جاڭا جىل مەرەكەسى ءوتىپ, سلاۆيان حالىقتارىنىڭ تۇسىنىگىندەگى «ەسكى جاڭا جىلدى» شىعارىپ سالعاننان كەيىن, ۇيدەگى جاسىل شىرشانىڭ دا «قىزىعى» قالمايدى. قالالىقتاردىڭ ءبارى ونى قوقىسقا شىعارىپ تاستايدى. سودان كوپ قاباتتى ۇيلەردىڭ ماڭىندا توبە-توبە بولىپ جاس قاراعايلار شاشىلىپ جاتاتىن. وبلىستىق «ناشا گازەتا» گازەتىنىڭ رەداكتسياسى ۇيىمداستىرعان «قوش بول, شىرشا!» ەكولوگيالىق اكتسياسىنان كەيىن وسى كورىنىستى جۇرت ۇمىتۋعا اينالدى.
گازەت رەداكتسياسى بۇل اكتسيانى 2004 جىلى باستاعان بولاتىن. ولار قالانى تازا ۇستاۋعا قالالىقتاردىڭ نازارىن اۋدارۋ ءۇشىن سول جىلى گازەت وقىرماندارىن ۇيىمداستىرىپ, 100 شىرشا جيناپتى.
– كەلەسى جىلى قالالىقتار اكتسيامىزدى دۋىلداتىپ قولداپ كەتسىن. 2005 جىلى 1500 شىرشا جينالدى, بارلىعىن تىزبەسەم دە, كەيىنگى جىلداردى ايتايىن. 2015 جىلى – 4110, وتكەن جىلى – 4421, بيىل 4684 شىرشا جينادىق, – دەيدى گازەت رەداكتورى ولگا كولوكولوۆا.
گازەت رەداكتسياسى بۇل يگىلىكتى ىسكە وبلىستىق ءبىلىم باسقارماسىن دا تارتادى. بيىل «قوش بول, شىرشا!» اكتسياسىنا قاتىسقان 12 ءبىلىم وشاعىنىڭ اراسىنان №16 ورتا مەكتەپ 1453 جاس قاراعاي جيناپ, جەڭىمپاز اتاندى.
قالا تازالىعىن ساقتاۋ ىسىنە جاريالانعان تەندەردەن جۇمىس ۇتىپ العان «اۆز» جشس جاس قاراعايلاردى سىرتقا تاسيدى.
– ولاردىڭ جۇك ماشيناسىنا ءبىر تاسىعاندا 115 جاس قاراعاي سىيادى. سوندا 4600-دەن اسا اعاشتى قانشا رەت تاسيتىنىن ەسەپتەي بەرىڭىز, – دەيدى ولگا كولوكولوۆا.
ال كەسىلگەن قاراعايلار قوقىستى كوبەيتپەي, ءارى قاراي پايداعا اسادى. ونى جەر ۇيدە تۇراتىندار كەپتىرىپ وتقا, مونشاعا جاعادى, جولدا قار توقتاتۋ ىسىنە پايدالانىلادى, ۋاق مالعا, قويانعا ءۆيتامينى كوپ, تاپتىرمايتىن جەم-ازىقتىعى تاعى بار.
سوڭعى كەزدە اۋەسقويلار ودان اعاش كومىرىن دە دايىنداپ ءجۇر ەكەن. بيىل قوي وسىرۋمەن اينالىساتىن كاسىپكەر ەسىمحان تاشەتوۆ اكەسىمەن بىرگە 257 اعاش جيناعان 1 سىنىپ وقۋشىسى داريا ەرماكوۆاعا ۆولەيبول دوبىن سىيلادى. جەڭىمپاز مەكتەپتەردىڭ وقۋشىلارىنا دەمەۋشىلەردىڭ كومەگىمەن كينوتەاترعا بيلەت, كونفەتتەر سىيعا تارتىلدى, العىس حاتتار تاپسىرىلدى.
گازەت رەداكتسياسى 2010 جىلى كورشى رەسەيدە وتكەن «ەڭ ۇزدىك اكتسيا» بايقاۋىنا قاتىسىپ, ءۇشىنشى ورىن العان بولاتىن. ال وزىمىزدە ولار ءۇشىن يگىلىكتى ءىس جەڭىمپاز بولىپ وتىر. قوستاناي قالاسى قازاقستانداعى ەڭ قولايلى, تازا قالالار ۇشتىگىنە كىرەدى. وسىنداي ەكولوگيالىق اكتسيانىڭ دا وعان قوسقان ۇلەسى بارى ءسوزسىز.
ءنازيرا جارىمبەتوۆا,
«ەگەمەن قازاقستان»
قوستاناي