليكاسى پرەمەر–مينيسترىنىڭ ورىنباسارى اسقار ءماميننىڭ جەتەكشىلىگىمەن ۇكىمەتتىك دەلەگاتسيا قۇرامىندا قىتاي حالىق رەسپۋبليكاسىندا بولىپ, بىرقاتار ىسكەرلىك كەلىسىمدەرگە قاتىستى. قحر پرەمەر-ءمينيسترىنىڭ ورىنباسارى چجان گاوليمەن بولعان كەلىسسوزدەردە تاراپتار كەڭ اۋقىمدى ماسەلەلەردى قارادى. ونىڭ ىشىندە قوستاناي وبلىسىنىڭ قىتاي نارىعىنا استىق ەكسپورتتاۋ, تەمىر كەنى ونىمدەرىن جەتكىزۋدە تەمىر جول تاريفتەرىن تومەندەتۋگە قاتىستى جانە باسقا دا وزەكتى ماسەلەلەر قوزعالدى.
وبلىس اكىمدىگىنىڭ ءباسپاسوز قىزمەتىنىڭ حابارلاۋىنشا, ەكى كۇندىك ساپاردا ارحيمەد مۇحامبەتوۆ ءىرى ترانسۇلتتىق كومپانيالارمەن جانە ينۆەستيتسيالىق قورلار جەتەكشىلەرىمەن كەزدەسىپ, ماشينا قۇراستىرۋ جانە اۋىل شارۋاشىلىعى ونىمدەرىن وڭدەۋ سالاسىندا ماسەلەلەردى تالقىلادى. ارحيمەد بەگەجان ۇلى يمپورت جانە (سمس) جابدىقتارىن ەكسپورتتاۋ جونىندەگى قىتاي مەملەكەتتىك كومپانياسىنىڭ پرەزيدەنتى سيۋ شەنگ ۆانگ جانە Anhui Jianghual Automobile Co Ltd (JAC) كومپانياسىنىڭ باسقارما توراعاسى دجي انمەن كەزدەسۋدە اۆتوموبيل جاساۋ سالاسىنداعى ىنتىماقتاستىق جونىندە اڭگىمەلەستى.
«الليۋر كومپانياسى توبىنا» كىرەتىن قوستاناي اۆتوونەركاسىبى كاسىپورنىنىڭ وكىلدەرى قىتايلىق ارىپتەستەرمەن «سارىاركااۆتوپروم» زاۋىتىنىڭ بازاسىندا JAC مودەلىن جۇيەلى وندىرىسىنە ينۆەستيتسيا سالۋ جانە ەكى جاقتى جوبالاردى دامىتۋ ماسەلەلەرى تالقىلادى. ايماق باسشىسى قوستاناي وبلىسى وڭىرىندە تسەلليۋلوزا-قاعاز كومبيناتى جەلىسىن جاساۋ جوباسىن جۇزەگە اسىرۋ جايىن J.S. Machine كومپانياسىنىڭ اتقارۋشى ديرەكتورى مين ليمەن تالقىلادى. ال بۇل كومپانيا قاعاز ونەركاسىبى ءۇشىن جابدىقتار شىعارۋ جونىنەن الەمدىك كوشباسشى بولىپ سانالادى.
«جىبەك جولى» ينۆەستيتسيالىق قورى وكىلدەرىمەن بولعان كەزدەسۋدە قوستاناي قالاسىنداعى اگروونەركاسىپتىك پارك قۇرىلىسىن جۇزەگە اسىرۋ مۇمكىندىكتەرى قارالدى. سونىمەن قاتار اۋىل شارۋاشىلىعى ونىمدەرىن, سونىڭ ىشىندە مايلى داقىلدارىن وڭدەۋ ماسەلەلەرى دە قامتىلدى. ايتپاقشى, وبلىس باسشىسى كەلىسسوزدەر جۇرگىزگەن «جىبەك جولى» ينۆەستيتسيالىق قورىنىڭ ينۆەستيتسيالارى جىبەك جولى ەكونوميكالىق بەلدەۋىندە جانە تەڭىز جىبەك جولى بويىندا ورنالاسقان ەلدەردەگى ءىرى جوبالارعا باعىتتالعان.
ءنازيرا جارىمبەتوۆا,
"ەگەمەن قازاقستان"
قوستاناي