وڭتۇستىك قازاقستانعا ينۆەستيتسيا تارتۋ ماقساتىندا ۇيىمداستىرىلعان قازاق-تۇرىك ينۆەستيتسيالىق فورۋمىندا ءسوز العان ءوڭىر باسشىسى جولداۋدا جۇكتەگەن مىندەتتەردى جۇزەگە اسىرۋ ماقساتىندا بيزنەس وكىلدەرىمەن بىرلەسىپ, وبلىستىڭ «بىرىڭعاي ەكسپورت ستراتەگياسى» ازىرلەنىپ جاتقانىن اتاپ ءوتتى. سونداي-اق, ول تاۋار ءوندىرۋ مەن وتكىزۋ, قىزمەت كورسەتۋ ءىسىن جاھاندىق جەلىگە بەيىمدەۋ قاجەتتىگىنە توقتالدى, دەپ حابارلادى وقو اكىمىنىڭ ءباسپاسوز قىزمەتى.
«بۇل تۇستا قازاقستان مەن تۇركيا مەملەكەتىنىڭ اراسىنداعى قارىم-قاتىناستى اتاپ وتكىم كەلىپ وتىر. بۇگىندە انكارا استانانىڭ ساياسي جانە ەكونوميكالىق تۇرعىداعى ەڭ جاقىن جانە سەنىمدى سەرىكتەسىنە اينالدى. تۇركيا قازىرگى تاڭدا ەكونوميكالىق كورسەتكىشتەرى بويىنشا الەمدەگى دامىعان جيىرما ەلدىڭ قاتارىندا. اسىرەسە سوڭعى جىلدارى قۇرىلىس, اۋىل شارۋاشىلىق ونىمدەرىن وڭدەۋ, فارماتسەۆتيكا, مەديتسينا سالالارىندا اسا بەلسەندىلىك تانىتىپ, قازاقستاندا جانە وڭتۇستىك قازاقستان وبلىسىنا دا ءوزىنىڭ دامۋ ءۇردىسىن ۇسىنىپ كەلەدى»,-دەدى اكىم.
ايتا كەتەيىك, تۇركيا ەلى قازىرگى تاڭدا ەكونوميكالىق كورسەتكىشتەرى بويىنشا الەمدەگى دامىعان 20 ەلدىڭ قاتارىندا. تۇركيا ۇيىمداسقان يندۋستريالىق ايماق قۇرۋ بويىنشا باي جانە ءساتتى تاجىريبە جيناعان رەسپۋبليكا. بۇگىندە وڭتۇستىكتەگى تۇركيالىق فيرمالار مەن كومپانيالاردىڭ سانى 30-عا جەتىپ وتىر. بۇل ەكى ەل اراسىنداعى ساۋدا-ەكونوميكالىق قارىم-قاتىناستىڭ جوعارى دارەجەدە دامىپ وتىرعانىن كورسەتەدى.
وڭتۇستىك قازاقستان وبلىسى 3 ميلليون حالقى بار, مىقتى ەكونوميكالىق الەۋەتى زور, سەرپىندى دامىپ كەلە جاتقان ءوڭىر. سونىمەن قوسا, وبلىس ازيا مەن تاياۋ شىعىستى جانە ەۋروپانى بايلانىستىرىپ تۇرعان «باتىس-ەۋروپا, باتىس-قىتاي» اۆتوماگيسترالىنىڭ ماڭىندا ورنالاسقان. سوندىقتان وڭتۇستىك ءوڭىرى ەكسپورت باعدارلاۋشى ءوندىرىس پەن شەكارالىق ساۋدانىڭ دامۋىن قامتاماسىز ەتۋگە كۇش سالادى.
فورۋمدا ايماق باسشىسى وبلىستىڭ دامۋ جەتىستىكتەرىنە توقتالىپ, تۇرىك كاسىپكەرلەرىن الداعى ۋاقىتتا بىرلەسىپ جۇمىس ىستەۋگە شاقىردى.
جيىندا سونداي-اق, تۇرىك كەڭەسى باس حاتشىسىنىڭ ورىنباسارى ومەر كودجامان, قر ينۆەستيتسيالار جانە دامۋ مينيسترلىگىنىڭ ينۆەستيتسيالار كوميتەتىنىڭ توراعاسى ساپاربەك تۇياقباەۆ, تۇركيا رەسپۋبليكاسى ۇلتتىق ەكونوميكا ءمينيسترىنىڭ كەڭەسشىسى تارىك سونمەز, تۇركياداعى «OSTIM» يندۋستريالدى ايماقتاردى باسقارۋ جانە قۇرۋ حالىقارالىق وپەراتورىنىڭ باسقارما توراعاسى ورحان ايدىن, تۇركيانىڭ ساكاريا قالاسىنداعى ساۋدا-ونەركاسىپ پالاتاسىنىڭ باسقارما توراعاسى ماحمۋت كوسەمۋسۋل بايانداما جاسادى.
ينۆەستيتسيالىق فورۋم بارىسىندا ەكى جاقتى ىنتىماقتاستىقتى ارتتىرۋ ماقساتىندا مەموراندۋم ءتۇزىلدى.