پرەزيدەنت ەلىمىزدىڭ بولاشاق دامۋىن, ياعني «قازاقستاننىڭ ءۇشىنشى جاڭعىرۋىن» قازىرگى زاماننىڭ وزىق تەحنولوگيالارىن يگەرۋمەن, مەڭگەرۋمەن بايلانىستىردى. ورتالىق كوممۋنيكاتسيالار قىزمەتىندە وتكەن بريفينگتە قازاقستان كوممۋنيستىك حالىق پارتياسىنىڭ ەلباسى جولداۋىنا قاتىستى پىكىر-تۇجىرىمدارىمەن بولىسكەن پارلامەنتى ءماجىلىسىنىڭ دەپۋتاتى, پارتيانىڭ ورتالىق كوميتەتىنىڭ حاتشىسى جامبىل احمەتبەكوۆ وسىلاي دەدى.
ونىڭ ايتۋىنشا, جولداۋ باسپاسوزگە جاريالانعاننان بەرى حالىقتىق كوممۋنيستەر جينالىپ, قۇجاتتى قىزۋ تالقىلاپ, ءوز وي-پىكىرلەرىن بىلدىرۋدە.
«كەشە استانا قالالىق كوميتەتىندە جانە وبلىستاردا وسى ماسەلەگە ارنالعان جيىندار ءوتتى. كوممۋنيستەر بۇل جولداۋدى دا ەلىمىزدىڭ تاعى ءبىر كەزەڭدى باعىندىرۋعا ارنالعان ستراتەگيالىق جوسپارى دەپ تانىپ وتىر», – دەدى ج.احمەتبەكوۆ.
ول دۇنيە جۇزىندەگى دامىعان ەلدەردىڭ قاي-قايسىسى دا دامۋ ساتىسىنا تەك وزىق تەحنولوگيالاردىڭ ارقاسىندا قول جەتكىزگەنىن اتاپ ءوتتى.
«پرەزيدەنت ەلىمىزدىڭ بولاشاق دامۋىن, ياعني «قازاقستاننىڭ ءۇشىنشى جاڭعىرۋىن» قازىرگى زاماننىڭ وزىق تەحنولوگيالارىن يگەرۋمەن, مەڭگەرۋمەن بايلانىستىردى. سوندىقتان دا وسى ستراتەگيالىق قۇجات ەلىمىزدى دامۋدىڭ بيىگىنە الىپ شىعاتىنىنا سەنەمىز», – دەپ مالىمدەدى دەپۋتات.
ول سونداي-اق ەلباسى جولداۋدا اگروونەركاسىپ كەشەنىن دامىتۋدىڭ جاڭا مەملەكەتتىك باعدارلاماسىن دامىتۋ تۋرالى تاپسىرما بەرگەنىن ايتىپ ءوتتى.
«اۋىل شارۋاشىلىعى سالاسىندا شەشىمىن كۇتىپ تۇرعان ماسەلە وتە كوپ, جولداۋداعى جەر ماسەلەسى, سۋبسيديا, شارۋا قوجالىقتارى, ساپالى ەكولوگيالىق تازا ءونىم ءوندىرۋ, عىلىمي جەتىستىكتەر جانە تاعى باسقالارى. بۇل ماسەلەلەر كوممۋنيستەردىڭ عانا ەمەس, حالقىمىزدىڭ جارتىسىن قۇرايتىن اۋىل حالقىنىڭ دا قىزىعۋشىلىعىن تۋعىزدى, – دەدى كوممۋنيستىك حالىق پارتياسى ورتالىق كوميتەتىنىڭ حاتشىسى. – ءبىزدىڭ پارتيامىزدىڭ نەگىزگى ەلەكتوراتى قاراپايىم بۇقارا حالىق. بارلىق پارتيالىق قۇجاتتارىمىزدا دا باستى قۇندىلىعىمىز بۇقارا دەپ كورسەتىلگەن. سوندىقتان دا جولداۋداعى الەۋمەتتىك ماسەلەلەردى ءالى دە تەرەڭ زەردەلەيتىن بولامىز».
ايدار ورىسباەۆ, "ەگەمەن قازاقستان"