وتكەن جىلدىڭ كۇزىندە ەركىن جۇزۋدەن ريو پاراليمپيا ويىندارىنىڭ التىن جۇلدەسىن تاققان ءزۇلفيا عابيدۋللينانى جامبىل جۇرتى اۋەجايدان قۇشاق جايا قارسى العاندا, وبلىس اكىمى كارىم كوكىرەكباەۆ جەڭىمپازدى قۇتتىقتاي تۇرىپ, الداعى ۋاقىتتا تاراز قالاسىنان ءزاۋلىم ءۇي سالىپ بەرۋگە ۋادە بەرگەن بولاتىن.
مىنە, «ۋادە – قۇداي اتى» دەگەندى ايماق باسشىسى جادىنا جاقسى تۇيسە كەرەك, چەمپيوننىڭ قونىس تويىن تاۋىق جىلىنا قالدىرماستان, تۋرا 31 جەلتوقسان كۇنى جاڭا ءۇيدىڭ كىلتىن تابىس ەتتى. ءزاۋلىم ءۇي «تاراز ارەنا» سپورت سارايىنا جاقىن ماڭنان ورىن تەپتى. بۇل, ارينە, ءزۇلفيا ءۇشىن وتە ىڭعايلى. كۇن سايىن جاقىن جەردەگى سپورت سارايىنا قاتىناپ, جۇزۋمەن ەركىن اينالىسۋىنا مۇمكىندىك مول. بەس بولمەلى ءۇي «بينوم» جشس دەمەۋشىلىگىمەن ءۇش اي ىشىندە تۇرعىزىلىپتى. باس-اياعى 20 ميلليون تەڭگە جۇمسالعان بۇل ۇيدە ارنايى جاتتىعۋ زالى دا, پاندۋسى دا بار. ال «قازاقستان حالىق بانكى» جامبىل وبلىستىق فيليالىنىڭ ديرەكتورى نۇرلىبەك سەيداحمەت سىيلاعان 3 ميلليون تەڭگەگە ۇيگە قاجەتتى جيھازدار ساتىپ الىندى.
ارينە, ءزۇلفيا عابيدۋللينانىڭ قۋانىشىندا شەك جوق. بۇعان دەيىن كوپقاباتتى ۇيدە تۇرىپ كەلگەن چەمپيون باسپالداقتاردان ءتۇسىپ-شىعۋ وتە قيىن بولعانىن ايتادى.
– «تاراز-ارەناعا» جاتتىعۋعا كەلگەن سايىن وسى ماڭدا جەكە ءۇيىم بولسا دەپ ارمانداۋشى ەدىم. مىنە, سول ارمانىما جەتىپ وتىرمىن. سول ءۇشىن سپورت سالاسىنا ەرەكشە كوڭىل ءبولىپ جۇرگەن ەلباسىنا, وبلىس اكىمىنە ايتار العىسىم زور. مەن دە ەلىمنىڭ ابىرويىن اسقاقتاتۋ ءۇشىن بارىمدى سالامىن, – دەپ ءزۇلفيا اعىنان جارىلدى.
ورالحان ءداۋىت,
«ەگەمەن قازاقستان»
جامبىل وبلىسى