ءبىز مىنگەن تىكۇشاق الاتاۋدان اسقاندا, ءتاڭىرتاۋ سىلەمدەرى كوك اسپاننىڭ تىرەۋىندەي بولىپ كورىنگەن ەدى. ەندى اپپاق بولىپ تابان استىندا قالىپ بارادى. قۇددى ءحانتاڭىرىنىڭ ىنىلەرى سەكىلدى ءتىزىلىپ جاتىر. تىكۇشاق بەس مىڭ مەتر بيىكتىككە كوتەرىلگەندە, ءحانتاڭىرى قاسقايىپ تۋرا الدىمىزدان كورىندى. تىم تاكاپپار. قۋانعانىمنان قاسىمدا وتىرعان اعامنىڭ قولىن قىسا بەردىم. ەندى شە, ءدال وسى ساپاردا ءحانتاڭىرى ماعان جانە تىكۇشاقتاعى التى ادامعا دا كورىنىپ, ءبارىمىزدى باقىت قۇشاعىنا ءبىر ءسات بولسا دا بولەسە ەكەن دەگەن نيەتىمە جەتتىم عوي. تىكۇشاق 5500 مەتردە قالىقتاعاندا شايقالا باستادى. بىرتىندەپ قويۋلانا باستاعان بۇلت اسەرىنەن ودان بيىككە كوتەرىلۋ قاۋىپتى ەكەندىگىن ۇشقىش حاباردار ەتكەندە «بارەكەلدى, ەڭ باستىسى ءحانتاڭىرىن قول سوزىم جەردەن كوردىك قوي!», دەپ قاناعات تۇتتىق.
تەڭىز دەڭگەيىنەن 6995 مەتر بيىكتىكتە تۇرعان ءحانتاڭىرىنىڭ ءبىر سىرى كەز كەلگەن ۋاقىتتا ادامداردىڭ بارلىعىنا بىردەي كورىنە بەرمەيدى. ەتەگىندەگى قاينار اۋىلىنا جازعىتۇرىم كۇن بەسىنگە تاياعاندا بارساڭىز, اپپاق قار قۇرسانعان شىڭ قىرلانا كوز الدىڭىزدا تۇرىپ ءبىر ءسات باقىت قۇشاعىنا بولەيتىن كەزى بولادى. بۇل نيەتىڭىزدىڭ تۇزۋلىگىن بىلدىرەدى. الەمدەگى بيىك شىڭداردىڭ ساناتىنان سانالاتىندىقتان ءبىر جىلدارى شەتەلدەن ارنايى كەلىپ, اپتالاپ جاتىپ, ءبىر كورە الماي كەتكەن تۋريستەر دە بولعان. مۇز قۇرسانىپ, تۇماندانىپ جاتىپ الدى. قولدان كەلەر قايران جوق. تاعى ءبىر ايتا كەتەر جايت – كەڭەستىك زاماندا رايىمبەك اۋدانى قارقارا جايلاۋىندا تۋريستەردىڭ ارناۋلى تۇراعى بولعان. كاسىبي بىلىكتى ماماندار تۋريستەردى باستاپ, تىكۇشاقپەن قىرعىزستان ارقىلى حانتاڭىرىنە اپارىپ, كورسەتىپ قايتاتىن. ءسويتىپ, تاۋ ءتۋريزمى دامىعان ەدى. بۇگىندە ءۇزىلىپ قالعان سول ءداستۇرلى جالعاستىرىپ, ءتۋريزمنىڭ تەمىرقازىعىنا اينالاتىن ورتالىقتىڭ ءبىرى – ءحانتاڭىرى. نازار اۋدارسا, ول ويدىڭ ورىندالارى حاق.
نۇربول الدىباەۆ, «ەگەمەن قازاقستان»
الماتى وبلىسى,
رايىمبەك اۋدانى