كەشە قازاقستاننىڭ «اۋىل» حالىقتىق-دەموكراتيالىق پاتريوتتىق پارتياسىنىڭ شتاب-پاتەرىندە پرەزيدەنت نۇرسۇلتان نازارباەۆتىڭ بيلىك تارماقتارى اراسىنداعى وكىلەتتىكتەردى قايتا ءبولۋ تۋرالى كونستيتۋتسيالىق رەفورمالارىنىڭ جوباسىن تالقىلاۋعا ارنالعان كونفەرەنتسيا بولىپ ءوتتى.
ونىڭ جۇمىسىن پارتيا ورتالىق اپپاراتىنىڭ جەتەكشىسى فاريد اقبەرديەۆ اشىپ, ءجۇرگىزىپ وتىردى. كونفەرەنتسياعا ەلىمىزدىڭ 13 ايماعىنداعى پارتيا فيليالدارىنىڭ وكىلدەرى قاتىستى. كونفەرەنتسياعا قاتىسقاندار, اسىرەسە, الىنىپ تاستالعان نورمالار تۋرالى ءوز پىكىرلەرىن ورتاعا سالدى.
ماسەلەن, بۇرىنعى پرەزيدەنت وكىلدىگىنە ەنەتىن رەسپۋبليكالىق مەملەكەتتىك باعدارلامالاردى پرەزيدەنتتىڭ بەكىتۋ قۇقى ەندى ۇكىمەت باسشىسىنا بەرىلەتىندىگى تۋرالى كوپتەگەن وڭ پىكىرلەر ايتىلدى. وسى جايتقا بايلانىستى فاريد اقبەرديەۆ پرەزيدەنتتىڭ ۇكىمەتتىڭ سوڭعى كەڭەيتىلگەن وتىرىسىندا بىلدىرگەن پىكىرلەرىن العا تارتىپ, وسى ۋاقىتقا دەيىن ەلباسىنا ءتىپتى اۋىل ماسەلەلەرىمەن اينالىسۋعا تۋرا كەلگەنىن جەتكىزدى. بيلىكتى وسىنشا ورتالىقتاندىرىلعاننىڭ كەسىرىنەن پرەزيدەنت اكىمدەر مەن مينيسترلەر شەشۋگە ءتيىستى بارلىق ماسەلەلەرمەن اينالىسۋىنا تۋرا كەلىپ وتىرعانىن كولدەنەڭ تارتتى.
«سوندىقتان دا مينيسترلەر مەن اكىمدەر وزىنە جۇكتەلگەن مىندەتتى ەشكىمگە قارايلاماي, باتىلدىقپەن ورىنداۋى كەرەك قوي», دەدى اپپارات جەتەكشىسى. سونىمەن قاتار, بيلىكتىڭ ۆەرتيكالدىعى وتكەن ۋاقىت ارالىعىندا ءتيىمدى قىزمەتتەر اتقارىپ, وڭ ناتيجەلەرگە قول جەتكىزىلگەندىگى دە اۋىزعا الىندى. جالپى, «اۋىل» پارتياسى كونستيتۋتسيالىق رەفورمالار مەن پرەزيدەنتتىڭ سوڭعى جولداۋىن حالىققا ءتۇسىندىرۋ بويىنشا 15 شارا جوسپارلاعان ەكەن. «حالىقپەن كەزدەسۋلەردە بىزگە وسى ماسەلەلەر بويىنشا كوپتەگەن سۇراقتار قويىلادى. ءبىز ولارعا تولىمدى جاۋاپتار بەرۋگە تىرىسامىز. سونىمەن قاتار, ءبىز ءوز ۇسىنىستارىمىز بەن پىكىرلەرىمىزدى ارناۋلى كوميسسياعا دا ۇسىناتىن بولامىز», دەدى فاريد اقبەرديەۆ.
پارتيا توراعاسى, سەناتور ءالي بەكتاەۆ پرەزيدەنت جولداۋىن حالىققا ءتۇسىندىرۋ ماقساتىمەن وڭىرلەرگە شىققان پارلامەنت دەپۋتاتتارىمەن بىرگە ساپاردا جۇرگەندىكتەن, كونفەرەنتسيا جۇمىسىنا قاتىسا المادى.
جاقسىباي سامرات,
«ەگەمەن قازاقستان»