كەشە ەلوردادا سيريا داعدارىسىن رەتتەۋ جونىندەگى حالىقارالىق تەحنيكالىق كەزدەسۋ ءوتتى. كەزدەسۋدەن سوڭ رەسەي فەدەراتسياسى قارۋلى كۇشتەرى باس شۇعىل باسقارما باسشىسىنىڭ ورىنباسارى, گەنەرال-مايور ستانيسلاۆ گادجيماگومەدوۆ ورتالىق كوممۋنيكاتسيالار قىزمەتىندە بريفينگ وتكىزىپ, جۋرناليستەرگە مالىمدەمە جاسادى.
– اقپاننىڭ 6-سى كۇنى رەسەي, تۇركيا جانە يران دەلەگاتسيالارى, سونداي-اق, بىرىككەن ۇلتتار ۇيىمىنىڭ وكىلدەرى استانا قالاسىندا بىرلەسكەن توپتىڭ العاشقى وتىرىسىن ءوتكىزدى. اتالعان توپ 23-24 قاڭتار كۇندەرى ءدال وسى جەردە سيريا ماسەلەلەرى بويىنشا ءوتكەن حالىقارالىق كەزدەسۋدىڭ ءناتيجەسىندە قۇرىلعان بولاتىن. بۇگىنگى وتىرىسقا قاتىسۋشىلار سيريادا اسكەري ءىس-قيمىلدى توقتاتۋ رەجىمىن ورىنداۋ بارىسىن تالقىلادى. وسى رەجىمدى تولىعىمەن ورىنداۋعا قاجەتتى ارنايى باقىلاۋ جۇرگىزۋ, ءتۇرلى ارانداتۋشىلىق ارەكەتتەردىڭ الدىن الۋ مەن توقتاتۋ رەجىمىنىڭ بارلىق تالاپتارىن ورىنداۋ جايى ءسوز بولدى. سونداي-اق, قاتىسۋشىلار ءوزارا سەنىم شارالارىن پىسىقتاپ, گۋمانيتارلىق كومەكتەردىڭ كەدەرگىسىز جەتكىزىلۋى ماسەلەسىن تالقىلادى. دەلەگاتسيالار سيريادا اسكەري ءىس-قيمىلدى تولىعىمەن توقتاتۋعا مۇددەلى ەكەندەرىن جەتكىزدى. بارلىق قاتىسۋشىلار استانا پروتسەسىن جالعاستىرۋعا ارنالعان تالقىلاۋ الاڭىن ۇسىنعانى ءۇشىن, سونىمەن قاتار, اسكەري ءىس-قيمىلداردى توقتاتۋ جونىندەگى بىرلەسكەن توپتىڭ استاناداعى العاشقى وتىرىسىنا بارلىق جاعدايدى جاساعانى ءۇشىن شىنايى العىستارىن جەتكىزدى,– دەدى گەنەرال-مايور ستانيسلاۆ گادجيماگومەدوۆ.
بيىلعى جىلى 23-24 قاڭتار كۇندەرى ەلوردادا رەسەي, تۇركيا جانە يران ەلدەرىنىڭ ۇسىنىسىمەن سيريا ماسەلەلەرىن رەتتەۋ بويىنشا حالىقارالىق كەلىسسوزدەر وتكەنى بەلگىلى. حالىقارالىق ساياساتتا استانا پروتسەسى دەگەن اتاۋعا يە بولعان القالى جيىنعا سيريا داعدارىسىنا قاتىستى باستى تاراپتاردىڭ وكىلدەرى قاتىسقان بولاتىن. كەلىسسوز ناتيجەسىندە سيريادا اتىستىڭ توقتاتىلۋىنا جانە ارانداتۋشىلىققا جول بەرمەۋگە كەپىلدىك بەرەتىن ءۇشجاقتى تەتىك قالىپتاستىرىلدى. رەسەي, تۇركيا جانە يران ەلدەرى اتىستى توقتاتۋ رەجىمىنە كەپىل بولاتىن بولىپ شەشىلدى.
ارنۇر اسقار, «ەگەمەن قازاقستان»