«نۇر وتان» پارتياسى پاۆلودار وبلىستىق فيليالىندا پارلامەنت ءماجىلىسىنىڭ دەپۋتاتتارى ءاليا ساپاروۆا, قۇرالاي قاراكەن, سەرىك قۇسايىنوۆ, ساكەن وتەباەۆ جانە نارينە ميكاەلياننىڭ پاۆلودار وبلىسى باستاۋىش پارتيا ۇيىمدارى وكىلدەرىمەن كەزدەسۋى ءوتتى.
كۇن ءتارتىبى بويىنشا قازاقستان رەسپۋبليكاسى پرەزيدەنتىنىڭ بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى ۇندەۋى مەن قازاقستان حالقىنا جولداۋى تالقىلاندى.
وتىرىس مودەراتورى, «نۇر وتان» پارتياسى پاۆلودار وبلىستىق فيليالى توراعاسىنىڭ ءبىرىنشى ورىنباسارى يليا تەرەنچەنكو ءوز سوزىندە مەملەكەت باسشىسى ۇسىنعان باستامالارىنىڭ اسا ماڭىزدىلىعىن اتاپ ءوتتى.
ءماجىلىس دەپۋتاتى ساكەن وتەباەۆ جيىنعا قاتىسۋشىلارعا پرەزيدەنت باستامالارىنىڭ باسىم باعىتتارىن ءتۇسىندىرىپ, پاۆلودارلىقتاردىڭ ءجيى قوياتىن ساۋالدارىن سانامالاپ بەردى.
– قازىر بۇل قۇجاتتاردى تالقىلاۋ بەلسەندى تۇردە ءجۇرىپ جاتىر. ايدىڭ سوڭىنا دەيىن بارلىق ۇسىنىستاردى تىڭداۋىمىز كەرەك. بيلىك وكىلەتتىكتەرىنىڭ ءبولىسىنەن كەيىن ولاردى تەرىس پايدالانۋشىلىقتار قىلاڭ بەرمەي مە دەپ سۇرايدى كەيبىر ادامدار. بۇعان ايتارىم, پارلامەنت پەن ۇكىمەت وكىلەتتىكتەرى وتە ناقتى ءارى انىق جازىلعان. سوندىقتان, ەشبىر تەرىس پايدالانۋشىلىقتار مۇمكىن ەمەس, – دەپ جاۋاپ قايىردى ءماجىلىس دەپۋتاتى.
سونىمەن بىرگە, حالىق قالاۋلىلارى پارتيانىڭ وبلىستىق فيليالىندا ازاماتتاردى جەكە ساۋالدارى بويىنشا قابىلداپ, وندا قاراپايىم پاۆلودارلىقتاردىڭ مۇڭ-مۇقتاجدارىمەن تانىستى. ماسەلەن, «RedZone» قب توراعاسى كونستانتين مۋزالەۆسكي «ۆ» ساناتىنداعى جۇرگىزۋشىلەردىڭ اۆتومەكتەپتەردە مىندەتتى وقىتىلۋى جونىندە ماسەلە قوزعادى. ونىڭ سوزىنە قاراعاندا, بۇل جول ءجۇرۋدىڭ قاۋىپسىزدىگى مەن مادەنيەتىن ارتتىرۋعا سەپتىگىن تيگىزەدى. ءماجىلىس دەپۋتاتتارى قوعام بەلسەندىسىنە بۇل ماسەلەنى پارلامەنتتىك كوميسسيالار وتىرىستارىندا تالقىلاۋعا ۋادە بەردى.
فاريدا بىقاي, «ەگەمەن قازاقستان»
پاۆلودار وبلىسى