جۇمانىڭ جاڭبىرلى كۇنى الماتى قالاسىنىڭ «سايران» شاعىن اۋدانىنىڭ تۇرعىندارى قۋانىپ قالدى. قالاداعى حالقى ەڭ تىعىز ورنالاسقان اۋماقتا «قازپوشتانىڭ» جاڭا بولىمشەسى اشىلىپ, وڭدى وقيعا ورىن الدى. المالى اۋدانىنىڭ بارلىق تۇرعىندارى ءۇشىن ىڭعايلى ورنالاسقان №5 پوشتا بايلانىسى ءبولىمشەسى «تاستاق» بازارىنان جوعارى پروكوفەۆ كوشەسى 148-عيماراتىنا ورىن تەپتى.
جاسىراتىن نەسى بار, وسىدان از عانا جىلدار بۇرىن ەلىمىزدە پوشتا قىزمەتى قوجىراپ, ونىڭ قىزمەتىنە مۇقتاج حالىق جازىلعان گازەت-جۋرنالدارىن دەر كەزىندە الا الماي, باسقا دا ونىڭ قىزمەتىنە قاتىستى كەلەڭسىز جايلارعا تاپ بولىپ جاتاتىن. ەندى ونداي وقيعالار ورىن الماق ەمەس. ەل پوشتاسى – ءوز بەدەلىن بەكەمدەپ, ەڭسەسىن قايتا تىكتەپ كەلەدى.
وسىلايشا, بىرقاتار قيىندىقتارعا قاراماستان, ەل پوشتاسى بايلانىس بولىمشەلەرىنىڭ قاتارىن كوبەيتىپ, قىزمەت كورسەتۋدىڭ ساپاسىن كوتەرىپ, جالپى پوشتا بايلانىسىنىڭ كەلبەتىن جاقسارتۋعا قول جەتكىزە باستاعانى قۋانتادى.
ال, سايران» شاعىن اۋدانىنىڭ تۇرعىندارى وسى ۋاقىتقا دەيىن حاتتارى مەن سالەمدەمەلەرىن 1956 جىلى اشىلعان ەسكى عيماراتتان جىبەرىپ, پوشتا قىزمەتىنە قاتىستى وزگە تىرلىكتەرىن سوندا تىندىرىپ جۇرگەن. جۇرتتى كادىمگىدەي قۋانتقان 5-پبب ەندى الاڭى 310 شارشى مەتر بولاتىن جاڭا عيماراتقا كوشتى.
جاڭا پوشتا بولىمشەسى قاي جاعىنان الساڭىز دا – زامانىنا ساي قۇرال-جاراقتارمەن جابدىقتالىپ, جارقىراپ تۇر. ءمۇگەدەك جاندارعا ارنايى پاندۋس قويىلعان جانە ليفت ورناتىلعان.
سول سياقتى مۇندا قوسىمشا وپەراتسيالىق تەرەزە اشۋ ءمۇمكىندىگى پايدا بولدى. بولىمشەدەگى اقشا ايىرباستاۋ جونىندەگى وپەراتسيالىق تەرەزەلەر قر ۇلتتىق بانكىنىڭ تالاپتارىنا ساي جابدىقتالعان.
وسىنىڭ ءبارى جاڭا جۇمىس ورىندارىن اشۋعا دا سەپتىگىن تيگىزىپ وتىر.
بولىمشەنىڭ سالتاناتتى تۇردە اشىلعان تۇساۋكەسەرىنە اۋدان حالقىمەن قوسا, جەرگىلىكتى ءماسليحات دەپۋتاتتارى, «نۇر وتان» حدپ ساياسي كەڭەسىنىڭ مۇشەلەرى, پوشتا سالاسىنىڭ ارداگەرلەرى مەن كورپوراتيۆتىك كليەنتتەرى قاتىسىپ, «قازپوشتا» اق باسقارما توراعاسى اركەن ارىستانوۆ:
– پوشتا – پوشتا بايلانىسى بولىمشەسىنەن باستالادى. ءبىزدىڭ باستى ماقساتىمىز – ەلىمىزدىڭ ءاربىر تۇرعىنىن پوشتالىق جانە قارجىلىق قىزمەتتىڭ بارلىق ءتۇرىمەن قامتاماسىز ەتۋ بولعاندىقتان, وسى پوشتا بولىمشەسىنىڭ اشىلۋى بۇكىل قازاقستان بويىنشا پوشتا بولىمشەلەرىنىڭ قالالىق جانە اۋداندىق جۇيەلەرىن جاڭارتۋ ءجونىندەگى اۋقىمدى جوبالارىنا جول سالىپ بەرەدى, – دەدى.
ايناش ەسالي.
الماتى.