الەمدىك سپورتتاعى جىلدىڭ ەڭ العاشقى جارىسى مارەسىنە جەتتى. جاسىل قۇرلىقتاعى تەننيس دوداسىنىڭ جەڭىمپازدارى دا انىقتالدى. ەرلەر اراسىندا شۆەيتساريالىق رودجەر فەدەرەر, ال ايەلدەر سىنىندا امەريكالىق سەرەنا ۋيليامس جەڭىس تويىن تويلادى. بۇل جولعى Australian Open ءتۋرنيرىن ەكى قۇرداستىڭ (ەكەۋى دە 35 جاستا) وزگە تەننيسشىلەرگە ارنالعان شەبەرلىك سىنىبى دەرسىڭ.
مەلبۋرندە كوپشىلىك بۇرىنعى فەدەرەردى كوردى. جيناقى, سوققىلارى ءدال ءارى جىلدام. مۇنىڭ ءبارى وعان فينالعا القىنباي جەتۋ ءۇشىن جەتكىلىكتى ەدى. القىنباي دەگەندە, ءتورتىنشى اينالىمدا جاپون كەي نيسيكوريمەن, ال جارتىلاي فينالدا جەرلەسى ستەن ۆاۆرينكامەن وتكەن ويىندار بەس سەتكە سوزىلعانىمەن, بۇل ماتچتاردان سوڭ دا رودجەردىڭ كورتقا قايتا شىعۋعا دايىن ەكەنى بايقالدى. دەگەنمەن, فينالدا ونى ەڭ ىڭعايسىز قارسىلاس يسپان رافاەل نادال كۇتىپ تۇردى. ىڭعايسىز بولاتىنى, شۆەيتساريالىق يسپان تەننيسشىسىن ۋيمبلدوننان بولەك ءۇلكەن دۋلىعا ساناتىنداعى دودالاردا ۇتقان ەمەس. اعىلشىن جەرىندە ەكى رەت قانا ۇستەمدىك تانىتقان ەكەن (2006 جانە 2007 جىلدارى), ونىڭ وزىندە سوڭعى جەڭىسىنىڭ اراسىن 10 جىل ءبولىپ تۇر...
فينالدىڭ العاشقى جانە ءۇشىنشى سەتتەرى سول باياعى ءتاجىريبەسى تولىسقان فەدەرەر مەن اتاقتى شۆەيتساريالىق تەننيسشىگە قارسى ويناۋدى ەندى مەڭگەرە باستاعان نادال كەزدەسۋىن ەسكە سالدى. King Roger (لاقاپ اتى – اۆتور) سوققىلارىنىڭ جىلدامدىعى مەن كۇشىنە يسپان جىگىتى توتەپ بەرە الماي, دوپتى كوزبەن شىعارىپ سالۋمەن بولدى. بىراق رافا ءوزىنىڭ دە «كورول» دەگەن اتاعى ەسىنە تۇسكەندەي, بويىن تىكتەپ, ەكىنشى جانە ءتورتىنشى سەتتەردە تىزگىندى قولعا الدى. ساۋاتتى قيمىلداپ, قارسىلاسىنىڭ دا كەمشىلىكتەرىن پايداسىنا اسىرا ءبىلدى. تارازى باسى تەڭەستى. بۇل – جانكۇيەرلەر ءۇشىن ناعىز دراما. ءنادالدىڭ بەسىنشى سەتتى سەنىمدى باستاۋى فەدەرەردى قورقىتا المادى: شۆەيتساريالىق سابىرلى قالپىنان تاڭعان جوق. مىنە, ءبىز بىلەتىن رودجەردىڭ مەلبۋرندەگى شەشۋشى كەزەڭدە توپ جارۋىنا ءدال وسى ۇستامدىلىعى كومەكتەسكەندەي. وسىلايشا 3 ساعات 37 مينۋتقا سوزىلعان ويىن 6:4, 3:6, 6:1, 3:6, 6:3 ەسەبىمەن بازەلدىك جىگىتتىڭ پايداسىنا شەشىلدى. سونىمەن, ۇلكەن دۋلىعاداعى 18-ءشى, ال اۆستراليا اشىق ءبىرىنشىلىگىندەگى 5-ءشى جەڭىس قولدا!
ال ايەلدەر سىنىندا اقتىق سىنعا اپالى-ءسىڭلىلى ۋيليامستەردىڭ شىعۋى كۇتپەگەن جاعداي بولدى. بىلتىرعى ماۋسىمدى ءساتسىز وتكىزىپ, ءتىپتى الەمنىڭ ءبىرىنشى راكەتكاسى اتاعىن نەمىس قىزى انگەليك كەربەرگە بوساتىپ بەرگەن سەرەنا اۆستراليادا كوشباسشىلاردىڭ قاتارىندا بولعانىن جوققا شىعارمايمىز. دەگەنمەن, ودان ءبىر جاس ۇلكەن ۆينۋس مەنمىن دەگەن سپورتشىلاردىڭ ءوزىن شاڭ قاپتىرىپ كەتەدى دەپ كوپشىلىك كۇتكەن جوق. وسىلايشا مىقتىلاردىڭ ءبارىن بىرىنەن سوڭ ءبىرىن جارىستان شىعارعان امەريكالىق تەننيسشىلەر جىلدى ءساتتى باستاپ وتىر. وسىعان قاراپ بۇل ەكەۋىنىڭ ۋاقىتقا باعىنبايتىن ەرەكشەلىگى بار ما دەيسىڭ.
Australian Open الدىندا كىشى ۋيليامس وكلەندتەگى تۋرنيردە الەمنىڭ 69-شى راكەتكاسى مەديسون برەنگلدەن ۇتىلىپ قالىپ, ءتورت اي بويى جارىستارعا قاتىسقان جوق. بۇل جايت سەرەنانىڭ جۇلدىزدى شاعى ءوتتى دەگەندەردىڭ ءسوزىن ناقتىلاي تۇسكەندەي بولدى. ءوزى دە تىلشىلەردىڭ سپورتتىق عۇمىرى تۋرالى ساۋالدارىنا «ءبارى اقپاندا بەلگىلى بولادى» دەپ جاۋاپ قاتۋى امەريكالىق سپورتشىنىڭ تەننيستەن كەتۋ جايلى ويلاپ جۇرگەنىن اڭعارتقانداي ەدى. ونىڭ ۇستىنە جىل سوڭىندا تۇرمىسقا شىعاتىنىن دا جاريالاعان.
ءسىڭلىسىنىڭ قۇلشىنىسى ۆينۋسكە دە شابىت بەرگەن ءتارىزدى. سەرەنانىڭ ەڭبەكقورلىعى جىگەرلەندىرەتىنىن قاشان دا ايتىپ جۇرەتىن ول قارسىلاستارىنىڭ جاستىعىنا دا, شەگرەن سيندرومىنا (تامىردىڭ تارتىپ اۋرۋى) دا قاراماستان, ەكەۋىنىڭ ۇلكەن دۋلىعاداعى ءوزارا توعىزىنشى كەزدەسۋىنە نىق قاداممەن جەتتى. ءتىپتى, جەڭىستەن ءۇمىتتى ەكەنىن اڭعارتىپ, جۇپتىق سىنداعى جارىسىن جالعاستىرۋدان دا باس تارتتى.
الايدا, بۇل سەرەنانى توقتاتۋ مۇمكىن ەمەس بولاتىن. شەشۋشى ويىندا ۆينۋس قانشا تىرىسىپ باققانىمەن, سەرەنانىڭ سوڭىنان قۋىپ جەتە المادى... بۇل – كىشى ءۋيليامستىڭ سپورتتىق كارەراسىنداعى 23-مەيدجورى.
سونىمەن, شتەففي گرافتىڭ ناتيجەسى ارتتا قالدى. سەرەنانىڭ ەندىگى ماقساتى – جەكەلەي سىندا 24 رەت جەڭىسكە جەتكەن مارگارەت كورتتىڭ رەكوردىن بۇزۋ. مىنا قارقىنمەن بۇل مەجە بيىلدان قالماي ورىندالۋى دا مۇمكىن. مۇندايدا «ورالۋىڭمەن, كورت حانشايىمى», دەگىڭ-اق كەلەدى. تەك سەرەنانىڭ ءسوزى توقتاۋ بولادى. «مەن ورالۋ دەگەن ءسوزدى ۇناتپايمىن. سەبەبى, تەننيستەن ەشقاشان كەتكەن جوقپىن», – دەيدى.
ەندەشە, تەننيس الەمى دە سەنىمەن قوشتاسۋعا اسىعار ەمەس, سەرەنا.
مادينا اسىلبەك
استانا