الەۋمەتتىك جەلىدە ءبازبىرەۋلەر ءوزىنىڭ قالتاسىنان اقشا شىعارىپ جاتقانداي, «وسى ۋنيۆەرسيادا بىزگە كەرەك پە, داڭقتى سپورتشىلارى جوق, قارادۇرسىن ءوتىپ جاتىر» دەپ كۇيىنەدى. مەيلى, اۋىز وزىنىكى عوي دەيىن دەسەڭ, وسىنداي ارانداتۋعا كوپتەگەن ازاماتتارىمىز سەنىپ قالادى. ۋنيۆەرسيادانىڭ تاريحي وقيعا ەكەندىگىن, وعان بۇكىل دۇنيە ءجۇزى كوز تىگىپ وتىرعاندىعىن, قازاقستاننىڭ مارتەبەسى اسقاقتاپ جاتقاندىعىن ەسكەرگىسى كەلمەيدى. «الماتى ارەنادا» وتكەن ءمانەرلەپ سىرعاناۋدا جارىسقا تۇسكەن ساڭلاقتاردىڭ ءتىزىمىن ءبىر ءسۇزىپ وتكەندە, ءبىزدىڭ قىزدارعا وڭاي بولمايتىنىن تۇسىندىك. رەسەي بىرىنشىلىكتەرىندە توپ جارىپ جۇرگەن ەلەنا روديونوۆا, الەم چەمپيونى, ەۋروپا چەمپيونى ەليزابەت توقتامىشەۆانى بىلاي قويعاندا, كوك ايدىندا جۇلدىزداي جارقىراعان جاپون, كورەي قىزدارىن قايدا قويارسىز؟ ءتىپتى, ولار ەكىنشى قۇراممەن كەلگەننىڭ وزىندە ەشكىمگە دەس بەرمەيدى.
ايتقانداي, قىسقا باعدارلاما بويىنشا ۇزدىك شىققاندار فينالعا ءوتتى. مۇندا جيناعان ۇپايلارىنا قاراي ءتورت توپقا بولىنەدى. ءبىزدىڭ قىزدار ءبىرىنشى جانە ەكىنشى توپقا ءتۇستى. مىقتىلار ءۇشىنشى مەن ءتورتىنشىدە. ماسەلەن, ءبىزدىڭ ايزا مامبەكوۆا 42,41 ۇپاي جيناسا, ەليزابەت توقتامىشەۆا 69,01, ەلەنا روديونوۆا 69,02 ۇپايعا قول جەتكىزدى. جاپون قىزدارى ريو نيحايا 61,90, حيناگو يسوبو 59,60 ۇپايعا يە بولدى. بۇلارعا يتاليالىق روبەرتو رودەمەرونىڭ وكشەلەپ كەلە جاتقاندىعىن ەسكەرسەك, جەڭىمپازدار مەن جۇلدەگەرلەردىڭ وسىلاردىڭ اراسىنان ىرىكتەلەتىندىگى بەلگىلى بولىپ قالدى.
ارينە, بۇل ۋنيۆەرسياداعا ءبىزدىڭ مانەرلەپ سىرعاناۋداعى ۇكىلەگەن ءۇمىتىمىز ەليزابەت تۇرسىنباەۆا جاسى تولماعاندىقتان قاتىسا المادى. مەملەكەتىمىزدىڭ اتىن تالاي حالىقارالىق باسەكەلەردە كوككە كوتەرگەن قىزىلوردالىق قىزدىڭ ەسىمىن اكەسى الەمدىك كينوجۇلدىز ەليزابەت تەيلوردىڭ قۇرمەتىنە قويعان ەكەن. بۇل ۋنيۆەرسيادادا ەسە جىبەرسەك تە, كەلەسى ۋنيۆەرسيادادا تۇرسىنباەۆانىڭ توپ جارارىنا سەندىك. ال بۇگىنگى جارىسقا قاتىسقان قىزدارىمىز ءۇشىن شەبەرلەردىڭ ونەرى ۇلكەن مەكتەپ بولارى ءسوزسىز.
باقتيار تايجان,
«ەگەمەن قازاقستان»
الماتى