الماتىداعى «عىلىم ورداسى» رمك كونتسەرت زالىندا «كونستيتۋتسيالىق رەفورما – قازاقستان دامۋىنىڭ جاڭا كەزەڭى» اتتى كونستيتۋتسيالىق رەفورمانى تالقىلاۋعا ارنالعان سەمينار ءوتتى. سەمينارعا ەلىمىزدىڭ بەلگىلى عالىمدارى, ۇعا اكادەميكتەرى مەن عالىمدارى, عىلىمي-زەرتتەۋ ينستيتۋتتارىنىڭ باسشىلارى مەن جەتەكشى ماماندارى جانە باق وكىلدەرى قاتىستى.
ەلىمىزدىڭ بارلىق قالالارى مەن ايماقتارىندا قىزۋ تالقىلانىپ جاتقان جاڭا رەفورما عالىمدار نازارىنان تىس قالمايتىنى, بۇل بەتبۇرىس تىڭ باستامالارعا سەرپىن بەرىپ, ەلدىگىمىزدى قۋاتتايتىنى ايتىلدى. حالقىمىز ءوز دەربەستىگىنىڭ 25 جىلدىعىندا ايتۋلى تابىستارعا قول جەتكىزىپ وتىر. بىراق, بۇگىنگى كۇننىڭ تالاپتارىنا سايكەس, ءبىزدىڭ الدىمىزدا ۇلكەن ماقساتتار تۇر. سول سەبەپتى, ءبىز زامان سۇرانىسىنا ساي, باسقارۋ جۇيەسىن رەفورمالاپ, جاۋاپكەرشىلىكتەردى ناقتىلاپ الۋىمىز قاجەت.
جاڭا رەفورمانىڭ وزەكتىلىگىنە توقتالعان ەلىمىزدىڭ الدىڭعى قاتارلى عالىمدارى رەفورماداعى مايەكتى ماسەلەلەردى نەگىزگە الا وتىرىپ, زاڭ جوباسىنداعى پرەزيدەنتتىك وكىلەتتىكتىڭ بىرقاتار بولىگىن ۇكىمەت پەن پارلامەنتكە بەرۋ, سونىمەن بىرگە, سوت, پروكۋراتۋرا ورگاندارىنىڭ جۇمىسىن جەتىلدىرۋ سياقتى ۇلكەن ۇسىنىستاردى كەڭ كولەمدە تالقىلادى. جاڭا تەحنولوگيالىق دەڭگەيگە ءوتۋ, ەكونوميكالىق ءارى الەۋمەتتىك دامۋ مودەلىن قالىپتاستىرۋ جۇيەسى ءسوز بولدى.
«كونستيتۋتسيا كەز كەلگەن مەملەكەتتىڭ ەڭ نەگىزگى قۇجاتى. ونىڭ وزگەرىسكە ۇشىراپ وتىرۋى زاڭدى. سەبەبى, الەۋمەتتىك-ەكونوميكالىق, ساياسي دۇنيە ۋاقىت وتە كەلە وزگەرىپ, جاڭعىرىپ وتىرادى. بۇل ءبىزدىڭ العا قاراي ۇمتىلۋىمىزعا ۇلكەن سەپتىگىن تيگىزبەك» دەدى, جيىندا ءسوز العان فيلوسوفيا عىلىمدارىنىڭ دوكتورى سەرىك نۇرمۇراتوۆ. شارانى ۇيىمداستىرۋشىلاردىڭ ءبىرى, اتالعان عىلىم ورداسى باسشىسىنىڭ ورىنباسارى, تاريح عىلىمدارىنىڭ كانديداتى نۇرلان سەيدىن: «بۇگىنگى جيىننىڭ باستى ماقساتى – جاڭا رەفورمانىڭ مانىنە ۇڭىلە وتىرىپ, ەلىمىزدىڭ جارقىن بولاشاعىنا عالىمدار تاراپىنان ءۇن قوسۋ. ەلباسىنىڭ باستاماسىن قولداپ, ونىڭ ىسكە اسۋىنا از دا بولسا ءوز ۇلەسىمىزدى تيگىزۋ», دەدى.
كونستيتۋتسياعا ەنگىزىلەتىن وزگەرىستەر – مەملەكەتىمىزدىڭ الداعى ۋاقىتتا قارقىندى دامىپ, باسەكەگە قابىلەتتى 30 ەلدىڭ قاتارىنا ەنۋىنە جول اشاتىن بىردەن-ءبىر امال. وسى رەتتە, ەلباسىنىڭ جاڭا رەفورماسى – ەكونوميكالىق دامۋ مەن باسەكەگە قابىلەتتىلىكتى ارتتىرىپ, ەلىمىزدىڭ قارىشتاپ دامۋىنا جول اشاتىن ايقىن باستاما دەپ باعا بەردى جيىنعا قاتىسۋشىلار.
سەمينار سوڭى «عىلىم ورداسى» رمك ۇيىمداستىرۋىمەن بەلگىلى كومپوزيتور, ءانشى, قازاقستاننىڭ حالىق ءارتىسى التىنبەك قورازباەۆ پەن ونىڭ ءبىر توپ شاكىرتىنىڭ قاتىسۋىمەن وتكەن كونتسەرتتىك شاراعا ۇلاستى.
ارمان وكتيابر,
جۋرناليست
الماتى