پارلامەنتتە تالقىلاناتىن, قابىلداناتىن زاڭداردىڭ ومىرشەڭدىگى دەپۋتاتتاردىڭ ەلدىڭ تىنىس-تىرشىلىگىنە قانشالىقتى قانىقتىعىنا تىكەلەي بايلانىستى. جۇرت جاعدايىن جاقسى بىلمەي, بۇگىنگى احۋالدىڭ تامىر بۇلكىلىن تولىق سەزىنبەي مەملەكەت دامۋىنا ەرەكشە ۇلەس قوساتىن زاڭداردى قابىلداي سالۋعا بولمايدى.
سوندىقتان, دەپۋتاتتار وڭىرلەرگە جوسپارلى تۇردە ساپارعا شىعىپ, سايلاۋشىلارمەن كەزدەسىپ, ولاردى تولعاندىرىپ جۇرگەن ماسەلەلەردى تىڭداپ, قاجەتتى قورىتىندى شىعارىپ وتىرادى. ءماجىلىس دەپۋتاتى, قازاقستان حالقى اسسامبلەياسى دەپۋتاتتىق توبىنىڭ جەتەكشىسى ساۋىتبەك ابدراحمانوۆ جاڭا جىلداعى العاشقى جۇمىس كۇنىن قىزىلوردا وبلىسىنان باستاپ, ايماقتاعى ەڭ شالعايدا جاتقان ارال اۋدانىنا ارنايى ات باسىن تىرەدى.
ارال حالقىمەن كەزدەسۋىندە حالىق قالاۋلىسى ءسوز تيەگىن جاقىندا عانا «ەگەمەن قازاقستاندا» جاريالانعان «ەلباسى ارمانداعان ارال» اتتى تاعىلىمدى ماقالانى ارقاۋ ەتە وتىرىپ باستادى. س.ابدراحمانوۆ وسى زامانداعى جاھاندىق ەكولوگيالىق اپات رەتىندە تانىلعان ارال ماسەلەسىن شەشۋدىڭ كىلتىن تاپقان پرەزيدەنت نۇرسۇلتان نازارباەۆتىڭ ەرەن ەڭبەگىن العا تارتىپ, وڭىردە اتقارىلىپ جاتقان يگى ىستەرگە توقتالدى. تارتىلىپ كەتكەن تەڭىزدىڭ بۇرىنعى ارناسىنا جاقىنداپ, بالىق شارۋاشىلىعىنىڭ قارقىندى دامي باستاعانىن, ەكولوگيانىڭ جاقسارۋىنا وراي مال باسىنىڭ اناعۇرلىم ارتىپ, حالىقتىڭ ءال-اۋقاتى ەداۋىر وسكەنىن اتاپ ايتتى. ءماجىلىس دەپۋتاتى الەمدەگى جالپى احۋال, ەلىمىزدەگى جاعداي, ەلباسىنىڭ باستاماسىمەن قولعا الىنىپ, جۇيەلى تۇردە جۇزەگە اسىپ جاتقان مەملەكەتتىك باعدارلامالار جايىندا اڭگىمەلەپ, پارلامەنتتەگى زاڭ شىعارۋشىلىق جۇمىستىڭ جاي-جاپسارىنان جان-جاقتى حاباردار ەتتى.
سونىمەن قاتار, جۇرتشىلىقتىڭ كوپتەگەن سۇراقتارىنا جاۋاپ بەردى. ءبىر قىزىعى, دەپۋتاتقا سۇراقتار مەن ۇسىنىستار ەكى ساعاتتىق كەزدەسۋگە قاتىسا الماعان ازاماتتار تاراپىنان دا جازباشا ءتۇسىپ, قوسىمشا اۋىزشا ايتىلىپ جاتتى. ولاردىڭ ءبىرى – سەرىك ابدۋاليەۆ: «مەن كەزدەسۋگە جارتى ساعات كەشىگىپ كەلىپ, سىرتتا وتىرىپ مىنا جاعدايلاردى جازۋعا كىرىسىپ كەتتىم» دەپ باستالاتىن ءتورت بەتتىك جازباسىندا پارلامەنتتە قوزعالسا, كوتەرىلسە ورىندى بولار ەدى دەپ سانايتىن بىرنەشە ماسەلەنى بايان ەتكەن.
مۇنان سوڭ اۋداندىق بالىقشىلار مۇراجايى مەن ءا.نۇرپەيىسوۆتىڭ شىعارماشىلىق ءۇيىنىڭ جۇمىسىمەن تانىسىپ, «سوڭعى پارىز» رومانى كەيىپكەرلەرىنىڭ ەسكەرتكىشىن تاماشالاعان ساۋىتبەك ابدراحمان ۇلى قازالى اۋدانىنا باردى. مۇندا قازالى كولىك-تەحنيكالىق كوللەدجىنىڭ جۇمىس بارىسىمەن تانىسىپ, قازالى اۋداندىق اكىمدىگىندە سايلاۋشىلارمەن جۇزدەستى. حالىق پەن دەپۋتات اراسىنداعى ديالوگ تەك ساياسي, ەكونوميكالىق, الەۋمەتتىك باعىتتا عانا ءوربىپ قويعان جوق. مىسالى, س.ابدراحمانوۆ ورتالىق كوميتەتتە مادەنيەت سەكتورىنىڭ مەڭگەرۋشىسى, مادەنيەت ءمينيسترىنىڭ ءبىرىنشى ورىنباسارى سەكىلدى قىزمەتتەردى اتقارعان كەزىندە قازاق ءانىن الەمگە تانىتقان ونەردىڭ جارقىن جۇلدىزى روزا باعلانوۆامەن ارالاس-قۇرالاس بولعان. كەزدەسۋ بارىسىندا وتكەن كۇندەردەن دە ادەمى ەستەلىك ايتىلىپ, قىزعىلىقتى جايلار تارتىمدى اڭگىمەنىڭ وزەگىنە اينالدى.
ءماجىلىس دەپۋتاتى وڭىرگە ساپارى بارىسىندا قىزىلوردا وبلىسىنىڭ بارلىق اۋداندارىن ارالاپ شىعۋدى جوسپارلاپ وتىر.
ەرجان بايتىلەس,
«ەگەمەن قازاقستان»
قىزىلوردا وبلىسى